Bua tshinyi bantu kabena mua kufila ditalala?​—Ntshinyi tshidi Bible wamba?

Malongolodi ne bakokeshi ba pa buloba bujima ki mbakokeshe bua kubueja ditalala mu bantu to. Lelu, kudi bimvundu bia bungi kupita kumpala, katshia anu ku mvita mibidi ya buloba bujima. Bantu batue ku miliyare ibidi mmumue ne: tshia binayi tshia bantu ba pa buloba bujima, mbasombele miaba idi ndululu.

Bua tshinyi bantu kabena mua kufila ditalala? Ntshinyi tshidi Bible wamba?

Malu asatu adi apangisha bantu bua kufila ditalala

1. 1. Bantu badi ne bikadilu bidi bibapangisha bua kufila ditalala. Bible ukavua mulaye bua matuku etu aa ne: “Bantu nebikale badinangi, banangi ba makuta, bena diambu, badibandishi, . . . kabayi ne lungenyi lua kumvuangana, . . . kabayi badikanda, bena luonji, . . . bena mutu mukole, badiuwuja ne lutambishi.”​—2 Timote 3:2-4.

2. 2. Muntu pa nkayende anyi bantu mu tshibungi kabena ne bukole bua kujikija ntatu yabu kuoku kakuyi diambululuisha dia Yehowaa Nzambi, Mufuki wabu to. Bible udi uleja ne: “Muntu udi wenda eu kena ne bukokeshi bua kuludika nansha dikasa diende to.”​—Yelemiya 10:23.

3. 3. Buloba budi ku bukokeshi bua mubi udi ne bukole anyi Satana Diabolo udi “upambuisha ba pa buloba bonso.” (Buakabuluibua 12:9) Bu mutshidi ‘ba pa buloba bonso ku bukokeshi bua mubi,’ nekuikale anu mvita ne tshimvundu.​—1 Yone 5:19.

Nnganyi wafila ditalala?

Bible udi utujadikila ne: nekuikale ditalala. Nzambi ke watutuadiladi, kadi ki mbantu to.

• “‘Bualu ndi mumanye bimpe meji andi nnuelela,’ ke mudi Yehowa wamba, ‘meji a ditalala, ki nga dikenga to, bua kunupesha matuku atshilualua mimpe ne ditekemena.’”​—Yelemiya 29:11.

Mmunyi muakumbaja Nzambi mulayi eu? “Nzambi udi ufila ditalala neazaze Satana.” (Lomo 16:20) Nzambi neenze mudimu ne mbulamatadi wende wa mu diulu udi Bible ubikila ne: “Bukalenge bua Nzambi,” bua kufila ditalala pa buloba bujime. (Luka 4:43) Mu bukokeshi bua Yezu udi Mukalenge wa Bukalenge abu, bantu nebalonge mua kusomba mu ditalala.​—Yeshaya 9:6, 7.

• Bua kumanya malu makuabu, bala tshiena-bualu tshia “Bukalenge bua Nzambi nebuenze malu kayi?”