Mukanda wa kudi Biro

Bamanyishi ba Bukalenge basuibue,

‘Nzambi wakabidiundisha.’ (1 Kol. 3:6) Mmushindu kayipu udibi bienza disanka pa kumona didiunda dia mudimu wa buambi mu teritware wetu wa Congo yetu yonso ibidi! Mu tshidimu tshia mudimu tshia 2003, tudi batuadije malonga a Bible mapiamapia mapite pa 100 000. Bua bualu ebu tudi tunuela kalumbadi.

Yehowa udi wenda ubenesha mudimu utudi tuenza muetu munu mudi bantu bakula miakulu kabukabu. Bua kufika ku dipatula mikanda ya bungi mu imue ya ku miakulu ya mu teritware wetu, Kasumbu Kaludiki nkunzulule biro bibidi bia dikudimuna dia mikanda yetu. Biro bimue bidi ku Lubumbashi, ku Katanga bua tusumbu tua bakudimunyi ba muakulu wa Tshiluba tshia lolo ne wa Tshiena lunda, ne biro bikuabu bidi ku Mbuji Mayi mu Kasaï Oriental, mu R.D.C. bua tusumbu tua bakudimunyi ba muakulu wa Tshitetela ne wa Tshiluba. Biro bibidi ebi mmbitupa bia Betele wetu ne bionso bidi bienzekamu anu mutu Betele wenda. Tshipatshila tshitudi batumine tusumbu tua bakudimunyi etu miaba eyi ntshia kuambuluisha bakudimunyi bua bikale pabuipi menemene ne bantu badi bakula muakulu udibu bakudimuna.

Bua kuikala ne mikanda bungi bukumbane pa buloba bujima, mbalabaje miaba idi biapu bietu bia dipatula nabi mikanda bidi ku Ferme ya Société Watchtower, pabuipi ne Wallkill, mu New York. Malu adi enda bimpe padibu basakidile tshipapu tshia ektare umue ne bitupa binayi ku tshiapu tshia mikanda etshi. Tshipapu tshidibu basakidile etshi tshidi bunene bumue ne Nzubu wa Bukalenge wa bunene bukumbanyine misangu 30! Mbalongolole bua kuasa biamu binene bibidi bia mpolondo bia dipatuila mikanda mu ngondo ya kumpala ya tshidimu tshia 2004. Tshiamu tshionso netshikale ne bua kupatula bibejibeji 25 mu sekonde umuepele. Mu tshidimu tshia 2004 nebase kabidi biamu bipiabipia bia dilamakajila mikanda ne bia diabanya dia mikanda ya kutumina bisumbu. Nanku nebilombe anu bantu bakese tshianana bua kupatula mikanda ya bungi ne kuyituma.

Bu mutukadi batuadije tshidimu tshia mudimu tshia 2004 etshi, tudi tudisanga kunudi ne tusambila bua Yehowa ‘atungunuke ne kubidiundisha.’

Bana benu,

Biro bia filiale wa Congo-Kinshasa