Bua tshinyi mbikole bua kuteka ditalala pa buloba bujima?

Diandamuna dia mu Bible

Malu onso adi bantu benza bua kuteka ditalala pa buloba bujima ki mmakumbane to, ne kaakukumbana anu kukumbana bua malu kabukabu adi alonda aa:

• “Muntu udi wenda eu kena ne bukokeshi bua kuludika nansha dikasa diende to.” (Yelemiya 10:23) Bantu kabavua bafukibue bua bikale ne bukole anyi bukokeshi bua kudilombola nkayabu to, nunku kabakukokesha bua kuteka ditalala kashidi nansha.

• “Kueyemenyi bakokeshi anyi muana wa muntu udi kayi mua kufila lupandu. Mupuya wende udi upatuka, yeye udi upingana ku buloba; mu dituku dine adi, meji adiye wela adi ajimina.” (Misambu 146:3, 4) Bakokeshi nansha badi ne meji mimpe, kabena mua kujikija kujikijilamu malu onso adi akebesha mvita to.

• “Mu matuku a ku nshikidilu nekuikale bikondo bia malu makole bidi bikole mua kupita nabi. Bualu bantu nebikale . . . bena luonji, kabayi banange malu mimpe, batungidianganyi, bena mutu mukole, badiuwuja ne lutambishi.” (2 Timote 3:1-4) Tudi mu “matuku a ku nshikidilu” wa bulongolodi bubi ebu, tshikondo tshidi bienzedi bibi bia bantu bienza bua kakuikadi ditalala to.

• “Diakabi bua buloba ne bua mbuu, bualu Diabolo mmupueke kunudi, muikale ne tshiji tshikole, mumanye ne: udi ne tshikondo tshîpi.” (Buakabuluibua 12:12) Diabolo muluishi wa Nzambi, wakimanshibua pa buloba ne udi usaka bantu ku dikala ne luonji bu ludiye nalu. Kadi patshidiye anu “mukokeshi wa buloba ebu,” katuakuikala mu ditalala nansha.​—Yone 12:31.

• ‘[Bukalenge bua Nzambi] nebuzaze makalenge onso [adi aluisha Nzambi] ne nebuatuishe ku ndekelu, ne buobu nkayabu nebushalaku kashidi.’ (Danyele 2:44) Bukalenge bua Nzambi ke buatukumbajila dijinga dietu dia ne: ditalala dikale pa buloba kashidi, kadi ki mbukalenge bua bana ba bantu nansha bumue to.​—Misambu 145:16.