“Udi muntu wa mushinga mukole”!

1-2. Ntshinyi tshidi tshitujadikila ne: Yehowa udi utuangata ne mushinga wa bungi?

MUNKATSHI mua batendeledi ba Yehowa, mudi bamue badi badimona kabayi ne mushinga, pamuapa bualu muntu kampanda uvua mubenzele bualu buvua bubafikishe ku didimona nanku. Biwikala udimona kuyi ne mushinga, ntshinyi tshidi mua kukujadikila ne: Yehowa yeye udi ukuangata ne mushinga wa bungi?

² Kubala bilejilu bia bantu badibu bakuile mu Bible bidi bileja mudi Yehowa musue bua bantu benzele bakuabu malu kudi mua kukuambuluisha. Yezu uvua unemeka bantu ne ubenzela malu mimpe. Bidi bileja ne: yeye ne Tatu wende bavua bangata bantu ne mushinga wa bungi nansha muvua bakuabu babamona kabayi ne mushinga. (Yone 5:19; Eb. 1:3) Mu tshiena-bualu etshi, netukonkonone malu aa: 1) muvua Yezu ufikisha bantu ku dimona ne: Yehowa uvua ubangata ne mushinga wa bungi ne 2) tshidi mua kutujadikila ne: tudi ne mushinga wa bungi ku mêsu kua Nzambi.​—Hag. 2:7.

MUVUA YEZU UFIKISHA BANTU KU DIMONA NE: YEHOWA UVUA UBANGATA NE MUSHINGA WA BUNGI

3. Mmunyi muvua Yezu muenzele bena mu Galela malu pavuabu bamulombe bua abambuluishe?

³ Pavua Yezu uyisha mu Galela, bantu ba bungi bakalua kudiye bua kumuteleja ne bua abondope. Yezu wakamba ne: “bavua batatshishibue, balekelela bu mikoko idi kayiyi ne mulami.” (Mat. 9:36) Bamfumu babu ba bitendelelu bavua babangata bantu tshianana, babamona bu ‘bantu bedibue mulawu.’ (Yone 7:47-49) Kadi Yezu yeye uvua ubangata ne mushinga bualu uvua ubalongesha ne ubondopa. (Mat. 9:35) Bualu bukuabu, bu muvuaye musue kuambuluisha bantu ba bungi, wakalongesha bapostolo bende bua kuyisha, kubapeshaye kabidi bukole bua kuondopa babedi.​—Mat. 10:5-8.

4. Mushindu uvua Yezu umona bantu bavuabu bapepeja kudi bakuabu udi utulongesha tshinyi?

⁴ Bu muvua Yezu wenzela bantu bavua balua kumuteleja malu ne bulenga ne ubanemeka, bidi bileja ne: yeye ne Tatu wende badi bangata bantu badibu bapepeja kudi bakuabu ne mushinga wa bungi. Biwikala wenzela Yehowa mudimu kadi umona bu ne: kena ukuangata ne mushinga, ela meji a muvua Yezu umona bantu bavua basue bua abalongeshe. Wewe muenze nanku, nebikuambuluishe bua kumona ne: udi ne mushinga wa bungi ku mêsu kua Yehowa.

5. Ntshinyi tshitudi bamanye bua muntu mukaji kampanda wa mu Galela uvua Yezu mutuilangane nende?

⁵ Yezu uvua ulongesha bantu mu tshibungi, kadi uvua kabidi utabalela muntu yonso. Tshilejilu, pavuaye uyisha mu Galela, wakatuilangana ne muntu mukaji uvua ne disama dia mashi apueka munkatshi mua bidimu 12. (Mâko 5:25) Bilondeshile Mikenji ya Mose, disama adi divua dimuvuija mukoya ne muntu yonso uvua umulenga uvua ulua pende mukoya. Ke bualu kayi kabivua mua kuikala bipepele bua yeye kusomba ne bantu to. Bualu bukuabu, kavua mua kuenza bibilu pamue ne bantu bakuabu bua kutendelela Yehowa to. (Lew. 15:19, 25) Bushuwa, muntu mukaji eu uvua usama bikole ne uvua kabidi pamuapa umona ne: bantu kabavua bamunange to.​—Mâko 5:26.

6. Mmunyi muvua muntu mukaji uvua ne disama dia mashi au muondopibue?

⁶ Muntu mukaji au uvua musue bua Yezu amuondope. Kadi kavua mua kusemena padiye to, bualu uvua pamuapa umvua bundu bua disama divuaye nadi adi anyi utshina, wela meji ne: Yezu uvua mua kumuipata bualu mmubuele mu bantu pende muikale mukoya. Nansha nanku, mukaji au wakalenga tshilamba tshiende tshia pa mutu, mutuishibue ne: uvua ne bua kuondopibua. (Mâko 5:27, 28) Ditabuja dikole divuaye nadi diakamuondopa. Pashishe pakebeja Yezu bua kumanya muntu uvua mumulenge, wakandamuna ne: yeye ke uvua mumulenge. Ntshinyi tshiakenza Yezu?

7. Yezu wakenzela muntu mukaji au malu mushindu kayi? (Mâko 5:34)

⁷ Yezu wakenzela muntu mukaji au malu ne bulenga ne kanemu. Wakamona ne: mukaji au uvua ne “buôwa ne uzakala.” (Mâko 5:33) Ke bualu kayi wakamukankamija ne dîyi dimpe, umubikila ne: “muananyi wa bakaji.” Pavuaye mumubikile nanku, bidi bileja muvuaye ne bulenga, mumunange, ne umunemeka. (Bala Mâko 5:34.) Anu muntu mukaji eu ke utu Yezu mubikile ne: “muananyi wa bakaji,” pamuapa bualu uvua mumone ne: uvua ne buôwa bua bungi. Fuanyikijabi disulakana divua mukaji au ne bua kuikala mumvue. Nansha muvuaye mumvue bimpe, bu Yezu kayi mumukankamije ne dîyi dimpe, uvua mua kushala udipisha bua muvuaye mulenge tshilamba tshia Yezu ne mubuele mu bantu. Kadi Yezu wakamuambuluisha bua amone ne: uvua ne mushinga wa bungi ku mêsu kua Tatu wende wa mu diulu.

8. Muanetu wa bakaji kampanda wa mu Brésil uvua ne ntatu kayi?

⁸ Nansha lelu eu, batendeledi ba Yehowa badi pabu ne masama adi abafikisha ku didimona kabayi ne mushinga. Muanetu wa bakaji mukuabu, diende Maria,a udi mpanda-njila wa pa tshibidilu mu Brésil mmuledibue kayi mikolo, kayi tshianza tshia dia bakaji. Udi wamba ne: “Bavua bantatshisha mu kalasa bikole kudi balongi betu bua bulema buanyi. Bavua bantue mêna avua annyingalaja. Tòo ne bena mu dîku dietu bavua bangenzela malu avua amfikisha ku didimona tshiyi ne mushinga.”

9. Mmunyi muvuabu bambuluishe Maria bua kumona ne: Yehowa uvua umuangata ne mushinga wa bungi?

⁹ Mmunyi muvuabu bambuluishe Maria? Pakaluaye Ntemu wa Yehowa, bena Kristo nende bakamukankamija ne kumuambuluishabu bua amone ne: Yehowa uvua umuangata ne mushinga wa bungi. Udi wamba ne: “Bu meme muambe ne: mfunde mêna a bena Kristo nanyi bonso bavua bangambuluisha mu karné kanyi, muaba uvua ujikamu. Ndi ngela Yehowa tuasakidila ne muoyo mujima bua dîku dimpe dia bana betu didiye mumpeshe.” Bena Kristo abu bavua bambuluishe Maria bua amone ne: Yehowa uvua umuangata ne mushinga wa bungi.

10. Nntatu kayi ivua nayi Mariya wa ku Magadala? (Tangila kabidi bimfuanyi.)

¹⁰ Tumonayi muvua Yezu muambuluishe muntu mukuabu, diende Mariya wa ku Magadala. Bavua bamukuate kudi bademon muanda mutekete! (Luka 8:2) Bidi bimueneka ne: bademon abu bavua bamuenzeja malu a dikema, bifikisha bantu bakuabu ku dimuepuka. Uvua utata bikole, ne pamuapa bivua bimuenza buôwa, bimufikisha ku diela meji ne: kakuvua muntu uvua mumunange anyi uvua mua kumuambuluisha to. Bidi bimueneka ne: Yezu wakipata bademon abu, Mariya kuluaye muyidi wende. Mmunyi muvua Yezu muambuluishe kabidi Mariya wa ku Magadala bua kumona ne: Yehowa uvua umuangata ne mushinga wa bungi?

11. Ntshinyi tshivua Yezu muenzele Mariya wa ku Magadala bua kumuleja ne: Yehowa uvua umuangata ne mushinga wa bungi? (Tangila kabidi bimfuanyi.)

¹¹ Yezu wakapesha Mariya wa ku Magadala diakalenga dia kuenza nende ngendu bua kuyisha.b Nunku pavuaye uteleja muvua Yezu ulongesha bakuabu, bivua bimuambuluisha pende bikole. Yezu uvua kabidi mumumuenekele anu dituku mene divuaye mubishibue ku lufu. Uvua umue wa ku bayidi ba kumpala bavua Yezu muyukile nabu dituku adi. Yezu wakamupesha too ne mudimu wa kuya kumanyisha bapostolo ne: uvua mubishibue ku lufu. Malu onso avua Yezu mumuenzele au adi aleja ne: Yehowa uvua umuangata ne mushinga wa bungi.​—Yone 20:11-18.

12. Bua tshinyi Lidia uvua udimona kayi ne mushinga?

¹² Anu muvuabi mua kuikala bua Mariya wa ku Magadala, bantu ba bungi lelu badi badimona kabayi ne mushinga. Muanetu wa bakaji mukuabu wa mu Espagne, diende Lidia, udi uleja ne: patshivuaye munda mua mamuende, mamuende wakapeta meji a kutula difu, ne pakavuaye mutuadije kukuata ku bintu bua kuenda, mamuende au uvua umulengulula ne umuamba mêyi mabi. Udi wamba ne: “Dijinga dianyi divua ne: bantu bakuabu bannange ne bikala balunda banyi. Kadi mvua mmona anu bu ne: kabavua mua kunnanga to, bualu mamuanyi uvua ungamba mumvua muana mubi.”

13. Ntshinyi tshiakambuluisha Lidia bua kumona ne: Yehowa uvua umuangata ne mushinga wa bungi?

¹³ Pavua Lidia mulonge bulelela, malu akashintuluka. Kusambila Yehowa, kubala Bible, ne mêyi mimpe avua bena Kristo nende bamuambila biakamuambuluisha bua kumona ne: Yehowa uvua umuangata ne mushinga wa bungi. Udi wamba ne: “Misangu ya bungi bayanyi utu ungambila ne: mmunnange bikole. Utu ne tshibidilu tshia kumvuluija ngikadilu yanyi mimpe. Balunda banyi bakuabu ba pa muoyo bavua bayimvuluija pabu.” Mu tshisumbu tshienu muomu muikale bena Kristo nebe badi badimona kabayi ne mushinga, mbimpe ubambile mêyi anyi ubenzele malu adi mua kubafikisha ku dimona ne: Yehowa udi ubangata ne mushinga wa bungi.

MUTUDI MUA KUDIMONA ANU MUDI YEHOWA UTUMONA

14. Mmunyi mudi 1 Samuele 16:7 utuambuluisha bua kudimona anu mudi Yehowa utumona? (Tangila kazubu ka “Bua tshinyi Yehowa udi wangata batendeledi bende ne mushinga?”)

¹⁴ Manya ne: Yehowa kena ukumona mudi bena panu bakumona to. (Bala 1 Samuele 16:7.) Bena panu batu bangata muntu ne mushinga anu bualu mmuimpe kumona, udi ne makuta a bungi anyi bualu mmulonge tulasa tua bungi; kadi Yehowa yeye katu utangila abi to. (Yesh. 55:8, 9) Nunku dienzeja bua kudimona mudiye ukumona, kulondi mmuenenu wa bena panu to. Mu Bible mudi bilejilu bia bantu bavua imue misangu kabayi badimone ne mushinga, bu mudi: Eliya, Naomi, ne Hana. Paudi ubala malu abu, dienzeja bua kumona muvua Yehowa mubanange bikole. Udi kabidi mua kufunda malu akadi makufikile adi akujadikila ne: Yehowa mmukunange ne udi ukuangata ne mushinga wa bungi. Udi kabidi mua kubala tshiena-bualu kampanda mu mikanda yetu tshidi ne malu adi aleja mutudi ne mushinga.c

15. Bua tshinyi Yehowa uvua mubikile Danyele ne: “muntu wa mushinga mukole”? (Danyele 9:23)

¹⁵ Ikala mutuishibue ne: lulamatu luebe ludi lukuvuija ne mushinga wa bungi ku mêsu kua Yehowa. Pamuapa pakavua muprofete Danyele ne bidimu 90 ne bia mu njila, ukavua udiumvua “mupungile bikole” ne mutekeshibue mu mikolo. (Dan. 9:20, 21) Ntshinyi tshiakenza Yehowa bua kumukankamija? Wakamutumina muanjelu Gabaliele bua kumuvuluija ne: uvua “muntu wa mushinga mukole” ne uvua muteleje masambila ende. (Bala Danyele 9:23.) Bua tshinyi Danyele uvua ne mushinga wa bungi ku mêsu kua Nzambi? Bualu uvua muntu muakane ne uvua ne lulamatu. (Yeh. 14:14) Yehowa mmufundishe bualu ebu mu Bible bua kutukankamija. (Lomo 15:4) Udi uteleja kabidi masambila ebe ne udi ukuangata ne mushinga wa bungi bualu udi wenza malu makane ne udi mumulamate.​—Mika 6:8, dim.; Eb. 6:10.

16. Ntshinyi tshidi mua kukuambuluisha bua kumona Yehowa bu Tatu udi mukunange?

¹⁶ Mona Yehowa bu Tatu udi mukunange. Dijinga diende ndia kukuambuluisha, ki ndia kukutula bilema to. (Mis. 130:3; Mat. 7:11; Luka 12:6, 7) Kuelangana meji a bualu ebu nkuambuluishe bana betu ba bungi bavua badimona kabayi ne mushinga. Tshilejilu, tuakulabi bua muanetu wa bakaji mukuabu wa mu Espagne, diende Michelle. Bu muvua bayende umuamba mêyi mabi munkatshi mua bidimu bia bungi, uvua udimona kayi ne mushinga ne kayi munangibue kudi bakuabu to. Udi wamba ne: “Dîba dionso divua meji a ne: tshiena ne mushinga anduila, mvua ndifuanyikijila Yehowa ungela mu maboko, undeja mudiye munnange ne unkuba.” (Mis. 28:9) Muanetu wa bakaji mukuabu wa mu Afrique du Sud, diende Lauren, udi uvuluka wamba ne: “Bu mudi Yehowa munkoka kudiye ne bulenga buonso ne dinanga, mungambuluishe bua kushala ne lulamatu kudiye bidimu bionso ebi, ne ukuata nayi mudimu bua kulongesha bakuabu, bushuwa bidi bileja ne: udi ungangata ne mushinga.”​—Hosh. 11:4.

17. Ntshinyi tshidi mua kukuambuluisha bua kuikala mutuishibue ne: Yehowa udi ukuanyisha? (Misambu 5:12) (Tangila kabidi bimfuanyi.)

¹⁷ Ikala mutuishibue ne: Yehowa udi ukuanyisha. (Bala Misambu 5:12.) Davidi wakafuanyikija dianyishibua dietu kudi Yehowa ne “ngabu munene” udi ukuba bantu bakane. Kumanya ne: Yehowa udi ukuanyisha ne udi ukukuatshisha, kudi mua kukuambuluisha bua kuepuka meji a ne: kuena ne mushinga to. Ntshinyi tshidi mua kukujadikila ne: Yehowa udi ukuanyisha? Anu mutukadi bamone, Yehowa udi utuleja mudiye umvua bua bualu buetu mu Bible udiye mutupeshe. Pa kumbusha Bible, Yehowa udi wenza mudimu ne bakulu ne balunda bebe pa muoyo ne bantu bakuabu bua kutuleja ne: tudi ne mushinga wa bungi ku mêsu kuende. Ntshinyi tshiudi ne bua kuenza padi bakuabu bakukankamija?

18. Bua tshinyi mbimpe witabe kalumbandi kadi bakuabu bakuela?

¹⁸ Padi bantu badi bakunange bakuela kalumbandi ne muoyo mujima, kudiambidi ne: kuena mukakumbanyine to. Ikala mumanye ne: Yehowa udi mua kuenza nabu mudimu bua ufike ku dimona ne: udi ukuanyisha. Michelle utukadi batele udi wamba ne: “Ndi ngenda ndonga ku kakese ku kakese mua kuitaba ne muoyo mujima kalumbandi kadi bakuabu bangela. Bitu binkolela bua kuitaba ne: ndi muenze malu mimpe adibu bangelela kalumbandi au, kadi ndi mumanye ne: Yehowa mmusue bua ngitabe kalumbandi aku.” Bakulu bakamuambuluisha kabidi bua amone ne: Yehowa mmumunange. Patudi tuakula apa, udi mpanda-njila ne udi wambuluisha ku betele, muikadile ku bule.

19. Bua tshinyi udi mutuishibue ne: Yehowa udi ukuangata ne mushinga wa bungi?

¹⁹ Yezu mmutuvuluije bimpe ne: Tatu wetu wa mu diulu udi utuangata ne mushinga wa bungi menemene. (Luka 12:24) Nunku abi bidi bitushindikila ne: Yehowa udi utuangata ne mushinga wa bungi. Katupu bualu abu muoyo nansha kakese! Tuenzayi kabidi muetu muonso bua kuambuluisha bakuabu bua bamone ne: badi ne mushinga wa bungi ku mêsu kua Nzambi.