Malu asatu bua kulengeja nyishilu wetu
1. Tudi ne bua kukeba bua kulengeja mushindu utudi tuyisha bua tshinyi?
1 Bena Kristo bonso batu balongeshi ba Dîyi dia Nzambi. Patutu tuyisha muntu bua musangu wa kumpala, tumupinganyina anyi tulonga nende Bible, tudi tumumanyisha malu. Malu au atu mashilangane ne makuabu onso. Bualu tutu tukenkesha butoke bua mu “Mukanda wa Nzambi.” Mukanda eu udi mua kuvuija muntu ‘muena meji too ne ku lupandu.’ (2 Tim. 3:15) Ndiakalengapu kayi bunene nunku! Tangila malu asatu a kuenza bua kulengeja nyishilu webe.
2. Tudi mua kuenza tshinyi bua kupepeja malu patudi tulongesha?
2 Pepeja malu: Patu muntu mumanye bimpe tshintu kampanda, katu umona muditshi mua kukolela mukuabu muntu to. Nunku, paudi ulonga Bible ne muntu, kumuambidi malu mapitepite bungi to. Wimanyine pa malu manene. Kuakula bia bungi ki nkumanya kulongesha bimpe to. (Nsu. 10:19) Mbimpe kutamba kubala anu mvese minene. Bobu bamane kubala mvese, wimanyine anu pa katupa ka mvese kadi kumvuangana ne bualu bunudi nuyikila. Tshilejilu, mu Muyuki wa pa Mukuna wakenza Yezu (mu Mat. nshap. 5-7), Yezu udi wakula bua malu male a Nzambi mu ngakuilu mupepele, mu miaku mikese misungla bimpe.
3. Bilejilu bitu ne mushinga kayi? Mbilejilu kayi bitu bitambe buimpe?
3 Fila bilejilu: Bilejilu bitu bisaka muntu bua kuela meji, bimulenga ku mutshima, bimuambuluisha bua kuvuluka malu lukasa. Kuedi meji ne: bua kufila bilejilu, udi ne bua kuikala anu bu muedi wa nsumuinu. Bualu misangu ya bungi, Yezu uvua ufila bilejilu bîpi, bikale biumvuika bimpe. (Mat. 7:3-5; 18:2-4) Bimfuanyi bizola kakese pa dibeji, bidi pabi mua kuambuluisha muntu bikole. Wewe udilongolola bimpe, neupete bilejilu bimpe.
4. Leja mutudi mua kuenza mudimu bimpe ne nkonko.
4 Ela nkonko: Nkonko itu ilomba mulongi bua kuela meji. Nanku paudi wela lukonko, mbimpe kushala muindile. Wewe udiandamuina lukonko lukasa, kuakumanya menemene bikala mulongi mulumvue anyi kayi mulumvue to. Padiye ufila diandamuna dia tshianana, kumupeshi anu diandamuna dilelela to; kadi umuele nkonko mikuabu idi mua kumufikisha ku diandamuna adi. (Mat. 17:24-27) Nansha nanku, tuetu bonso tutu tuenza bilema patutu tulongesha. Ke bualu kayi Bible udi utulomba bua kuikala kukonkonona ndongeshilu wetu dîba dionso. Kuenza nunku nekutupeteshe tuetu ne batudi tuyisha malu mimpe bua kashidi.—1 Tim. 4:16.