Ikala ne meji a buena a Yezu
1. Mmeji kayi avua Yezu muleje?
1 Nansha mutudi katuyi banji kumona Muana wa Nzambi, tudi bafike ku dimunanga ku diambuluisha dia malu adibu bafunde pa nsombelu wende ne a mudimu wende pa buloba. (1 Pet. 1:8) Bua kukumbaja disua dia Tatuende, wakashiya muaba wende wa butumbi mu diulu ne kulua pa buloba. Pakafikaye pa buloba, wakakuatshila bakuabu mudimu, e kufila muoyo wende bua bantu. (Mat. 20:28) Dîyi dia Nzambi didi ditulomba ne: ‘Nuikale ne meji aa munda muenu akadi kabidi munda mua Kristo Yezu.’ Mmunyi mutudi mua kuidikija lungenyi luende lua didifila?—Filip. 2:5-8.
2. Ndutatu kayi lutu bena Kristo bavule bapeta, ne ntshinyi tshidi mua kubambuluisha bua kulujikija?
2 Pavuaye udiumvua mupungile: Nansha muvua Yezu mupuangane, uvua upungila. Dikuabu dituku, pakavuaye “mupungile ne luendu,” wakayisha muntu mukaji muena Samalea bikole. (Yone 4:6, Muanda Mulenga Lelu) Bena Kristo ba bungi lelu’eu batu pabu bapungila bia muomumue. Ku ndekelu kua lumingu lujima lua mudimu mukole, bidi mua kuikala bualu bukole bua kupeta makanda a kuenza nawu mudimu wa buambi. Kadi tuetu tuyisha misangu yonso, netumone se: mudimu eu udi utukolesha mu nyuma.—Yone 4:32-34.
3. Mmushindu kayi utudi mua kuidikija didifila dia Yezu bua kulongesha?
3 Dituku dikuabu, Yezu ne bayidi bende bavua bakeba muaba wa pa nkayabu bua kuikisha tshitupa tshîpi. Kadi, bantu musumba munene bakabamona e kudianjilabu kumpala kuabu. Pamutu pa kufikaye munda, Yezu ‘wakadi nabu luse’ ne wakabanga ‘kubayisha malu a bungi.’ (Mâko 6:30-34) Kutuadija kulonga Bible ne bantu kudi kulomba kuikala ne mmuenenu wa muomumue. Bidi bikengela kudienzeja bikole ne kunanga bantu bikole. Wewe kuyi ne muntu uudi ulonga nende Bible mpindieu, kuteketshi mu mikolo bua kutungunuka ne dikeba wa kulonga nende to.
4. Mmunyi mudi mudimu wa bumpanda-njila buambuluishi mua kutufikisha ku dikala ne meji a buena a Kristo?
4 Teka malu a mu nyuma pa muaba wa kumpala: Mudimu wa bumpanda-njila buambuluishi udi mua kutuambuluisha bua kutuma meji etu ku malu a mu nyuma. Muanetu wa bakaji mukuabu utshidi nsonga wakafunda ne: “Mamu’ende wa mulunda wanyi mukuabu wakatukankamija bua kuenza nende mudimu wa bumpanda-njila buambuluishi ngondo umue. Ndi ne disanka dia bungi bu mutuakenza nende mudimu au. Mvua ne disanka dia kumanyangana ne bana betu ba balume ne ba bakaji, ne bakalua bu bena mu dîku dietu kunyima kua matuku makese. Mvua kabidi ne disanka dia kupeta mushindu wa kuambila bakuabu malu adi atangila Yehowa ne kubalongesha malu malelela a Bukalenge. Bionso ebi bivua binsemeja pabuipi ne Yehowa ne bulongolodi buende.”—Mus. 34:8.
5. Bua tshinyi tudi ne bua kutungunuka ne kuenza muetu muonso bua kuikala ne meji a buena a Yezu?
5 Tuetu bonso tudi mu mvita idi yenzeka pankatshi pa mubidi wetu mupange bupuangane ne dijinga dietu dia kusankisha Yehowa. (Lomo 7:21-23) Tudi ne bua kuenza muetu muonso mua kuenza bua kukandamena lungenyi lua bantu lua dibenga kudienzeja. (Mat. 16:22, 23) Yehowa udi mua kutuambuluisha bua kutshimuna mu mvita eyi ku diambuluisha dia nyuma muimpe. (Gal. 5:16, 17) Bu mutudi bashale bindile lupandu luetu bua kubuela mu bulongolodi buakane bua Nzambi, tutungunuke ne kuikala ne meji a buena a Yezu pa kuteka malu a Bukalenge ne a bakuabu kumpala kua etu.—Mat. 6:33; Lomo 15:1-3.