Mishindu itanu ya kupeta dilonga dia Bible
1. Biobi bikukolele bua kupeta wa kulonga nende Bible, udi ne bua kuenza tshinyi? Bua tshinyi kuenza nanku?
1 Mbikukolele bua kupeta muntu wa kulongesha Bible anyi? Ikala anu ukeba. Yehowa utu ubenesha bantu batu kabayi balekela kuenza disua diende. (Gal. 6:9) Tangila mishindu itanu idi mua kukuambuluisha.
2. Leja mutudi mua kuenza bua kutuadija dilonga ne muntu diakamue.
2 Kulomba muntu diakamue: Bantu ba bungi batu bamanye ne: tutu tufila Tshibumba tshia Nsentedi ne Réveillez-vous! Kadi kabatu bamanye ne: tutu tulomba bantu bua kubalongesha Bible to. Bua tshinyi kubenga kulomba bantu bua kulonga nabu Bible paudi uyisha ku nzubu ne ku nzubu? Udi kabidi mua kuebeja bantu badi banyisha bulelela bautu utangila bikalabu basue kulonga Bible. Bobu kabayi bitabe, utungunuke ne kubashila anu mikanda ne kukolesha dijinga diabu dia kumanya malu. Tshilejilu, muanetu wa balume kampanda uvua ushila bena dibaka bakuabu bibejibeji munkatshi mua bidimu bia bungi. Kadi dimue dituku, yeye mumane kubapesha nimero mipiamipia, lungenyi luakamuluila bua kubebeja ne: “Kanuenaku basue kulonga Bible anyi?” Bobu kuitaba ne: Tudi basue; biakamukemesha be! Lelu eu bakadi batambule.
3. Mbimpe kuela meji ne: bantu bonso batu babuela mu bisangilu batu balonga Bible anyi? Umvuija.
3 Badi babuela mu bisangilu: Kuedi meji ne: bantu bonso batu babuela mu bisangilu batu balonga Bible to. Tshilejilu, tangila tshiakamba muanetu wa balume mukuabu: “Kupita pa tshia bibidi tshia balongi banyi ba Bible ntu mubapetele ku diyikila ne bantu batu babuela mu bisangilu.” Muanetu wa bakaji mukuabu wakaya kuyikila ne mamuende wa bana ba bakaji bakavua batambule mu tshisumbu tshiabu. Mu bidimu 15, mamu eu uvua ufika ku Nzubu wa Bukalenge anu pakavua bisangilu bisua kutuadija, upatuka diakamue pavua disambila dijika. Mamu eu wakitaba bua kulonga, yeye kulua kutambula. Muanetu wa bakaji au wakafunda wamba ne: “Pandi mvuluka ne: mvua muanji kuindila bidimu 15 bua kushisha kumulomba bua kulonga Bible, ndi ngumvua bibi be!”
4. Leja mutudi mua kupeta mulongi wa Bible mu diebeja bakuabu.
4 Ebeja bantu bakuabu: Munga muanetu wa bakaji utu uditatshisha bua kuya kufila bakuabu mu malonda abu a Bible. Patubu bajikija kulonga, utu ulomba dianyisha kudi mulongeshi bua kuebeja mulongi ni udi mumanye bantu bakuabu batu basue pabu kulonga Bible. Tangila tshiudi mua kuenza paudi upesha muntu mukanda wa Bible ulongesha; udi mua kumuebeja ne: “Kuenaku mumanye mukuabu muntu udi ukeba pende mukanda eu anyi?” Imue misangu, bamue bamanyishi ne bampanda-njila kabatu ne dîba dia kulonga ne muntu kampanda udibu bapetangana nende to. Nanku, ikala wambila bantu bakuabu ne: udi ukeba muntu wa kulongesha Bible.
5. Bua tshinyi mbimpe kuebeja muena dibaka udi kayi Ntemu ni mmusue kulonga Bible?
5 Bena dibaka badi kabayi Bantemu: Mu tshisumbu tshienu mudiku bana betu badi ne bena dibaka nabu kabayi bena Kristo anyi? Bamue bantu kabatu bitaba bua kuyikila malu a Nzambi ne bena dibaka nabu to; kadi bitaba anu bua bantu bakuabu. Bua kumanya tshidi tshimpe bua kuenza, anji yikila ne muena dibaka udi muena Kristo.
6. Mmushinga kayi udi nawu disambila patudi tukeba muntu wa kulonga nende?
6 Disambila: Kupepeji bukole bua disambila to. (Yak. 5:16) Yehowa udi wamba ne: udi uteleja masambila etu anu padiwu umvuangana ne disua diende. (1 Yone 5:14) Tshilejilu, muanetu wa balume kampanda uvua kayi ne dîba bua midimu ivuaye nayi, wakasambila bua kupeta dilonga dia Bible. Mukajende kudiebejaye ne: Nangananga pikala mulongi wa Bible mua kupeta ntatu, bayanyi eu neapete dîba dia kuikala umutabalela anyi? Mukajende kusambilaye pende Yehowa bua bayende apete muntu wa kulonga nende. Mbingu mitue ku ibidi pashishe, Yehowa wakandamuna masambila abu pavua mpanda-njila kampanda mupeshe muanetu wa balume au muntu uvuaye mumone mu tshisumbu muikale ne dijinga dia kulonga Bible. Mukajende wakafunda ne: “Mbimpe muntu yonso udi mua kumona kulombola dilonga dia Bible bu bualu bukole atungunuke ne kusambila Yehowa bua bualu abu. Tudi ne disanka dia bungi dituvua katuyi mua kuelela meji to.” Nuenu bananukile, nenupete penu muntu wa kulonga nende, pashishe nenudimuenene disanka dia kuambuluisha muntu bua kubuelaye mu “njila udi ufikisha ku muoyo.”—Mat. 7:13, 14.