Muajika mvita

NZAMBI NEABUTULE MBULAMATADI YA BANTU

Nzambi neabutule mbulamatadi ya bantu ku mvita ya Armagedone.a (Buakabuluibua 16:16) Tshikondo atshi, nebasangishe “bakalenge ba pa buloba bujima” pamue bua kuluangana “mvita ya dituku dinene dia Nzambi Wa Bukole Buonso.” (Buakabuluibua 16:14) Armagedone mmvita ya Nzambi yajikija mvita yonso pa buloba.

Nzambi neapingaje Bukalenge anyi mbulamatadi wende pa muaba wa mbulamatadi ya bantu. Bukalenge bua mu diulu ebu kabuakubutudibua to. (Danyele 2:44) Nzambi mmuteke Muanende Yezu Kristo Mukalenge wa Bukalenge buende. (Yeshaya 9:6, 7; Matayi 28:18) Mbulamatadi eu ke Bukalengeb buvua Yezu muambile bayidi bende bua kulomba mu disambila. (Matayi 6:9, 10) Pakokesha Yezu, bantu bonso nebikale mu buobumue ne nekuikale anu mbulamatadi umue pa buloba bujima.

Yezu mmushilangane ne bakokeshi ba pa buloba bualu yeye kakutangila anu malu ende nkayende to. Bu mudiye kayi ne kansungansunga, muntu nansha umue kakudiumvua mulengulula bua dikoba diende, ditunga diabu anyi bua muaba udiye mufumine to. (Yeshaya 11:3, 4) Bantu kabakuluangana bua manême abu to. Bua tshinyi? Bualu Yezu neatabalele muntu yonso. Bible udi wamba ne: ‘Yeye neasungile bapele badi badila balomba diambuluisha, kabidi ne mupuekele ne muntu yonso udi kayi ne mumuambuluishi. Neabasungile ku dikengeshibua ne ku tshikisu.’​—Misambu 72:12-14.

Bukalenge bua Nzambi nebumbushe bia mvita bionso pa buloba. (Mika 4:3) Nebubutule kabidi bantu babi bonso badi kabayi basue kulekela mvita anyi badi banyanga ditalala. (Misambu 37:9, 10) Balume ne bakaji ne bana nebadiumvue mu bukubi miaba yonso pa buloba.​—Yehezekele 34:28.

Patuadija mbulamatadi wa Nzambi kukokesha buloba bujima, bantu bonso nebikale ne nsombelu muimpe mutambe. Neajikije malu onso atu afikisha bantu ku diluangana bu mudi: bupele, biyole bia nzala, ne dipangila muaba wa kulala. Bantu bonso nebikale ne biakudia bimpe bia bungi ne nebasombe muaba muimpe.​— Misambu 72:16; Yeshaya 65:21-23.

Bukalenge bua Nzambi nebujikije malu mabi onso adi mvita mikebele bantu, bu mudi njiwu ivuabu bapete ne malu atu ashala abatatshisha mu lungenyi bua bivuabu bamonamu. Nebabishe too ne bantu bonso badi bafue. (Yeshaya 25:8; 26:19; 35:5, 6) Mêku onso neasombe kabidi mu buobumue ne malu onso mabi avua nawu bantu mu mitu neikale akadi ‘malu a kale akadi majimine.’​—Buakabuluibua 21:4.

NZAMBI NEAJIMIJE MPEKATU

Pakokesha Bukalenge bua Nzambi buloba bujima, bantu bonso nebatendelele anu Nzambi umuepele mulelela Yehowac, “Nzambi wa dinanga ne ditalala.” (2 Kolinto 13:11) Bantu bonso nebamanye mua kusomba pamue mu ditalala. (Yeshaya 2:3, 4; 11:9) Bonso badi batumikila Nzambi kabakuikala kabidi bena mpekatu to, nebalue bapuangane.​—Lomo 8:20, 21.

NZAMBI NEABUTULE SATANA NE BADEMON BENDE

Bukalenge bua Nzambi nebubutule Satana ne bademon bende, bakebeshi ba mvita. (Buakabuluibua 20:1-3, 10) Bu muikala bantu babi kabatshiyiku, “ditalala nedivulangane.”​—Misambu 72:7.

Ikalayi batuishibue ne: mulayi wa Nzambi wa kujikija mvita ne malu a tshikisu newukumbane. Nzambi udi ne bukole bua kujikija mvita ne ke tshidiye musue kuenza.

• Nzambi udi ne meji ne bukole bua kujikija mvita ne malu a tshikisu. (Yobo 9:4) Kakuena bualu budiye mua kupangila bua kuenza to.​—Yobo 9:4.

• Nzambi ki mmusue kumona bantu bakenga to. (Yeshaya 63:9) Bualu bukuabu, ‘mmukine muntu yonso udi munange tshikisu.’​—Misambu 11:5.

• Nzambi utu anu ukumbaja mêyi ende; kena mua kushima to.​—Yeshaya 55:10, 11; Tito 1:2.