Patudi tudiumvua bashikile
UKADIKU pebe mudiumvue bibi kutshiyi umona muoyo ne mushinga anyi? Nanku udi mua kumvua muvua Adriana mumvue. Uvua ne kanyinganyinga kakole ne dibungama, udiumvua kayi ne ditekemena. Bakamukuata ne disama dia mu lungenyi didi difikisha muntu ku dikala mubungame.
Mona kabidi tshivua tshifikile Kaoru wa mu Japon uvua utabalela baledi bende bakulakaje bavua basama. Udi umvuija ne: “Tshikondo atshi, malu a ku mudimu avua manzengeje. Mu kupita kua matuku, tshivua nansha ngumvua nzala, ne tshivua mpeta tulu to. Ke meme kufika ku dimona ne: bivua bimpe mfua nansha kufua bua ngikishe.”
Ojebode wa mu Nigéria udi wamba ne: “Misangu yonso mvua anu mubungame bimfikisha ne ku didila muadi, meme kukeba too ne mushindu wa kudishipa.” Diakalenga, Ojebode, Kaoru, ne Adriana kabakadishipa to. Kadi tshidimu tshionso etshi bantu binunu bia bungi badi badishipa.
MUABA WA KUPETELA DIAMBULUISHA
Ba bungi batu badishipa mbantu balume, ba bungi ba ku bobu aba batu bumvua bundu bua kulomba diambuluisha. Yezu wakamba ne: bantu badi basama ke badi dijinga ne munganga. (Luka 5:31) Nunku wewe udiumvua mushindu eu, tudi tukulomba bua kumvu bundu bua kulomba diambuluisha to. Bantu ba bungi batu ne disama dia mu lungenyi ditu difikisha ku dikala babungame mbamone ne: kulonda luondapu kampanda kudi mua kubambuluisha bua kumvua bimpe. Ojebode, Kaoru, ne Adriana bakamonangana bobu ne baminganga ne mpindieu badi bimpe.
Baminganga badi mua kufila manga anyi kuyukila ne muntu patupu bua kujikija disama didi difikisha ku dikala mubungame. Bantu badi ne disama edi batu bajinga bua bena mu mêku ne balunda bikale nabu lutulu, babumvuila, babatabalela ne babakuatshisha. Yehowa Nzambi ke mulunda mutambe buimpe udi muntu mua kupeta, bualu udi ufila diambuluisha dimpe mu Bible Dîyi diende.
KUDI MUSHINDU WA KUJIKIJA DISAMA EDI BUA KASHIDI ANYI?
Bantu badi basama disama dia mu lungenyi didi difikisha muntu ku dibungama batu dijinga ne kutungunuka ne kulonda manga ne balonga mua kupita nadi bimpe pa kuakaja malu kampanda mu nsombelu wabu. Kadi wewe muikale ne disama edi udi mua kutekemena malu mimpe kumpala eku anu bu Ojebode. Udi wamba ne: “Ndi mutekemene bua kumona mudi mêyi a mu Yeshaya 33:24 akumbana kumpala eku, mvese eu udi wakula bua tshikondo tshikala muntu nansha umue kayi mua kuamba ne: ‘Ndi nsama.’” Anu bu Ojebode mulayi wa Nzambi wa “buloba bupiabupia” muikala kamuyi “bintu bidi bisama” ukukoleshe ku muoyo. (Buakabuluibua 21:1, 4) Mulayi au udi uleja kabidi muajika kanyinganyinga kadi muntu umvua ne kadiye naku mu lungenyi. Tunyinganyinga tuebe tuonso netujike bua kashidi. Tunyinganyinga tuebe ‘katuakukuvuila kabidi mu lungenyi, anyi kukubanda kabidi ku muoyo to.’—Yeshaya 65:17.