Tumanyayi bimpe binetu
1 Malanda atudi tusuika ne binetu bena nkristo mmapite pa dibuela nabo tshianana mu bisangilu. Tudi tuenza malu mu diumvuangana ne disua dia Nzambi, ke bidi bitufikisha ku disuika malanda a mu nyuma ne Yezu. (Mako 3:34, 35) Bua bualu ebu, tudi tusuika malanda a buena dîku, munda mua tshisumbu tshia bena nkristo, ne bana betu ba balume ne ba bakaji ba mu nyuma batudi ne bua kunanga. (Yone 13:35) Nunku, aba badi badisangisha ku “bena nzubu wa Nzambi” badi ne bua kudibamba bua kumanyangana bimpe bamue ne bakuabo.—Ef. 2:19.
2 Tumanyayi binetu muntu ku diende dîna: Tudiku bamanye dîna dia muanetu yonso wa balume anyi wa bakaji wa mu dilonga dietu dia mukanda anyi? Pa tshibidilu, kasumbu aka katu kakepele, ke bidi mua kutufikisha ku dikuata bipepele mêna a tshitupa tshinene tshia benamu, anyi a buonso mene. Bituikala katuyi nansha bamanye mêna abo, tudi mua kuamba ne: tudi bamanye bimpe binetu anyi?
3 Bidi munyi bua bakuabo, pamue ne bana, badi babuela mu bisangilu mu Nzubu wa Bukalenge? Tudi mua kusua kusesela amu bamue balunda. Nansha mudibi kabiyi bibi bua kuanyisha dishala pamue matuku wonso ne bamue, katuena basue kuimanyika bienzedi bietu bia dinanga, anyi miyuki idi ibaka amu kudi bantu bungi bukese. Tudi ne bua ‘kudialabaja,’ pa kudibamba bua kumanya bimpe bana betu buonso ba balume ne ba bakaji. (2 Kol. 6:11-13) Nunku, mbimueneke patoke ne: tudi ne bua kubamanya muntu ku diende dîna.
4 Bana betu ba balume badi balombola bisangilu bia mu tshisumbu nebikale ne bua kudibamba bua kumanya dîna dia muteleji yonso. Padi muntu ne muntu utedibua ku dîna diende kumukila ku tshiakuidi, neadiumvue mudi mumvuija ende manyishibue. Amu pinapo, abi bidi biambuluisha tshisumbu bua kumanyangana mêna. Bulelela, kakuakupangika bapiabapia anyi benyi munkatshi mua bateleji, ne nebikale bikole bua kumanya mêna wonso. Kadi, bituasuminyina, netukankamije binetu ne kuleja diditatshisha dilelela buabo.—Lomo 1:11, 12.
5 Tudianjile kuela tshidia bua kumanyangana bimpe: Pa tshibidilu, batangidi bena ngendu batu bamanya bimpe bana betu ba balume ne ba bakaji ba bungi. Mmunyi mutubo benza? Mu mishindu isatu mishilangane: (1) badi bapatuka nabo pa tshibidilu mu buambi; (2) bilondeshile mudibo mua kuenza, batu banyisha mabikila a bana betu ba balume ne ba bakaji; ne (3) mu bisangilu, badi badianjila kuela tshidia pa kuela bakulumpe ne bana muoyo.
6 Tudiku mu mushindu kampanda anyi kansanga mua kualabaja kutantshilangana kuetu ne kulonga mua kumanya bimpe binetu anyi? Mbipepele bulelela bua tuetu kubabikila bua kutufilabo mu buambi. Buambi bua ku nzubu ne ku nzubu, makumbula mapiamapia, malonga a Bible anyi bumanyishi bua mu njila ne bibejibeji bidi mishindu mitambe buimpe bua kumanyangana bilenga. Misangu mikuabo, mbimpe kabidi bua kubikila bakuabo ku metu, pamu’apa bua kuabanyangana biakudia anyi biakunua. Pa kudianjila kuleja ditabalela bua bapiabapia anyi bua aba badi bakatale pa tshibidilu, tudi mua kuenza bia bungi ki ng’anu bua kubibaka mu nyuma, apo kabidi kudipetela mafutu manene.—Bienz. 20:35; 1 Tes. 5:11.
7 Paulo uvua mumanye bimpe binende. Ditela diende dia bavule ba ku buobu ku dîna mu mikanda yende ntshijadiki tshia ditabalela ne tshia dinanga dilelela bivuaye nabi kudibo. (1 Tes. 2:17; 2 Tim. 4:19, 20) Madikolela atudi tuenza bua kumanya bimpe binetu neatupeteshe buonso masanka a bungi.