Nzambi udi ukutabalela
MU BIBLE mmuaba mutambe buimpe utudi mua kupetela mibelu, bualu mmufundisha kudi Nzambi. Bible ki mmukanda wa malu a luondapu to, kadi udi mua kutuambuluisha bimpe menemene patudi ne tunyinganyinga, padi meji mabi atuluila, padi meji atushikila, anyi patudi batshiokesha kudi masama a mubidi peshi a mitu.
Bualu bua mushinga menemene budi ne: Bible udi utujadikila ne: Yehowa Nzambi,a Mufuki wetu, mmumanye mutudi tumvua ne tuela meji kupita muntu kayi mukuabu yonso eu. Mmusue kutuambuluisha ne muoyo mujima mu ntatu yonso itudi nayi. Tuakulabi tshilejilu bua mvese ibidi ya mu Bible itu ikankamija:
“Yehowa udi pabuipi ne badi ne muoyo musunsuke; udi upandisha badi bazajibue mu lungenyi luabu.”—MISAMBU 34:18.
“Bualu meme, Yehowa Nzambi webe, ndi nkuata tshianza tshiebe tshia balume bikole, Yeye udi ukuambila ne: ‘Kutshinyi to. Nenkuambuluishe.’”—YESHAYA 41:13.
Mpindieu mmunyi mudi Yehowa utuambuluisha patudi tutata ne masama a mitu? Yehowa udi uleja bushuwa mudiye ututabalela mu mishindu ya bungi anu muwabimona mu tshiena-bualu tshidi tshilonda.
a Yehowa ke dîna dia Nzambi dia nsungansunga.—Misambu 83:18.