Tuakajayi mishindu yetu ya kuyisha: Tufunde malu adi atangila muntu udi muanyishe bulelela

“Wikale mudimuke mu malu ebe ne mu dilongesha diebe.” (1 Tim. 4:16) Mubelu eu udi mufundisha ku nyuma wa Nzambi udi Paulo wambila Timote udi uleja ne: tudi ne bua kudienzeja bua kuya kumpala mu mudimu wa kuyisha nansha tuetu bikale bapiabapia anyi bawenzenze kakadi bidimu bia bungi. Bua kutuambuluisha bua kukumbaja bualu ebu, nebikale batupatuila mu Mudimu wetu wa Bukalenge tshiena-bualu tshia ne: “Tuakajayi mishindu yetu ya kuyisha.” Tshiena-bualu tshionso netshikale tshiakula bua mushindu kampanda muimpe ne tshitupesha imue ngenyi ya mua kuyisha. Mu ngondo mujima, badi balomba bantu bonso bua kulondesha bimpe mushindu wa kuyisha eu. Ku ndekelu kua ngondo, nekuikale mudimu mu Tshisangila tshia Mudimu watuambuluisha bua kuleja masanka ne malu atuvua bapete patuvua batume ngenyi yetu pa mushindu wa kuyisha au. Mu ngondo eu, tudi balombibue bua kutabalela difunda malu adi atangila muntu udi muanyishe bulelela.

Mushinga: Bua tuetu kukumbaja mudimu wetu, tudi ne bua kuenza malu makuabu patudi tuyisha. Tudi ne bua kupinganyina bantu bavua banyishe bulelela bua kubalongesha, kumiamiana mâyi ku ntete ya bulelela ituvua bakune. (Mat. 28:19, 20; 1 Kol. 3:6-9) Kuenza nunku kudi kulomba kupeta muntu au tshiakabidi, kuyukila nende bua malu atu amutonda, ne kuimanyina pa malu anuvua bayikile nende musangu mushale. Nunku, patudi tupeta muntu udi muanyishe bulelela, mbimpe tufunde malu atudi bayukile nende au.