Ntshinyi tshiwambila muena Buddha?
1 Mu amue matunga, ku bantu badi batambula, bungi bupite pa tshia bibidi tshia kudibu mbakolele mu tshitendelelu tshia Buddha. Ntshinyi tshidi tshikoka bantu aba ku bulelela? Mmunyi muudi mua kuambila muena Buddha lumu luimpe.
2 Leja diditatshisha diebe dilelela bua bantu: Ba bungi bavua bena Buddha mbambe ne: ki ndielangana nabu meji bikole divua dibakoke ku bulelela to. Kadi, diditatshisha dia bana betu ne muoyo mujima bua bualu buabu ke diakalenga mitshima yabu. Muntu mukaji kampanda muena Asia uvua musombele ku États-Unis wakakema bikole pa kumona muoyo wa bulunda uvua nawu muanetu wa bakaji uvua ulua kumutangila ne biakamusaka bua kuitaba dilonga. Kavua mumanye kuakula Anglais bimpe to, kadi muanetu wa bakaji eu uvua ne lutulu. Pavua muntu mukaji eu mupungile anyi kayi ne mushindu wa kulonga, muanetu eu uvua anu umusombesha patupu bia mu bulunda ne bumvuangana bua kulonga musangu mukuabu. Ndekelu wa bionso, mamu eu, bana bende ba balume babidi ne mamuende ukavua mukulakaje bakatambula bonso. Wakapingana mu ditunga diabu dimulela ne kuambuluishaye bantu ba bungi bakuabu bua kulonga bulelela. Muanende umue wa balume udi usadila mpindieu ku biro bia filiale. Mmabenesha kayipu aa adi mafumine ku dileja ‘buimpe bua Yehowa ne dinanga diende kudi bantu bonso’!—Tito 3:4.
3 Ngelelu wa meji wa bena Buddha: Pa tshibidilu, bena Buddha batu bitaba ngenyi mikuabu, kadi kabatu bamona mushinga wa kulamata ku malongesha kampanda majadika nansha. Nunku muntu ne muntu udi ne ende mitabuja. Tshiena-bualu tshitangalake mu tshimue tshitupa tshia malongesha a bena Buddha ntshia ne: nsombelu mmuule ne makenga, kadi ku diambuluisha dia dikenkeshibua, muntu udi mua kuimanyika diledibua njila ne njila mu nsombelu idi kayiyi isankisha. Badi bamba ne: bua kusungidibua ku diledibua edi, muntu udi ne bua kufika ku Nirvana, ngikadilu udi kayi kumvuija bualu ki mmuaba kampanda anyi bualu kansanga to, udi kayi dikenga ne bubi. (Tangila Ntshinyi tshidi tshitufikila patudi tufua?, mabeji 9-10.) Bidi biumvuija ne: bidi mua kupangisha difika ku bipeta bimpe pa kubueja bena Buddha mu dielangana mpata pa nkindi ya tshitendelelu tshiabu. Pamutu pa nanku, yukidilanganayi pa malu adi atangila bantu bonso ne adi mabimane ku muoyo.
4 Ela kashonyi pa malu adi akoka ntema ya muntu yonso: Bu mutu bena Buddha bafuanyikija misangu yonso muoyo wa pa buloba ne makenga, kuakula bua muoyo wa kashidi pa buloba kudi mua kubamuenekela bu bualu budi bubengangane ne lungenyi lujalame. Kadi, tuetu bonso tutu ne dijinga dia kuikala ne nsombelu wa disanka mu dîku, kumona makenga ajika ne kumanya tshidi muoyo umvuija. Mona mutudi mua kukoka ntema pa majinga aa a bantu bonso.
5 Udi mua kuteta mbuelelu eu:
▪ “Lelu’eu tudi mu buloba mudi bantu ba bungi badi kabayi benze bualu bakenga. Udiku wela meji ne: dimue dituku bisama ne makenga nebijike bua bantu bonso anyi? [Lekela muntu andamune.] Kudi dimue dilaya dia kale ditu dinkolesha ku muoyo bikole. [Bala Buakabuluibua 21:4.] Bushuwa, tshikondo atshi ki ntshianji kulua to, kadi paluatshi, netuanyishe bua kutshimona, ki mmuomu anyi?” Pashishe fila mukanda kampanda udi umvuija mushindu wajika makenga.
6 Udi mua kuambila muntu mukulakaje nunku:
▪ “Pamu’apa udi pebe uditatshisha bu meme bua bungi bua ngenyi mibi idi mitangalake mpindieu ne buenzeji buayi kudi bana batudi balele. Bua tshinyi nsombelu udi kayi wa tshitembu mmulue kutangalaka mushindu’eu munkatshi mua bansonga? [Lekela muntu andamune.] Uvuaku mumanye ne: mmalu avua madianjila kumanyisha mu mukanda uvuabu batuadije kufunda kalekale kumpala kua kuasabu tshitendelelu tshia ba-Mizilman, tshia bena Kristo ne bena Hindu anyi? [Bala 2 Timote 3:1-3.] Mona bua se: nsombelu eyi idi anu mitungunuke nansha mudi bantu balonga tulasa tua bungi. [Bala mvese 7.] Mukanda eu mmungambuluishe bua kumanya bulelela budi bantu ba bungi kabayi balonge nansha. Newanyishe bua kuubala anyi?” Fila mukanda anyi broshire muakanyine.
7 Bena Buddha batu pa tshibidilu banemeka Bible, bamuangata bu mukanda munsantu. Nunku ubale buludiludi mu Bible. (Eb. 4:12) Bikala muntu kayi musue nshidimukilu wa ku Mputu, muleje ne: bafundi ba Bible bonso bavua bena Asia.
8 Mmikanda kayi idi ipatula bipeta bimpe? Trakte wa Makenga kaadiakujikaku anyi? (Angl.), mmupatuila nangananga bena Buddha, udiku mu tshiena-Chine, tshiena-Japon, Cinghalais ne Thai. Kabidi, bamanyishi ba bungi mbayishe bimpe ne mikanda idi ilonda eyi: Nsapi wa disanka mu dîku, L’humanité à la recherche de Dieu ne Les jeunes s’interrogent—Réponses pratiques; ne broshire eyi: “Monayi, ndi mvuija bintu bionso bipiabipia” ne Quel est le but de la vie? Comment le découvrir?; ne bikalayiku, nudi mua kufila Ngumu ya Bukalenge No. 35, Bantu bonso nebananganganaku anyi? Bena Buddha ba bungi badi balonga bulelela mpindieu batu banji kulonga broshire wa Utulomba ne pashishe balua kulonga mukanda wa Dimanya.
9 Nansha mudibu bamba ne: ba-misionere ba bena Buddha bavua bafike ku Atena bidimu bu 400 bangabanga ne Paulo kuyishaye kuoku, kabiena bijadikibue bikalaye uvua mupeteku bantu bavua ne ngenyi ya bena Buddha to. Kadi, tudi bamanye muakumvua Paulo bua bidi bitangila kuyisha bantu ba mishindu yonso. Wakadivuija “mupika wa bonso” bua yeye “kusungilaku bamue ne munyi ne munyi.” (1 Kol. 9:19-23, Muanda Mulenga Lelu) Tudi mua kuenza bia muomumue pa kuleja ne: tudi tutabalela bantu ne pa kushindamena pa ditekemena dia muomumue ditudi nadi patudi tuyisha bantu bonso batudi tupetangana nabu.