Yehowa ng’wa kutumbisha bikole menemene
Didia dia Mukalenge nedienzeke mu dia matuku 16 a ngondo muinayi
1 Mioyo idi anu kulu kulu bua pakadi dituku dia 16 dia ngondo muinayi 2003 dienda disemena pabuipi. Butuku abu netuvuluke lufu lua Yezu, tudisangisha ne batendeledi netu miliyo mivule ba pa buloba bujima bua kutumbisha dîna dia Yehowa. Yehowa mmukumbanyine bua tuetu kumutumbisha bualu mmufile mulambu wa kutupikula nawu. Ku diambuluisha diawu, neapeshe bantu bonso badi bamutumikila mabenesha a dikema. Tudi tuditua ne muoyo mujima mu diela mbila ne mufundi wa Misambu ne: “[Yehowa] udi munene ne wa kutumbisha bipite.”—Mus. 145:3, Mukanda wa Mvidi Mukulu [Katolike, MMM].
2 Tshikondo etshi ntshia kuelela meji pa bulenga bua Nzambi ne dibanza ditudi nadi kudi Yehowa dia kumuleja dianyisha bua mudiye ‘mutume muanende umu’epele pa buloba bua tuetu tuikale ne muoyo bua bualu buende.’ (1 Yone 4:9, 10) Dibuela mu musekelelu wa Didia dia Mukalenge didi dishindamija mu mioyo yetu lungenyi lua ne: “Yehowa udi ne dinanga ne luse, . . . udi ne luse lujalame lua bungi.” (Mus. 145:8) Bushuwa, mulambu wa kutupikula nawu ke mushindu mutambe bunene udi Yehowa muleje bantu bonso dinanga. (Yone 3:16) Patudi tuelela meji pa dinanga dia Nzambi ne tutangila nsombelu wa lulamatu wa Yezu, bidi bitusaka bua kutumbisha Yehowa. Too ne ku bikondo kabiyi ndekelu, netutungunuke ne kumutumbisha bua dinanga diende dia bungi didiye muleje mu ditunzuluila njila wa muoyo wa kashidi.—Mus. 145:1, 2.
3 Ambuluisha bakuabu bua kutumbishabu Yehowa: Dianyisha bua dipa dipite bunene dia mulambu wa tshia-bupikudi wa Nzambi didi ditusaka bua kubikila bakuabu bua balue kudisangisha netu bua kutumbisha Yehowa. Mufundi wa Misambu uvua musaka kudi nyuma pakufunda ne: “Bantu nebavuluke bulenga buebe kabuyi kuamba, batumbishe buakane buebe.” (Mus. 145:7, MMM) Bua tshidimu tshishale nkayatshi, Bantemu ba Yehowa bavua bapitshishe mêba mapite pa muliyare umue mu mudimu wa buambi. Mbipeta kayi bia kapatuka ku madikolela abu? Ku lumingu luonso, kuvua muayene wa bantu bapite pa 5 100 bavua batambula bua kuleja diditshipa diabu kudi Yehowa. Ne bungi busanga bua bavua babuele mu Tshivulukilu buvua bua bantu 15 597 746, munkatshi muabu mudi bantu bapite pa miliyo 9 badi kabayi banji kutuadija kutumbisha Yehowa bu bamanyishi ba lumu luimpe, bidi bileja muikalaku didiunda mu matuku atshilualua! Tuetu bamanyishi ba Bukalenge tudi tuanyisha bikole diakalenge ditudi nadi dia kuyisha lumu luimpe ne kukoka mioyo ya bantu bakuabu kudi Yehowa, kudi Muanende ne Bukalenge buende.
4 Mushindu mulenga wa kukankamija bakuabu bua kutumbisha Yehowa ng’wa kubabikila bua balue kusekelela pamue netu Didia dia Mukalenge. Ukadiku mufunde mêna a bantu baudi musue kubikila ne a bakuabu badi mua kuikala ne dijinga dia kubavuluija dituku ne dîba anyi? Ukadi mupeshe bantu bonso baudi mufunde mêna abu tubeji tua dibikila anyi? Biwikala kuyi muanji kubapesha, udi mua kuenza lukasa mu tshikondo tshidi tshishale etshi. Bambuluisha bua kumvuabu tshipatshila tshia musekelelu eu. Dituku dia Tshivulukilu, wikala mudiakaje bua kuela benyi muoyo. Nubakidile bilenga, nubamanyishe kudi bakuabu ne nubele kalumbandi bua mudibu balue.
5 Dibuela mu Tshivulukilu didi mua kusaka bapiabapia bua kuela bidia kuya kumpala mu nyuma. Mulongi wa Bible mukuabu uvua ne buôwa bufumine ku bualu bubi buvuabu bumuenzele ne bumushiye kayi nansha mua kufika muaba udi bantu ba bungi, wakalua mu Tshivulukilu. Pakamukonkabu meji avuaye nau bua tshisangilu atshi, wakamba ne: “Divua dilolo dinsantu menemene ne meme panyi mvuamu.” Kubangila anu musangu au, wakabanga kubuela mu bisangilu.
6 Panyima pa Tshivulukilu: Tshia kuenza ntshinyi bua kuambuluisha bantu aba badi banyisha bulelela bua kuluabu basamunyi ba Yehowa? Bakulu badi ne bua kutabalela bantu bapiabapia bavua babuele mu Tshivulukilu ne kulongolola malu bua bamanyishi bapiluke baye diakamue kubatangila bua kubavuluija malu avuabu bamone mu Tshivulukilu patshidiwu mu mutu. Bamue ba kudibu badi mua kujinga bua kulonga Bible ku nzubu. Nudi mua kubabikila bua kubuelabu mu bisangilu bionso bia ku lumingu bia tshisumbu, bualu dibuelamu didi mua kuvudija dimanya diabu dia Bible.
7 Badi benda balongolola malu bua kukankamija bantu badi kabayi bayisha pa tshibidilu ne bakadi mene balekele kuyisha bua bikale babuela mu bisangilu bionso pa tshibidilu. Bikala bakulu bakulomba bua kuambuluisha muntu kampanda ukadi mulekele diyisha bua kutuadijilula mudimu wa buambi, anyisha bua kuenza mudibu bakulombe. Kuditatshisha ne dinanga mushindu eu bua bana betu kudi kupetangana ne mubelu wa mupostolo Paulo wa ne: “Nenku, patutshidi ne diba apa, tuenzelayi bantu bonso bimpe, kadi nangananga bana betu mu ditaba.”—Gal. 6:10, MMM.
8 Tuenzayi muetu muonso bua kuikalaku bonso mu dia matuku 16 a ngondo muinayi bua Tshivulukilu. Katuanyishi bua kupitshisha tshikondo etshi tshia tshijila menemene tshia kutumbisha Yehowa. Eyowa, mpindieu too ne kashidi, tutungunukayi ne kutumbisha Yehowa bua midimu yende minene!—Mus. 145:21.