Mufuki wetu Munene udi uditatshisha bua bualu buetu!
1 Mu madikolela ende bua kuelesha ditunga dia Isalele divua dipange butumike meji, Yehowa wakakonka ne: ‘Kuakumanya anyi? Kuakumvua anyi? Yehowa udi Nzambi wa tshiendelele, Mufuki wa nseke yonso ya pa buloba too ne ku mfudilu kuabu.’ (Yesh. 40:28) Tudi bamanye Mufuki wetu Munene, ne tudi tumona mudiye uditatshisha ne dinanga buetu tuetu. Kadi bantu miliyo mivule badi bela mpata bua dikalaku diende, anyi badi ne lungenyi kampanda lua tshidiye ludi kaluyi luakanangana ne tshidi mu Bible. Mmunyi mutudi mua kubambuluisha?
2 Mukanda mupiamupia wa Y a-t-il un Créateur qui se soucie de vous? (Kudi Mufuki udi uditatshisha bua bualu buebe anyi?) mmulongolola bua kuambuluisha bantu ba nunku. Udi ulomba bantu ba lungenyi bua belangane meji pa malu malelela. Malu adi akoka ntema ne adi atuisha adi mu mukanda eu adi ne bua kukoka bantu badi bawubala.
3 Wibidilangane ne mukanda wa Créateur: Lama mu lungenyi dilondangana dia nshindamenu dia malu adimu. Nshapita 2 too ne 5 idi ikonkonona mushindu wakafika bukua-bintu, muoyo ne muntu ku dikalaku ne tshiledi tshia bionso ebi. Nshapita 6 too ne wa 9 idi yakula bua Bible ne Muenaye ne, mu mushindu wa pa buawu, ikonkonona bikala muyuki wa difuka wa mu Genese muikale wa kueyemena. Nshapita wa 10 udi ufila diandamuna didi disankisha ku lumue lua ku nkonko itu itamba kupampakaja bantu: “Bikala Mufuki ututabalela, bua tshinyi kudi makenga a bungi nunku?”
4 Teta kuelangana meji ne badi bela mpata: Mabeji 78-79, mu mukanda wa Créateur, adi aleja ngelelu wa meji uudi mua kulonda bua kuambuluisha bakuabu bua bafike ku nkomenu muimpe pa bidi bitangila Nzambi. Ubakonke ne: “Bukua-bintu bidiku buvua ne mbangilu anyi?” Ba bungi nebitabe. Buobu bitabe, ubakonke ne: “Mbangilu au uvua mudienzekele patupu anyi uvua ne tshiledi?” Bavule badi bitaba ne: mbangilu eu uvua ne tshiledi. Ebi bidi bifikisha ku lukonko lua ndekelu elu: “Tshiledi tshia mbangilu wa bukua-bintu tshivua tshintu kampanda tshia tshiendelele anyi Muntu kampanda wa tshiendelele?” Ngelelu wa lungenyi eu udi mua kufikisha bantu ba bungi ku dimona se: kudi ne bua kuikala Mufuki.
5 Mukanda wa Créateur udi menemene mukanda udi bantu ba bungi nawu dijinga. Uufile kudi balela bebe, bena mudimu nebe, balongi nebe ne bakuabu bamanyangana nabu. Patuka nawu mu buambi bua wewe kuufila kudi bantu baudi upetangana nabu badi bela mpata pa dikalaku dia Nzambi. Patudi tutamba kuibidilangana ne mukanda eu, dinanga dietu bua Mufuki wetu didi ditamba kukola, ditusaka bua kutungunuka ne kuenda mu diumvuangana ne mêyi-makulu ende matumbuke.—Ef. 5:1; Buak. 4:11.