Udi wenza mudimu ne tshipatshila anyi?
1 Yehowa n’Nzambi udi ne tshipatshila. (Yesh. 55:10, 11) Tudi bakankamijibue bua kumuidikija. (Ef. 5:1) Bushuwa tudi ne bua kuleja mutudi tumuidikija mu mushindu utudi tuenza mudimu wetu. Nunku lukonko elu nduakanyine: “Udi wenza mudimu ne tshipatshila anyi?”
2 Mudimu webe wa buambi bua ku nzubu ne ku nzubu, bua mu mpukapuka ne diabanya dia mikanda mbitupa bia mudimu wetu utudi tuenza ne tshipatshila. Kadi vuluka ne: mudimu udibu batupesha kawena anu wa kuyisha patupu kadi ng’wa kuenza bayidi kabidi. (Mat. 28:19, 20) Panyima pa bamane kukuna ntete ya bulelela bua Bukalenge, tudi ne bua kualukila bua kuyimiamina mâyi ne tuyitabalela pa tshibidilu eku tulomba Yehowa bua ayikoleshe. (1 Kol. 3:6) Tudi ne bua kutuma muoyo wetu mujima ku dienza makumbulula ne dituadija malonga a Bible.
3 Diundisha mudimu webe: Bitu bitamba kusankisha mutshima paudi ukudimuka bua kutangila mudimu uudi muenze ne udiambila munda munda ne: “Ndi mukumbaje tshimvua mupangadije bua kuenza.” Anu mudibu bafunde mu 2 Timote 4:5 (Mukanda wa Mvidi Mukulu), Paulo wakabela ne: “Ukumbaje bimpe mudimu webe.” Bidi biumvuija kuvudija madikolela ebe bua kulondakaja dijinga dionso dileja dia kumanya bia bungi. Mu ndongamu wa mudimu webe wa ku lumingu, longolola dîba dijadika dia kuenza makumbulula. Enza mudimu ne tshipatshila tshia kutuadija malonga a Bible ne bantu bena muoyo muakane. Ke tshidi ne bua kuikala tshipatshila tshiebe paudi upatuka mu buambi.
4 Konka bamanyishi bakuabu bua bakuambile muakumvuabu pakamonabu balongi babu ba Bible batambula mu mpuilu. Bavua ne disanka, pamu’apa dia mumue ne dia bavua batambule peshi mene dipite apu. Bavua bakumbaje tshipatshila tshinene bushuwa! Muanetu mukuabu muenji wa bayidi wakamba ne: “Kuenza bayidi kudi kumvuija kuvulangana kua basamunyi ba Yehowa. Kudi kumvuija muoyo bua badi bitaba bulelela. Ndi munange mudimu wa kulongesha bakuabu bulelela—mmudimu mulengele be! . . . Ba bungi ba ku badi bafike ku dinanga Yehowa mbalue kuikala balunda banyi banene.”
5 Elabi meji se: udi mufike ku diambuluisha muntu bua alue musadidi wa Yehowa mudilambule! Mbualu bua disanka be! Tshipeta tshia mushindu eu tshidi tshifumina ku dienza mudimu wa buambi ne tshipatshila.—Kolos. 4:17.