Longesha mu mêyi mapepele
1. Ntshinyi tshidi ne mushinga patudi tujinga bua kulongesha bimpe?
1 Diakula mêyi mapepele didi ne mushinga wa bungi patudi tujinga bua kulongesha bantu bimpe menemene. Tuetu balonge bimpe tshilejilu tshia Mulongeshi Munene Yezu, netumanye mua kuakaja “diyisha” dietu.—2 Tim. 4:2; Yone 13:13.
2. Ntshinyi tshitudi ne bua kuikala bamanye patudi tulongesha mu miaku mipepele? Patudi tuenza nunku netupete tshinyi?
2 Akula mu mêyi mapepele: Mu muyuki uvua Yezu muenze wa pa mukuna mudi mêyi a mushinga mukole adi muntu nansha umue kayi muanji kupatula, makula mu mêyi mapepele. (Mat., nshap. 5-7) ‘Diyisha dia Yezu divua dikemesha bantu’ bavua bamuteleje bikole. Bantu bavuabu batume bua kumukuata bakafika ku diamba ne: ‘Kakuakadi muntu kale too ne katataka wakakula bu mudi muntu eu wakula.’ (Mat. 7:28, 29; Yone 7:46) Katuena anu dijinga ne kuakula ne dîyi dikole, kuakula miaku mikole peshi kumvuija malu a bungi bua bantu kutelejabu bulelela nansha. Tudi mua kulongesha bantu bulelela mu mêyi ne miaku mipepele.
3. Bua tshinyi bamue batu bajinga kuambila bateleji babu malu mapitepite bungi? Tshia kuenza ntshinyi bua kuepuka bualu ebu?
3 Tshintshikila bungi bua mêyi: Yezu uvua utangila tshipimu tshia bantu bavua bamuteleja bua kutshintshikila bungi bua malu avuaye ne bua kubambila. (Yone 16:12) Tudi ne bua kumanya batudi tulongesha ne kubalongesha bilondeshile tshidi muntu ne muntu, nangananga patudi tuyisha balela betu, bantu bapiabapia badi batuadijilaku kulonga bulelela anyi bana. Katuena mua kubalongesha malu mapitepite bungi nansha bobu bamueneka bu badi batuteleja ne ntema. Bantu ba muoyo muimpe nebatungunuke ne kulonga bua kupeta dimanya dia Nzambi mulelela Yehowa.—Yone 17:3; 1 Kol. 3:6.
4. Bua tshinyi mbimpe kuimanyina pa malu a mushinga pamutu pa kuakula adibu kabayi batele mu dilonga?
4 Wimanyine pa malu a mushinga: Yezu kavua ukolesha malu avuaye ulongesha ne mumvuija mapitepite bungi to. Tshilejilu, dîba diakambaye ne: ‘Bonso badi mu nkita nebajuke,’ kadivua dîba divuaye mua kumvuija miaba ibidi yasombela bantu babishibua nansha. (Yone 5:28, 29) Patudi tulongesha bantu Bible, tudi ne bua kuimanyina pa malu a mushinga ne kubenga kuakula malu adi kaayi ne mushinga adibu kabayi batele mu dilonga.
5. Patudi tuyisha mu mêyi mapepele tudi tupeta tshinyi?
5 Tudi ne disanka bua mudi Yehowa utulongesha malu onso atudi basue kumanya mu mêyi mapepele. (Mat. 11:25) Tudienzeje bua kuikala kulongesha mu mêyi mapepele ne tumvua disanka padi mudimu wetu upatula bipeta bimpe.