Diambuluisha mu tshikondo tshiakanyine

¹ Pavua mupostolo Petelo mumone ne: bivua bikengela kukolesha bena kuitabuja nende ku muoyo, dijinga edi diakamusaka bua kubavuluija ne dinanga dionso amue malu ne kubakankamija. (2 Pet. 1:12, 13; 3:1) Wakasengelela ‘bantu [bakapeta] ditabuja dia mushinga mukole’ bua batungunuke ne kukolesha ngikadilu yabu ya mu nyuma bua kabalu ‘batuke ne kabayi bapanga mamuma too ne ku dinanga dijalame dia Mukalenge wetu Yezu Kristo.’ (2 Pet. 1:1, 5-8) Petelo uvua ne tshipatshila tshia kubambuluisha bua bajadike dibikila divuabu bapete kudi Yehowa ne dibasungula diende, bua se: ‘babasangane mu ditalala kabayi ne katoba, kabayi ne kadiwu kudiye.’ (2 Pet. 1:10, 11; 3:14) Bua ba bungi, dikankamija diende divua diambuluisha edi diakafika mu tshikondo tshiakanyine.

² Lelu’eu, batangidi bena Kristo badi ne dijinga dia muomumue bua bantu ba Nzambi. Mu ‘bikondo bidi bikole mua kupita nabi’ ebi, basadidi ba Yehowa ba bungi badi ne bua kutantamena malu makole. (2 Tim. 3:1, NW) Pa kumona mudi ntatu ya mua kupeta makuta, ya mu mêku ne ya muntu nkayende mitungunuke amu kutungunuka, bakuabu badi mua kudiumvua bu muakadiumvua Davidi pakambaye ne: ‘Malu mabi adi kaayi mua kubadibua akunnyunguluka; mapambuka anyi a ku buakane akundonda, akumpeta, too ne pandi tshiyi mua kutangila. Adi atamba nsuki ya ku mutu kuanyi bungi; mutshima wanyi wakumpangishila bukole.’ (Mus. 40:12) Ntatu eyi idi mua kunemenena bantu abu bikole ne kutuadijabu kulengulula malu a mu nyuma adi ne mushinga mukole ne kulekelabu dipatuka mu mudimu wa buambi. Kadi nansha bikale ne ntatu ya mushindu kayi, ‘kabena bapua mikenji ya Yehowa muoyo.’ (Mus. 119:176) Mpindieu ke tshikondo tshikumbanyine tshia bakulu kuambuluishabu bantu ba nanku bu mudibi bikengela.​—Yesh. 32:1, 2.

³ Bua kukumbaja dijinga edi, badi bakankamija bakulu bua kuenzabu bukole bua pa buabu bua kuambuluisha batu kabayi ne tshibidilu tshia kupatuka mu mudimu wa buambi. Bakadi batuadije kuenza bukole buonso mpindieu bua kufika ku tshipatshila atshi, kabidi nebenze nunku too ne ku ndekelu wa ngondo muisatu. Badi balomba batangidi ba dilonga dia mukanda bua kukumbulabu bamanyishi badi kabatshiyi bayisha bua kubambuluisha mu nyuma ne tshipatshila tshia kubasaka ku dibanguluila dia mudimu wabu mu tshisumbu ne tshisumi. Badi mua kulongolola bua kuikala kulonga ne muntu ukavua mulekele kuyisha padibi bikengela. Badi mua kulomba bamanyishi bakuabu bua kufilabu pabu diambuluisha. Padibu bakulomba bua kuenza nanku, didifila diebe nediambuluishe bikole be, nangananga wewe ukankamija muntu ne muoyo muimpe ne umumvuila kabidi.

⁴ Tudi ne bua kusanka tuetu bonso patudi tumona muntu ubanguluila mudimu wende wa buambi mu tshisumbu. (Luka 15:6) Bukole butudi tuenza bua kukankamija bamanyishi badi kabatshiyi bayisha budi mua kulua kumueneka ne: buvua bushuwa bu ‘dîyi diamba mu tshikondo tshiakane.’​—Nsu. 25:11.