2 | “Busambi bua mu Mifundu”

BIBLE UDI WAMBA NE: “Malu onso avuabu bafunde kale bavua baafunde bua kutulongesha, bua tupete ditekemena ku diambuluisha dia dinanukila dietu ne dia busambi bua mu Mifundu.”—LOMO 15:4.

Tshidi mvese eu umvuija

Mu Bible mudi mibelu idi itusamba idi mua kutupetesha bukole ne ituambuluisha padi meji mabi atuluila. Malu adi mu Bible adi kabidi atupetesha ditekemena dia ne: mu katupa kîpi emu masama a mitu neajike.

Mudiye mua kukuambuluisha

Imue misangu, tuetu bonso tutu tutuilangana ne malu atu atubungamija; kadi bantu badi ne disama dia kabungama batu pamuapa babungama bobu bikole anyi bakenga ne lungenyi mutantshi mule dituku dionso. Bible udi mua kubambuluisha mushindu kayi?

Bible udi ufila ngenyi mimpe idi mua kupingana pa muaba wa ngenyi mibi. (Filipoyi 4:8) Mmuomu, udi mua kuwuja mitu yetu ne ngenyi idi ikolesha idi mua kutukija mioyo yetu, nunku neyituambuluishe bua kumanya mua kudikanda mu meji etu.—Misambu 94:18, 19.
Bible udi mua kutuambuluishe bua kumbusha meji a ne: katuena ne mushinga to.—Luka 12:6, 7.
Mvese ya mu Bible mipite bungi idi itujadikila ne: katuena nkayetu to; Nzambi Mufuki wetu mmumanye bionso bitudi tumvua munda muetu.—Misambu 34:18; 1 Yone 3:19, 20.
Bible udi ulaya ne: Nzambi neumbushe malu mabi onso a tunyinganyinga adi aluila bantu mu lungenyi. (Yeshaya 65:17; Buakabuluibua 21:4) Mulayi eu udi mua kutupetesha bukole bua kunanukila patudi tuluangana ne tunyinganyinga.

Mudi Bible wambuluisha Jessica

Mutu disama dia kabungama dintatshisha

“Pamvua ne bidimu 25, ngakapeta disama dia mpala, bobu kulua kunkuata disama dibi dia kabungama. Mvua nkengakana bua malu kampanda a buôwa avua mangenzekele ku kale amvua anu mvuluka misangu ne misangu. Badoktere bakangambuluisha bua mmanye ne: disama dianyi dia kabungama divua dilela kudi meji mabi avua anduila bua malu kampanda mabi avua mangezekele kale. Bivua bindomba kulonda luondapu luvua lukengela, kabidi kupeta mibelu ya badoketere ivua mua kungambuluisha bua njingulule meji avua antatshisha bua meme kualekela.”

Mudi Bible mungambuluishe

“Tshikondo tshimvua ngumvua bibi menemene, muoyo wa munda uvua umpandika, mpangila tulu, nshala ndubakana mu muoyo. Butuku ke bumvua ntamba kudiumvua mushikile bua ngenyi mibi ivua induila mu mutu. Anu mudi Misambu 94:19 uleja, Nzambi udi mua kutusamba ne kutukijija muoyo wetu patudi batshibuila panshi kudi tunyinganyinga. Nunku mvua anu ne Bible wanyi ne kayé kantu mfundila mvese ya mushinga kumpenga kua bulalu buanyi. Pamvua mpangila tulu, mvua mbala mvese ya mu Bible, dîba adi meji a Nzambi avua ansamba.

“Bible udi utukankamija bua kushimbula ngelelu wa meji udi kayi upetangana ne tshitudi bamanye bua Nzambi to. Kumpala mvua ndimona bu muntu udi kayi ne mushinga, kayi munangibue, anyi kayi ne bua nsongo to. Kadi ngakalua kumanya ne: meji a nanku kaena apetangane ne tshidi Bible ulongesha to, bualu Bible udi ulongesha yeye ne: Nzambi nTatu wa dinanga udi utumvuila ne utabalela yonso wa kutudi. Ngakatuadija kulombola meji anyi ku kakese ku kakese, pamutu pa meme kualekela owu andombola. Meme kumanya mua kuikala ndimona mudi Nzambi ummona. Abu mbualu bunene buvua bungambuluishe bua kulekela kudibipisha mumvua ndibipisha amu.

“Ndi muindile ne muoyo kuulu kuulu tshikondo tshikala malu mabi onso a tunyinganyinga adi aluila bantu mu lungenyi ne bua kujika. Kumanya ne: masama a mitu neajike kudi kumpetesha bukole bua kutantamena ntatu yanyi mpindieu, nansha kabidi ditekemena dilenga dia ne: kumpala eku disama dianyi edi nedijike ndekelu wa bionso.”