Muntu udi bakulumpe ne bana mua kuidikija

Noa uvua mudie bulunda bukole ne Nzambi. Wakadifila bua kuenza disua dia Yehowa ne muoyo mujima. Noa wakapeta masanka a bungi bualu ‘wakenda ne Nzambi.’ Noa mmuntu utudi tuetu bonso, bakulumpe ne bana mua kuidikija. (Gen. 6:9) Ditadi anyi bande wa video wa: Noé: il marchait avec Dieu, nedituambuluishe bua kumanya nsombelu uvua nende Noa, kumanya bua tshinyi Yehowa wakamubenesha ne mushindu utudi mua kuidikija ngikadilu yende milenga.

Ditadi dia Noé didi ne nkonko ya kuandamuna. Tangila ditadi edi, ne pashishe diela nkonko eyi: (1) Mbualu kayi bubi buvua banjelu benze? Ba Nefilime bavua banganyi? (Gen. 6:1, 2, 4) (2) Bua tshinyi bantu bakalua benji ba malu mabi ba katshia? Nzambi wakadiumvua bishi bua bualu ebu? (Gen. 6:4-6) (3) Noa uvua mushilangane ne bantu bakuabu ku tshinyi? (Gen. 6:22) (4) Ntshinyi tshivuabu ne bua kubutula natshi bantu babi? (Gen. 6:17) (5) Buatu bua Noa buvua bunene kayi? (Gen. 6:15) (6) Mmudimu kayi mukuabu uvua Noa wenza? Kadi bantu bavua baumone munyi? (Mat. 24:38, 39; 2 Pet. 2:5) (7) Bavua babueje nyama inga pa mushindu wa nyama ne nyama wonso mu buatu? (Gen. 7:2, 3, 8, 9) (8) Mvula wakaloka matuku anga? Mâyi akashala matengabale pa buloba munda mua matuku bungi kayi? (Gen. 7:11, 12; 8:3, 4) (9) Bua tshinyi Noa ne dîku diende kabakafua ku mvula au? (Gen. 6:18, 22; 7:5) (10) Buatu buakaya kuimana penyi? (Gen. 8:4) (11) Mmunyi muakamanya Noa ne: mpindieu udi mua kupatuka mu buatu? (Gen. 8:6-12) (12) Noa wakenza tshinganyi pakapatukaye mu buatu? (Gen. 8:20-22) (13) Padi muanza-nkongolo ujuka bidi biumvuija tshinyi? (Gen. 9:8-16) (14) ‘Kuenda ne Nzambi’ kudi kumvuija tshinyi? (Gen. 6:9, 22; 7:5) (15) Tuenze tshinyi bua tuetu kumonangana ne Noa mu Mparadizu? (Mat. 28:19, 20; 1 Pet. 2:21)

Ntshinyi tshidi muyuki wa Noa ukulongesha pa mushindu uudi mua ‘kuenda ne Nzambi’ ne kuikala mushindike ne: Yehowa udi ne bukole bua kusungila bantu badi bamuenzela mudimu mu matuku etu aa?​—Gen. 7:1; Nsu. 10:16; Eb. 11:7; 2 Pet. 2:9.