Vudija disanka diebe mu mudimu wa buambi

¹ Utuku umvua disanka dia kumanyisha lumu luimpe pautu mu buambi anyi? Tuetu katuyi badimuke to, bantu babi badi batunyunguluke badi mua kututshinyisha bua katuyishi, bafuane kutujimijila disanka dietu. Kuyisha muaba udi bantu kabayi bitaba malu atudi tubayisha kutu kutekeshangana mu mikolo. Mbidia kayi biakanyine bitudi mua kulonda bua kuvudija disanka dietu mu buambi?

² Ikala ne mmuenenu muimpe: Kuikala ne mmuenenu muimpe kudi kuambuluisha menemene. Umue mushindu wa kulama mmuenenu muimpe nkuikala kuelangana meji bua diakalenga dinene ditudi nadi dia kuikala ‘benzejanganyi ba mudimu ne Nzambi.’ (1 Kol. 3:9) Yezu pende udi netu mu dikumbaja dia mudimu eu. (Mat. 28:20) Ne udi utukuatshisha ne musumba munene wa banjelo. (Mat. 13:41, 49) Nunku tudi ne bua kuikala bashindike se: Nzambi udi ulombola bionso bitudi tuenza. (Buak. 14:6, 7) Nenku, katuyi tutangila mudi bamue bantu mua kuakidila mukenji utudi tubatuadila to, mudi ba mu diulu buobu bangata mudimu eu ke tshidi tshituenza disanka dia bungi!

³ Udilongolole bilenga: Didilongolola dimpe didi padi divudijija disanka dietu. Kudiakaja bua mudimu wa buambi kakutu kulomba mudimu wa mupitepite nansha. Bitu bituangata anu minite mikese bua kukonkonona amue malu a mu nimero mipiamipia ya bibejibeji anyi mukanda wa kufila bua ngondo au. Sungula mêyi mu tshiena-bualu tshia “Mushindu wa kufila bibejibeji,” mu Mudimu wetu wa Bukalenge. Tangila tshisakidila tshia Tshiongo 2002 mu tshiena-bualu tshia ne: “Ngenyi ya mushindu wa kutuadija diyikila ne bantu mu buambi,” anyi udi mu mukanda wa Comment raisonner ta broshire wa Mua kutuadija ne kutungunuka ne mayuki pa Bible bua kupeta mbuelelu milenga. Biwikala ne lutatu lua kuandamuna lukonko lutu bantu bajula pa tshibidilu bu tshipumbishi, longolola diandamuna didi dianyisha mêyi abu ne ukoka ntema yabu ku tshiena-bualu tshidi mua kubasankisha. Mukanda wa Comment raisonner udi mua kukuambuluisha bikole. Dienza mudimu ne biamu bia mudimu ebi neditupeshe dieyemena ditudi nadi dijinga bua kuyisha ne disanka.

⁴ Sambila ne muoyo mujima: Disambila didi diambuluisha bikole bua kuikala ne disanka diashala mutantshi mule. Bu mutudi tuenza mudimu wa Yehowa, tudi ne bua kumulomba nyuma wende, bualu dimue dia ku mamuma a nyuma wende ndisanka. (Gal. 5:22) Yehowa neatupeshe bukole bua kutungunuka ne kuyisha. (Filip. 4:13) Kusambila bua mudimu wetu kudi mua kutuambuluisha bua kulama meji mimpe dîba ditudi tupeta malu adi abungamija. (Bien. 13:52; 1 Pet. 4:13, 14) Tuetu bumvue bu badi batukuatshisha buôwa, disambila didi mua kutuambuluisha bua kunanukila ne dikima dionso ne disanka.​—Bien. 4:31.

⁵ Keba bikondo bia kuyisha: Bushuwa, mudimu wetu udi wenza disanka dia bungi patudi tufika ku dipeta bantu ne kubayisha. Kuakajilula programe webe bua kuyisha ku nzubu ne ku nzubu mu mêba mashilashilangane, pamu’apa ku dilolo menemene, kudi mua kukupatuila bipeta bimpe. Utu upetangana ne bantu dîba dionso mu njila, pautu uya mu tshisalu, paudi mu bise ta pautu uya kuendakana mu bipalu bia manaya. Bua tshinyi kubengaku kulongolola mêyi makese audi mua kutuadija nawu diyuki ne kuteta bua kuyikidisha baudi umona bamueneka ne ngikadilu wa bulunda? Peshi udi mua kuyishila muaba webe wa mudimu anyi mu kalasa, miaba iutu upeta mushindu wa kuyikila ne bakuabu dituku dionso. Udi mua kupeta mushindu wa kuyisha anu pa kujula bualu kampanda buimanyine pa tshiena-bualu kansanga tshia malu a mu Bible tshidi mua kusankisha bantu. Ngenyi mimpe ya kulonda idi mu tshisakidila tshia Mudimu wetu wa Bukalenge wa Tshiongo 2002 mu dibeji dia ntuadijilu. Didienzeja dionso dia nunku didi mua kuenza bia bungi bua kuvudijila muntu disanka mu mudimu wa buambi.

⁶ Tulamayi disanka, bualu didi dituambuluisha bua kutantamana. Patudi tulama disanka nunku’eu, netupete difutu dinene dîba diafika mudimu eu wikala kauyi mua kuenzeka kabidi ku ndekelu kuawu. Ditekemena bualu ebu nkayadi didi mua kutuvudijila disanka mu mudimu wa buambi.​—Mat. 25:21.