Utu webeja mulongi webe mêna a bantu bakuabu anyi?

Biwikale ulonga Bible ne muntu patudi tuakula apa, kuenaku mua kumukonka ni udiku ne balunda bende, balela anyi bamanyangana nabu badi ne dijinga dia kumanya tshidi Bible wamba anyi? Wewe muebeje balongi ba Bible nebakutelele mêna a bantu ba bungi badibu bamanye. Udi mua kulomba mulongi bua itabe bua wewe kutela dîna diende paudi uya kuambila bantu aba bua kulonga nabu Bible. Udi mua kuamba ne: “[Tela dîna diende] mmuitabe bua kulonga Bible ne udi wela meji ne: wewe pebe udi mua kubuela mu programe wetu wa dilonga Bible eu.” Pashishe muleja mu tshikoso mutu dilonga edi dienzeka ne mukanda wa Bible ulongesha.

Bikala muntu uudi ulonga nende Bible wenda uya kumpala bimpe, udi mua kumulomba bua kumvuija balunda bende anyi bena mu dîku diabu mutu dilonga edi dienzeka. Abalombe bua kuluabu kuteleja paudi ulonga nende. Anyi udi mua kukuambila bua wewe kumonangana nabu bua kubaleja mutu dilonga edi dienzeka. Wewe muenze nunku, newambuluishe mulongi wa Bible bua kutuadija kuambila pende bakuabu bidiye ulonga.

Bantu bautu uya kutangila misangu ya bungi badi kabidi mua kukuambuluisha bua kupeta bakuabu nansha bikalabu bobu kabayi banji kuitaba bua kulonga Bible. Patudi tupesha muntu mukanda wa Bible ulongesha, tudi mua kumuebeja ne: “Udiku mumanye muntu mukuabu udi musue kupeta mukanda eu anyi?”

Bu mudi dîba dishale anu dikese, tudi ne bua kubuelela pa mpunga yonso udi umueneka bua kuambuluisha bantu bua bumvue lumu luimpe ne baluitabe. Utu webeja mulongi webe mêna a bantu bakuabu anyi?