Nkonko ya babadi
‘Ndungenyi’ kayi lukadi Yehowa pa kuteka mu mioyo ya bantu ba bisamba?
Buakabuluibua 17:16, 17 udi wamba bua ntuadijilu wa dikenga dinene ne: “Nsengu dikumi iuvua mumone ne nyama wa luonji, biobi nebikine ndumba eu, nebimupawule, nebimushiye butaka, nebidie mubidi wende ne nebimubutule butubutu ne kapia. Bualu Nzambi wakateka bualu ebu mu mioyo yabu bua kukumbajabu lungenyi luende, eyowa, bua kukumbajabu lungenyi luabu lumue padibu bafila bukalenge buabu kudi nyama wa luonji.” Kumpala tuvua tuamba mu mikanda yetu ne: “lungenyi” luikala Yehowa mua kuteka mu mioyo ya bantu ba bisamba ndua kubutula bitendelelu bia dishima.
Kadi tudi bakajilule ngumvuilu wetu. “Lungenyi” luikala Yehowa mua kuteka mu mioyo ya bantu ba bisamba ndua bobu ‘kufila bukalenge buabu kudi nyama wa luonji.’ Bua kumvua muenzekabi, tuandamunayi imue nkonko.
Dîyi dia buprofete adi didi diakula bua banganyi? Mbatele “ndumba” udibu babikila kabidi ne: “Babilona Munene.” Udi uleja nsangilu wa bitendelelu bionso bia dishima bia pa buloba bujima. “Nyama wa luonji mukunze” udi uleja Bulongolodi bua matunga masanga. Bakenza bulongolodi ebu mu 1919 bua kuteka ditalala pa buloba, ne bavua babubikila tshikondo atshi ne: Nsangilu wa matunga. (Buak. 17:3-5) “Nsengu dikumi” idi ileja makokeshi onso a mbulamatadi adi atua nyama wa luonji mpanda.
Mmalanda kayi adi pankatshi pa ndumba au ne Nyama wa luonji mukunze? Ndumba au ‘mmusombe pa” nyama wa luonji. Bidi biumvuija ne: udi utua nyama wa luonji eu mpanda ne umufikisha ku dienza malu adiye musue.
Ntshinyi tshiafikila ndumba au? Nyama wa luonji au ne nsengu dikumi idi imutua mpanda “nebikine ndumba eu bikole, bifika too ne ku dimupawula ne ku dileja muntu yonso mudiye ne malu mabi menemene. Nebimubutule butubutu bua kukumbaja mêyi akavua Yehowa muambe. (Buak. 17:1; 18:8) Atshi ke tshiafikila bitendelelu bionso bia dishima. Kadi kumpala kua bualu ebu kuenzeka, Yehowa neasake bantu ba bisamba bua kuenza bualu bukuabu butu kabuyi buanji kuenzeka.
Yehowa neasake bantu ba bisamba bua kuenza tshinyi? Neateke lungenyi mu mioyo ya nsengu dikumi bua ‘ifile bukalenge buayi kudi nyama wa luonji mukunze.’ Nyama wa luonji au udi uleja Bulongolodi bua matunga masanga. (Buak. 17:13) Abi bidi bisua kumvuija ne: mbulamatadi ya bantu neyidiangatshile dipangadika dia kupesha nyama wa luonji bukole ne bukokeshi buayi anyi? Tòo! Mêyi a buprofete avua maleje ne: Nzambi nkayende ke wayisaka bua kuenza bualu abu. (Nsu. 21:1; fuanyikija ne Yeshaya 44:28.) Bualu ebu kabuakuenzeka ku kakese ku kakese to, nebuenzeke mu tshimpitshimpi. Pashishe, nyama wa luonji wikalabu bamane kupesha bukole au, neabutule bitendelelu bionso bia dishima bua kashidi.
Ntshinyi tshitudi mua kutekemena bua tshienzeke kumpala eku? Katushadi bindile bua kumvua ngumu ya mudi mbulamatadi yenda itua Bulongolodi bua matunga masanga mpanda ku kakese ku kakese to. Tshia tuetu kutekemena ntshiotshi etshi: Yehowa neateke mu mioyo ya bantu ba bisamba lungenyi lua kupesha nyama wa luonji bukole buabu. Bualu ebu nebuenzeke mu tshimpitshimpi. Penzekabu, netumanye ne: dikenga dinene dikadi pa kutuadija. Pa kuamba bualu abu buenzeke, “katuladi bu mudi bantu bakuabu bonso benza, kadi tushale batabale ne tulame bieledi bietu bia meji” bualu malu au akadi pa kuenzeka mu tshimpitshimpi!—1 Tes. 5:6.