Enza mudimu bimpe ne dîba diudi nadi
1 Muntu yonso udi ne bungi bumuebumue bua dîba lumingu luonso. Dîba ditudi tufila mu dimuangalaja lumu luimpe didi ne mushinga menemene bualu ndipitshisha mu mudimu udi upandisha mioyo ya bantu. (Lomo 1:16) Tudi tuleja dianyisha dietu bua bualu ebu patudi tudilongolola bimpe bua mudimu, tufika pa dîba mu bisangilu bia mudimu ne tupatuka diakamue bua kuya mu teritware. Tudi ne bua kuditua mu mudimu wa buambi pamutu pa kujingakana patupu. Bu mudi Yehowa mutulongeshe ne: “tshintu tshionso tshidi ne tshikondo tshiatshi,” tudi ne bua kuenza mudimu bimpe bushuwa ne dîba ditudi bateke ku luseke bua buambi.—Muam. 3:1.
2 Akaja dîba diebe ne meji: Tudi tupeta mabenesha a bungi patudi tulamata bikole ndongamu udi utupetesha mushindu wa kudifila pa tshibidilu mu mudimu wa buambi. Mbimanyike bimpe ne: bipeta bimpe bitudi tukumbaja mu mudimu wetu bidi ne bua kuakanangana ne bungi bua dîba dipitshisha mu mudimu eu. Udiku mua kuakajilula kakese midimu yebe ya pa tshibidilu bua ne: ufile dîba dia bungi mu mudimu wa buambi anyi? Tshilejilu, kunyima kua mudimu wa difila bibejibeji mu Disambombo, kuenaku mua kusakidila dîba bua kuenza ndambu wa makumbulula anyi? Biwikala uvua mupatuke mu buambi mu Dia lumingu ne muenze dîba dikese, udiku mua kupitshisha ndambu wa dîba kabidi mu dienza makumbulula peshi mu dilombola dilonga dia Bible anyi? Kudiku mushindu wa kusakidila buambi bua mu misesu ku mudimu webe wa ku nzubu ne ku nzubu anyi? Mu mishindu eyi anyi mikuabu, tudi mua kupeta mushindu wa kuakaja mudimu wetu.
3 Patudi mu mudimu wetu, tudi mua kujimija dîba didi ne mushinga bituikala katuyi badimuke to. Bushuwa, padi kuulu kakuyi kuimpe, tudi mua kuikisha kakese bua kupetulula makanda ne kutungunuka ne mudimu. Kadi mbimpe kuikala ne nkatshinkatshi bualu misangu yonso diikisha dia nunku kaditu anu dikengedibua to.
4 Matuku aa mbilue kukola bua kusangana bantu kumbelu. Bua kutshimuna lutatu elu, bamanyishi ba bungi batu benza buambi bua ku tshiibi ne ku tshiibi pa mêba mashilangane a dituku. Bua tshinyi kubenga kuteta buambi bua mu mapingaja anyi bua ku dilolo?
5 Mbimpe kubenga kuyikila dîba ditudi mu buambi bua mu misesu. Kadi, mbimpe kutapulukangana ne kuya kudi bantu bua kutuadija nabu diyuki. Nunku dîba dia bungi nedikaleku bua mudimu wa nsongo ne nenupete disanka dia bungi mu mudimu eu.
6 Keba bikondo bia kuamba lumu luimpe: Pakandamuna muntu kampanda muvuaye kayi usankidila bulelela, Ntemu wakebeja né kuvua muntu mukuabu mu nzubu uvuaye mua kuakula nende. Biakamufikisha ku diyikila ne tatu wa nzubu, uvua usama kukavua bidimu bia bungi ne uvua anu mubengele mu bulalu. Ditekemena dileja mu Dîyi dia Nzambi diakenza ne: asankidile tshiakabidi muoyo. Katupa kîpi kunyima, ukavua ujuka mu bulalu, ubuela mu bisangilu mu Nzubu wa Bukalenge ne uyikila ne bakuabu bua ditekemena diende dipiadipia divuaye mupete!
7 Muanetu kampanda mushikankunde wakatumikila mubelu wa kupatuka mu buambi mêba a kumpala kua Dilonga dia Mukanda dia Tshisumbu. Ku tshiibi tshia kumpala, wakasangana nsongakaji wa bidimu 13 wakamuteleja ne ntema yonso ne kuangataye mikanda. Dituku divua dilonda muanetu eu wakamona nsongakaji au mu kalasa. Pashishe, wakamulomba bua balonge nende Bible, ne nsongakaji au wakitaba.
8 Dîba diudi wenza mu buambi dikale dia mushinga mukole: Kupatuka pa tshibidilu mu buambi kudi kutuambuluisha bua kukolesha nzanzu ya dimanyisha lumu luimpe. Udiku mua kuakaja makokeshi ebe a kutuadija diyuki ku tshiibi ne mbuelelu muimpe udi upatula bipeta bilenga anyi? Udiku mua kudienza mulongeshi muzanzamuke paudi ulombola dilonga dia Bible dia ku nzubu anyi? Mu dienza nunku, newikale bushuwa mua kuenza mudimu bimpe mu buambi ne dîba diudi nadi ne kutamba kupatulamu bipeta bimpe.—1 Tim. 4:16.
9 Bu mudi ‘dîba dienda dikepa,’ nsombelu wetu udi ne bua kuikala muule tente ne midimu ya buena-Kristo. (1 Kol. 7:29, Mukanda wa Mvidi Mukulu) Kulama dîba bua mudimu wa buambi kudi ne bua kuikala pa muaba wa kumpala mu malu etu a mushinga. Tuenzayi mudimu wetu ne lukunukunu ne makanda. Dîba ntshintu tshia mushinga tshidi Yehowa mutupeshe. Misangu yonso tuenze nadi mudimu ne meji.
[Kazubu mu dibeji 4]
Tangila ngenyi mifila eyi:
▪ Fika pa dîba mu bisangilu bia mudimu.
▪ Tusumbu tua bamanyishi tuikale ne bantu bakese bilondeshile nsombelu.
▪ Kunengi bua kubuela mu teritware to.
▪ Enza mudimu mu teritware dîba didi bantu ba bungi bikale kumbelu.
▪ Imue misangu upatuke nkayebe padibi kabiyi ne njiwu.
▪ Enza makumbulula adi pabuipi ne teritware uudi muenzele mudimu wa ku tshiibi ne ku tshiibi.
▪ Ikala wenza mudimu padi bakuabu baudi nabu mu kasumbu kamue banenga ku tshiibi.
▪ Pikalaku mushindu, bilondeshile nsombelu udiku, wenze nansha dîba dijima mu mudimu.