Bua ntete kutoloka ne kukola, anu bayele mâyi
1. Ntshinyi tshitudi ne bua kuela mâyi bua kukolatshi?
1 Bua ntete idibu bakuna kutoloka ne kukolayi, bitu bikengela kuyela mâyi. Bidi mushindu umue kabidi bua ntete ya bulelela itutu tukuna mu mitshima ya bantu ba mu teritware wetu. (1 Kol. 3:6) Bua yoyi kuela miji, kukola ne kudiundayi, tudi ne bua kuenza makumbula mapiamapia, kuyimiamina Dîyi dia Nzambi.
2. Tudi mua kuenza tshinyi bua kujula muntu dijinga dia malu atuikala mua kulua kuyikila?
2 Jula lukonko: Paudi udilongolola bua mushindu wa kuasa muyuki, kuenaku mua kukeba kabidi lukonko lua wewe kulua kuandamuna mu dikumbula dipiadipia anyi? Ulujule ku ndekelu kua muyuki wenu. Numvuangane dituku ne dîba dia kulua kuluandamuna. Ba bungi batu basungula bualu bua mu mukanda wa Bible ulongesha bua bobu kulua kumona mua kuleja muntu mututu tulonga Bible ne bantu.
3. Tela malu atudi mua kufunda.
3 Funda malu: Kunengakanyi bua kufunda malu onso anuvua bayikile ne muntu nansha. Ufunde dîna diende ne muaba udiye musombele. Ufunde kabidi dituku ne dîba dinuvua bayikile, malu anuvua bayikile ne mikanda ivuaye muangate. Uvua mutele dîna dia tshitendelelu tshiende anyi? Udi ne dîku anyi? Uvua muleje malu adi mamutonde anyi atuye musue anyi? Malu aa neakuambuluishe bua kuyikila nende malu adi amusankisha musangu udi ulonda. Ufunde dituku divuaye muitabe bua wewe kupingana, kabidi ne lukonko luuvua mushiye.
4. Bua kulondesha dijinga dia muntu, bua tshinyi tudi ne bua kunanukila?
4 Unanukile: Satana kakutshioka bua kukeba bua ‘kunyenga dîyi’ divua dikuna mu muoyo wa muntu nansha. (Mâko 4:14, 15) Nanku, nansha biobi bikole bua kupeta muntu eu kabidi, kutshioki bua kumukeba to. Kuenaku mua kumufundila mukanda anyi malu makese mu dibeji anyi? Tuangate tshilejilu tshia muanetu wa bakaji uvua mpanda-njila. Wakalonga ne mamu mukuabu bimanyine kulu, kadi kavua kabidi umupeta to. Ke yeye kumufundila mukanda. Pakaluaye kumupeta kumbelu dimue dituku, mamu eu wakamuambila ne: uvua ne disanka dia bungi bua muvuaye kayi mumupue muoyo. Patudi tumiamina mâyi ku ntete ya bulelela, netupete disanka dia kumona mudiyi itoloka, ikola ne ikuama mamuma, ‘mikuabu makumi asatu asatu, mikuabu makumi asambombo asambombo, mikuabu lukama lukama.’—Mâko 4:20.