3 | Mudi bilejilu bia mu Bible mua kukuambuluisha

MU BIBLE BADI BAKULA BUA . . . Balume ne bakaji ba lulamatu bavua ‘badiumvua anu bu mututu tudiumvua petu.’—YAKOBO 5:17.

Tshidi mvese eu umvuija

Mu Bible mbalondamu malu a bantu balelela balume ne bakaji bavua badiumvua mishindu mishilashilangane. Patudi tubala malu abu mu Bible, tudi mua kupetamu malu a muntu utudi bafuanangane nende mu ngikadilu.

Mudiye mua kukuambuluisha

Tuetu bonso tutu basue bua bikale batumvuila. Ke mutubi nangananga patudi tukenga ne masama a mitu. Patudi tubala malu a bantu balelela ba mu Bible, tudi mua kupetamu batudi bafuangane nabu mu mushindu utudi tumvua munda muetu anyi tuela meji. Dîba adi, netufike kudimona ne: katuena nkayetu mu disama adi to, katutshiyi tutamba kudimona nkaya patudi ne tunyinganyinga ne malu adi atubungamija nansha.

Mu Bible mudi malu a bungi avuabu bambe kudi bantu bavua badiumvua bashikile kabayi wakubambuluisha. Ukatuku mudiambile ne: ‘Tshiena mua kutungunuka ne kuikala ne nsombelu wa nunku anyi’? Ke tshivua tshifikile Mose, nansha Eliya ne Davidi.—Nomba 11:14; 1 Bakalenge 19:4; Misambu 55:4.
Bible udi utuambila bua mukaji mukuabu, diende Hana, wakumvua “kanyinganyinga ka bungi menemene” bualu kavua ulela to, ne bua muvuabu bamuseka kakuyi luse kudi mukenenda bua bualu abu.—1 Samuele 1:6, 10.
Bible udi wakula bua muntu mulume mukuabu diende Yobo uvua mua kuikala ne nsombelu wa buena wetu. Nansha muvuaye ne ditabuja dikole kudi Yehowa, wakakenga ne dibungama dikole kuambaye musangu kampanda ne: “Ndi nkina muoyo wanyi; tshiena musue kushala ne muoyo to.”—Yobo 7:16.

Patudi tulonga mushindu uvua bantu badibu bakuile mu Bible aba bananukile pavua meji mabi abaluila, bidi mua kutupesha bukole butudi nabu dijinga bua kunanukila petu patudi ne tunyinganyinga.

Mudi Bible wambuluisha Kevin

Mutu disama dia mpala dintatshisha

“Bakankuata disama dia mpala pankavua ne bidimu bipatshila ku 50. Kudi bikondo bintu ngela meji ne: ndi mua kujikija lutatu kayi luonso ludi mua kunkuata. Kadi bikondo bikuabu ntu mmona ne: muoyo kawena nansha unsankisha to.”

Mudi Bible ungambuluisha

“Muntu wa mu Bible uvua ne nsombelu udi mufuanangane ne wanyi mmupostolo Petelo. Wakenza bilema bivua bimufikishe ku didimona kayi ne mushinga to. Kadi pamutu pa Petelo kutungunuka anu ne kudimona kayi ne mushinga, wakakeba balunda bavua mua kumutabalela. Dituku ditu malu anyi kaayi ende bimpe bua disama dia mpala dindi nadi, bilema bianyi bitu bingupuila panshi ne bienza bua ntuadije kudimona tshiyi ne mushinga to. Anu bu Petelo, ndi mupeta dilongesha dia kushala mulamate balunda banyi bikole, batu basue kungambuluisha bua ntungunuke anu ne kuya kumpala.

“Muntu mukuabu wa mu Bible utu unkoleshe bikole mmukalenge Davidi. Pa tshibidilu uvua umvua dibungama bua nsombelu uvuaye nende ne unyingalala bua bilema bivuaye muenze kale. Ndi mua kufuanangana nende bualu misangu mikuabu ntu ngenza anyi ngamba malu atu alue kunnyingalaja. Mêyi a Davidi adi mu Misambu 51 atu ankankamija. Davidi udi wamba mu mvese 3 ne: ‘Ndi mumanye bimpe matomboka anyi, ne mpekatu wanyi udi misangu yonso kumpala kuanyi.’ Bileja bushuwa muntu ndiumvua pandi mubungame bikole, bienze anu bu ne: kakuvua bualu buimpe nansha bumue bumvua nabu to. Kadi mêyi a Davidi adi mu mvese wa 10 adi ankumbanyina kabidi: ‘Fuka muoyo mukezuke munda muanyi, Nzambi wanyi,teka nyuma mupiamupia munda muanyi, eu udi mushindame.’ Ntu nsambila panyi nanku ndomba Nzambi bua angambuluishe, ngikale ndimona bimpe. Ndekelu wa bionso, mvese wa 17 udi unkolesha. Udi wamba ne: ‘Muoyo udi musunsuke ne muzajike, Nzambi wanyi, kuakuwubenga to.’ Mvese eu udi unjadikila ne: Nzambi mmunange.

“Ditekemena dindi nadi bua matuku atshilualua ditu dikola pantu ntuma meji anu ku bilejilu bia mu Bible ne ku bidi Nzambi mumpeshe mpindieu. Ndi ne ditekemena dishindame dia malu adibu balaye mu Bible, ne ndingambuluishe bushuwa bua kutungunuka ne kuya kumpala.”