1 | Disambila ‘Numupuile ntatu yenu yonso’

BIBLE UDI WAMBA NE: “[Nupuile Nzambi] ntatu yenu yonso, bualu yeye udi unutabalela.”—1 PETELO 5:7.

Tshidi mvese eu umvuija

Yehowa Nzambi udi utulomba bua tumuambile malu onso adi matutonde mu lungenyi. (Misambu 55:22) Kakuena bualu bunene anyi bukese butudi mua kubenga kusambidila to. Bualu buobu ne mushinga kutudi, budi kabidi ne mushinga kudi Yehowa bualu udi ututabalela. Kumulomba mu disambila mbumue bua ku malu a mushinga adi mua kutupetesha ditalala dia mu lungenyi.—Filipoyi 4:6, 7.

Mudiye mua kukuambuluisha

Tudi mua kudimona nkayetu menemene dîba ditudi tutata ne masama a mitu. Pa tshibidilu bantu bakuabu kabatu nansha bumvua bimpe menemene mutudi mua kuikala tukenga to. (Nsumuinu 14:10) Kadi tuetu basambile ne bambile Nzambi mutudi tudiumvua menemene, neatuteleje ne bulenga buonso utumvua kabidi. Yehowa udi utumona, mmumanye ntatu yetu ne makenga atudi nawu. Mmusue bua tusambile tumuambile malu onso adi atusamisha mutu.—2 Kulondolola 6:29, 30.

Tudi tukolesha dishindika ditudi nadi dia ne: Yehowa udi ututabalela patudi tusambila tumuambila itudi nayi. Tudi mua kudiumvua petu anu bu mufundi wa misambu wakasambila wamba ne: “Wewe udi mumone lutatu luanyi; udi mumanye dikenga dianyi dikole.” (Misambu 31:7) Kumanya anu patupu ne: Yehowa mumone lutatu lutudi nalu kudi mua kutuambuluisha bikole bua kutungunuka ne kunanukila mu ntatu. Kena umona anu ntatu patupu to, mmumanye bimpe mutudi tukenga kupita muntu kayi mukuabu yonso ne udi utuambuluisha bua kupeta busambi ne dikankamija mu Bible.

Mudi Bible wambuluisha Julian

Mudi tunyinganyinga tunkengesha

“Ndi nkenga ne tunyinganyinga ne ntu muena malu makole. Ngakakuluka mu tunyinganyinga dîba dimvua tshiyi muelela meji to. Dîba kampanda ndi mua kuikala bimpe, katupa aka ngumvua kanyinganyinga kakole kankuata bua bualu budi kabuyi nansha ne kudibu to. Ntu ngumvua kanyinganyinga nangananga pandi muaba udi bantu. Nsamisha mutu bikole menemene bua mudibu mua kuikala bammona.

“Bantu bonso badi bamanye lutatu luanyi batu benza muabu muonso bua kungambuluisha. Bulelela budi ne: misangu ya bungi batu bangambila malu adi kaayi nansha ne dikuatshisha to. Kadi ntu mbela tuasakidila bua mudibu badienzeja bua kungambuluisha.

“Misangu mikuabu, bitu binkolela too ne bua kusambila pandi ne kanyinganyinga anyi bua malu anyi makole. Bua meme kuteka meji kaba kamue bua kuyukila ne Yehowa mu disambila bitu bindomba ndienzeja bikole. Meji anyi atu atua eku ne eku ne lukasa luonso, misangu ya bungi malu ashala akadi angenza binyunganyunga mu mutu. Pandi panga bua kuteka meji muaba umue, bitu binkolela too ne bua kuambila Yehowa mundi ngumvua ne ngela meji.”

Mudi Bible ungambuluisha

“Ndi mulonge mu Bible ne: kusambila kakuena kumvuija kuenza mêba a bungi peshi kuakula bia bungi bua Nzambi kushishaye kututeleja to. Misangu ya bungi pantu mpanga miaku ya kuamba mu disambila ntu ngamba anu ne: ‘Yehowa ngambuluisha koku bua luse.’ Nansha pantu ngenza nanku, ntu mmona ne: Yehowa mmuteleja ne neampeshe tshindi nkeba. Pa kumbusha kusambila, mvua muye kabidi kudi doktere. Ndi ne disanka dia kuamba ne: malu abidi aa mangambuluisha bikole, nkadi bimpe mu malu a bungi. Bivua bushuwa ne mushinga bua kudienzeja bua kulomba tatu wanyi wa mu diulu bua angambuluisha, bualu mvua mujadike ne: mmunange ne mmusue kungambuluisha.”