Ndongamu mupiamupia wa mpuilu wa pa buende wa dituku dimue

Ndongamu wa mpuilu wa pa buende wa dituku dimue udi utuadija mu Kabitende 1999 udi ne tshiena-bualu etshi: “Tukebululayi mu malu mondoke a Nzambi.” (1 Kol. 2:10, NW) Mmalu kayi a mushinga atualonga?

Mu dikeba diabu dia dimanya, bantu ba bungi kabena bakankamijibua kudi malu adibu bapeta to. Bible udi utupesha makanda, bu mualeja mutangidi wa tshijengu mu muyuki wende eu: “Kukebulula mu Dîyi dia Nzambi kudi kufila makanda.” Ngamba-malu mukumbudi neasuikakaje dikebulula mu malu mondoke a Nzambi ne diyisha lumu luimpe penzaye muyuki udi ne lukonko elu: “Mmunyi muudi wangata diyisha dia Bukalenge?”

Mmunyi mudi baledi mua kuambuluisha bana babu bua kumbula mu Dîyi dia Nzambi? Mibelu miakanyine neyifidibue mu tshitupa etshi: “Buejayi Dîyi dia Nzambi mu lungenyi lua bana benu.” Bansonga bena Kristo badi ku buenzeji bulenga padibu batantshilangana ne bantu bapie mu nyuma ba mu tshisumbu. Nebaleje bilejilu bia mudibu ku buenzeji bulenga mu tshitupa etshi: “Bansonga badi balongela kudi bantu bakole.”

Yehowa udi Musokolodi wa malu masokome. Bua tshinyi tudi ne bua kukeba ne tshisumi mu tshikondo etshi tshiuma tshisokoka tshia mu nyuma? Ngamba-malu mukumbudi neumvuije malu avua Yehowa musokolole mu tshikondo tshia kale ne mu tshikondo tshietu etshi mu muyuki eu: “Yehowa udi usokolola ku kakese ku kakese malu mondoke.” Muyuki eu neukoleshe dipangadika dietu dia kutungunuka ne “kukebulula mu malu mondoke a Nzambi.”

Dilongolola mpindieu bua kubuelamu. Badi bajinga kutambula bua kuleja didilambula diabu kudi Yehowa badi ne bua kumanyisha mutangidi-muludiki pa lukasa. Dijinga dietu dikole dia kukebulula ne lubatshi mu Dîyi dia Nzambi nedikoleshibue kudi malu atumvua. Nunku, kupangi kuikalaku dituku edi dia pa buadi dia dilongesha dia mu nyuma!