Meji a kudi Nzambi mmalenga matambe
1 Bamue bantu batu bela meji ne: Bantemu ba Yehowa badi ne bua kuikala batamba kuditatshisha bua kukepeshaku ntatu idi nayi bantu lelu. Bantu ba mushindu eu mbapangile bua kumona mushinga udi nawu mudimu wetu wa dilongesha dia malu a mu Bible. Bidi anu bu muvua mupostolo Paulo mufunde ne: ‘Bualu bua kuamba bua mutshi [wa makenga] kudi bualu bupote kudi bantu batshidi bajimina; kadi kudi bukole bua Nzambi kudi tuetu batshidi basungidibua.’ (1 Kol. 1:18) Bushuwa, tudi bamanye bimpe ne: mudimu udi bena Kristo benza ke mudimu udi ne mushinga mutambe wa midimu yonso idi bantu benza lelu eu pa buloba.
2 Nsombelu mulenga mpindieu: Madikolela adi bantu benza lelu bua kujikija ntatu idiku mmapatule anu bipete bimpe ndambu patupu. Mikenji idi ikandika malu a tshikisu ki mimanyike divulangana dia malu a tshikisu nansha. Ndondo mitua bua ditalala ne bisumbu bia basalayi badibu bateka bua kufila ditalala ki mbijikije mvita to. Bisumbu bienza bua kuambuluisha bantu mbipangile bua kujikija bupele. (Mus. 146:3, 4; Yel. 8:9) Kadi mukenji wa Bukalenge bua Nzambi wuowu mmukudimune nsombelu wa bantu miliyo mivule pa kubambuluisha bua kuvuala bumuntu bupiabupia budi Nzambi witaba. (Lomo 12:2; Kolos. 3:9, 10) Padi bantu aba bavuala bumuntu ebu, badi ne nsombelu mulenga kubangila anu ku lelu.—1 Tim. 4:8.
3 Matuku atshilualua malenga: Pa kumbusha dituambuluisha bua kupita bimpe ne ntatu ya buatshia buila, meji a Nzambi adi atuambuluisha kabidi bua kulongolola bimpe malu bua matuku adi alua. (Mus. 119:105) Adi atuepula ku diditatshisha patupu bua kuakajilula nsombelu mu ndongoluelu wa malu eu. (Muam. 1:15; Lomo 8:20) Tudi ne disanka dia bungi bua mutudi katuyi tunaya ne muoyo wetu pa kuipatshila malu adi kaayi mua kukumbana nansha kakese. Kadi bionso bitudi tuenza mbishindamene anu pa dilaya dia bushuwa dia Yehowa dia kuenza “diulu dipiadipia ne buloba bupiabupia” muikala buakane. Palua dituku dia dilumbuluisha dia Yehowa, apu nebimueneke patoke ne: aba badi beyemene meji a Nzambi bavua bangate dipangadika dimpe.—2 Pet. 3:10-13; Mus. 37:34.
4 Nansha mudi meji a Nzambi mua kumueneka bu kaena ne mushinga kudi bantu badi badine ne kasuki mu ‘meji a tshikondo etshi,’ kadi meji a Nzambi wuowo ke njila umuepele mukumbane wa kulonda. (1 Kol. 1:21; 2:6-8) Nunku, tudi tutungunuka ne kuyisha mukenji wa Nzambi “muena meji umuepele” mu buloba bujima.—Lomo 16:27, Mukanda wa Mvidi Mukulu [Katolike, MMM].