TSHIENA-BUALU TSHIA KULONGA 9
MUSAMBU WA 75 “Mmeme eu! Untume!”
Ukadi mudiakaje bua kudilambula kudi Yehowa anyi?
“Nempingajile Yehowa tshinyi bua malu mimpe onso adiye mungenzele?”—MIS. 116:12.
LUNGENYI LUNENE
Tshiena-bualu etshi netshikuambuluishe bua kukolesha bulunda ne Yehowa bua upete dijinga dia kudilambula kudiye ne kubatijibua.
1-2. Tshia kuenza ntshinyi kumpala kua kubatijibua?
BIDIMU bitanu bishale ebi, bantu bapite pa muliyo mujima mbabatijibue balue Bantemu ba Yehowa. Ba bungi ba kudibu mbabalongeshe Bible ‘katshia ku buana buabu,’ anu bu muvuabu balongeshe muyidi Timote. (2 Tim. 3:14, 15) Bakuabu mbabalongeshe pakavuabu bakole, ne banga pakavuabu bakulakaje. Mamu mukuabu uvua mulonge Bible ne Bantemu ba Yehowa wakabatijibua ne bidimu 97.
2 Biwikala ulonga Bible anyi baledi bebe bikale Bantemu ba Yehowa, udi musue kubatijibua anyi? Ke tshipatshila tshitambe buimpe atshi. Kadi kumpala kua kubatijibua, udi ne bua kudilambula kudi Yehowa. Tshiena-bualu etshi netshiumvuije tshidi kudilambula kudi Yehowa. Netshikuleje kabidi bua tshinyi ki mbimpe kudikanda bua kudilambula ne kubatijibua biwikala mudiakaje to.
DIDILAMBULA DIDI DIUMVUIJA TSHINYI?
3. Fila bilejilu bia bantu bavua balambula Yehowa.
3 Bilondeshile Bible, muntu mulambula Yehowa uvua muntu musungula bua kuenza mudimu wa tshijila. Tshisamba tshia Isalele tshivua tshilambula Yehowa. Kadi bamue bena Isalele bavua balambula Yehowa mu mushindu wa pa buawu. Tshilejilu, Alona uvua uvuala “tshimanyinu tshia tshijila tshia dibanjijibua,” mmumue ne: tshitata tshia or tshidi tshibalakana pa mpala pa tshilamba tshia kujingila ku mutu. Tshitata tshia or atshi tshivua tshileja ne: uvua muteka ku luseke bua kuenza mudimu wa pa buawu; tuambe ne: kuikala muakuidi munene wa Isalele. (Lew. 8:9) Banazi pabu bavua balambula Yehowa mu mushindu wa pa buawu. Muaku “Munazi” udi ufumina ku muaku wa tshiena Ebelu nazirʹ, udi umvuija ne: “Muntu muteka ku luseke,” anyi “Mulambula.” Banazi bavua ne bua kutumikila mikenji ya pa buayi ivuabu babelele mu Mikenji ya Mose.—Nom. 6:2-8.
4. a) Padi muntu udilambula kudi Yehowa udi witaba bua kuenza tshinyi? b) ‘Kudibenga’ kudi kumvuija tshinyi? (Tangila kabidi tshimfuanyi.)
4 Paudi udilambula kudi Yehowa, udi witaba bua kulua muyidi wa Yezu Kristo ne udifila bikole mu dienza dia disua dia Nzambi. Kudilambula kudi kulomba kuenza tshinyi? Yezu wakamba ne: “Biasua muntu kundonda, adibenge.” (Mat. 16:24) Muaku wa tshiena Greke udibu bakudimune ne: “adibenge,” udi mua kumvuija kabidi ne: “kikadi kabidi ne muoyo buende nkayende to.” Paudi udilambula kudi Yehowa, nebikulombe bua kulekela malu onso adi kaayi amusankisha to. (2 Kol. 5:14, 15) Tuambe ne: udi ne bua kulekela “malu a mubidi,” bu mudi masandi. (Gal. 5:19-21; 1 Kol. 6:18) Kutumikila mikenji eyi nekukusombeshe kasekeseke anyi? Tòo, kayakukusombesha kasekeseke to biwikala munange Yehowa ne mutuishibue ne: mikenji yende idiku bua diakalenga diebe. (Mis. 119:97; Yesh. 48:17, 18) Muanetu Nicholas udi wamba ne: “Udi mua kumona mikenji ya Yehowa bu bimanu bia buloko bidi bikupangisha bua kuenza malu audi musue, anyi bu tukanu tuelela ntambue bua kakuenzedi bibi to.”
Utuku umona mikenji ya Yehowa bu bimanu bia buloko bidi bikupangisha bua kuenza malu audi musue peshi bu tukanu tuelela ntambue bua kakuenzedi bibi anyi? (Tangila tshikoso 4)
5. a) Mmushindu kayi uudi mua kudilambula kudi Yehowa? b) Ndishilangana kayi didi pankatshi pa kudilambula ne kubatijibua? (Tangila kabidi tshimfuanyi.)
5 Mmushindu kayi uudi mua kudilambula kudi Yehowa? Udi wenza disambila umulaya ne: neumutendelele anu yeye ne newikale wenza anu disua diende. Pashishe udi umulaya ne: neutungunuke ne kumunanga “ne muoyo webe wonso ne anyima webe yonso ne lungenyi luebe luonso ne bukole buebe buonso.” (Mâko 12:30) Udi udilambula kudi Yehowa pa nkayebe; kadi udi ulua kubatijibua ku mêsu kua bantu bua kubaleja ne: ukavua mudilambule. Didilambula diebe kudi Yehowa ki mmutshipu wa bilele to. Udi ne bua kuwukumbaja bualu mmusue bua uwukumbaje.—Muam. 5:4, 5.
Udi udilambula kudi Yehowa paudi usambila pa nkayebe, umulaya ne: neumutendelele anu yeye ne neudifile mu dienza dia disua diende (Tangila tshikoso 5)
NTSHINYI TSHIDI NE BUA KUKUSAKA BUA KUDILAMBULA?
6. Ntshinyi tshidi ne bua kukusaka bua kudilambula kudi Yehowa?
6 Udi mudilambule kudi Yehowa nangananga bualu udi mumunange. Dinanga adi ki ndimanyine anu pa mushindu uudi udiumvua to. Ndimanyine pa ‘dimanya diebe dijalame’ dia Yehowa ne dia dijinga diende. (Kolos. 1:9) Dilonga diebe dia Bible ndikujadikile ne: 1) Yehowa mmuntu mulelela, 2) Bible n’Dîyi diende difundisha ku nyuma, ne 3) udi ukumbaja disua diende lelu ku diambuluisha dia bulongolodi buende.
7. Mmalu kayi audi ne bua kuanji kuenza kumpala kua kudilambula?
7 Bantu badi badilambula kudi Yehowa badi ne bua kumanya malongesha a nshindamenu a mu Bible ne kuatumikila. Badi badienzeja kabidi bua kuambila bakuabu. (Mat. 28:19, 20) Mbafike ku dinanga Yehowa bikole ne badi ne dijinga dia kumutendelela anu yeye. Si ki mudibi buebe wewe? Bu muudi munange Yehowa nanku, kuakudilambula kudiye anyi kubatijibua anu bua kusankisha mulongeshi webe wa Bible anyi baledi bebe, peshi anu bua kuidikija balunda bebe to.
8. Mmunyi mudi dianyisha ditusaka bua kudilambula kudi Yehowa? (Misambu 116:12-14)
8 Wewe welangana meji a malu mimpe onso adi Yehowa mukuenzele, newikale ne dianyisha kudiye ne neudilambule kudiye. (Bala Misambu 116:12-14.) Mbikumbane mudi Bible ubikila Yehowa ne: Mufidi wa “dipa dionso dimpe ne dipa dionso dipuangane.” (Yak. 1:17) Dipa ditambe bunene didiye mufile mmulambu wa muanende Yezu Kristo. Anji elabi meji a malu mimpe adi mulambu eu utukumbajila. Mmukupeteshe mushindu wa kudia bulunda bukole ne Yehowa. Mmukupeteshe ditekemena dia kushala ne muoyo kashidi. (1 Yone 4:9, 10, 19) Kudilambula kudi Yehowa ngumue mushindu utudi tumuleja dianyisha bua mudiye mutunange bikole ne bua malu onso mimpe adiye mutuenzele. (Dut. 16:17; 2 Kol. 5:15) Mushindu wa kuleja dianyisha eu mbawuleje mu dilongesha dia 46, mu kamutu ka bualu 4, mu mukanda wa Shala ne muoyo kashidi! Mudi kabidi filme wa minite 3 wa Fila mapa ebe kudi Nzambi.
UKADI PABUIPI BUA KUDILAMBULA NE KUBATIJIBUA ANYI?
9. Bua tshinyi ki mbimpe bua wewe kudiumvua muenzejibue bua kudilambula?
9 Udi mua kudimona kuyi pabuipi bua kudilambula ne kubatijibua to. Pamuapa kutshidi malu audi ne bua kuakaja bua kutumikila mikenji ya Yehowa, peshi udi dijinga ne ndambu wa matuku bua kukolesha ditabuja diebe. (Kolos. 2:6, 7) Balongi bonso ba Bible kabatu baya kumpala ne lubilu lua muomumue to; ne ki mbana bonso badi badilambula ne babatijibua ne bidimu bungi bua muomumue to. Keba malu audi ne bua kuakaja mu nsombelu webe, kuyi udifuanyikija ne muntu mukuabu to.—Gal. 6:4, 5.
10. Wewe kuyi pabuipi bua kudilambula ne kubatijibua, ntshinyi tshiudi ne bua kuenza? (Tangila kabidi kazubu ka “Bana ba Bantemu.”)
10 Nansha kuyi pabuipi bua kudilambula kudi Yehowa, ikala anu ne bualu abu mu mutu. Lomba Yehowa diambuluisha bua wakaje malu adi akengela. (Filip. 2:13; 3:16) Ikala mutuishibue ne: neakuteleje ne neakuandamune.—1 Yone 5:14.
TSHIDI TSHIPANGISHA BAMUE
11. Mmunyi muatuambuluisha Yehowa bua kushala ne lulamatu kudiye?
11 Bamue bakadi pabuipi bua kudilambula ne kubatijibua batshidi anu belakana. Badi mua kuikala ne buôwa bua ne: badi mua kulua kuenza mpekatu panyima pa batismo wabu ne kuipatshibua mu tshisumbu. Wewe muikale ne buôwa abu, manya ne: Yehowa neakuambulushe bua ‘umone mua kuenda mu mushindu udi muakanangane nende.’ (Kolos. 1:10) Neakupeshe kabidi bukole bua kuenza tshidi tshiakane. Ke tshikadiye muenzele bantu bakuabu ba bungi. (1 Kol. 10:13) Ke bualu kayi anu bantu bakese ke batu bipatshibua mu tshisumbu. Yehowa utu wambuluisha bantu bende bua bashale anu ne lulamatu kudiye.
12. Tshia kuenza ntshiyi bua kubenga kuenza mpekatu munene?
12 Muntu yonso utu utetshibua bua kuenza malu mabi. (Yak. 1:14) Kadi wewe ke udi ne tshia kuenza kumpala kua diteta. Muntu yonso udi ne bua kusungula nsombelu udiye ne bua kuikala nende. Bamue batu bamba ne: kakuena mushindu wa kukanda majinga a kuenza malu mabi to. Kadi ndishima. Udi ne mushindu wa kuakanda. Nansha wewe kumpala kua diteta, kudi mushindu wa wewe kubenga kukulukamu. Bua kubenga kukulukamu, ikala usambila, udilongela Dîyi dia Nzambi pa tshibidilu, ubuela mu bisangilu, ne uya mu buambi. Wewe wenza malu aa pa tshibidilu, neupete bukole bua kushala ne lulamatu kudi Yehowa. Vuluka ne: Yehowa neikale anu ukuambuluisha.—Gal. 5:16.
13. Ntshilejilu kayi tshimpe tshidi Jozefe mutushile?
13 Wewe mudianjile kumanya tshia kuenza kumpala kua diteta, nebikale bipepele bua kushala ne lulamatu kudi Yehowa. Bible udi utela bantu ndambu bavua benze nanku nansha muvuabu pabu bapange bupuangane. Tshilejilu, mukaji wa Potifâ wakateta Jozefe misangu ne misangu bua kuenda nende masandi. Kadi Jozefe ukavua mudianjile kumanya tshivuaye mua kuenza bualu bua nunku buobu mua kumufikila. Bible udi wamba ne: “wakabenga,” kuambilaye mukaji au ne: “Mmunyi mundi mua kuenza bualu bubi bunene nunku, ne bushuwa kuenzela Nzambi mpekatu?” (Gen. 39:8-10) Ukavua mumanye tshia kuenza kumpala mene kua mukaji au kumuteta. Ke bualu kayi uvua mutantamene diteta adi bipepele.
14. Mmunyi mutudi mua kufika ku diepuka dienza malu mabi?
14 Mmunyi muudi mua kuidikija Jozefe? Dianjila kumanya ku mpindieu tshia kuenza pakutetabu. Ikala ubenga malu adi Yehowa mukine, kuikadi nansha utumaku meji to. (Mis. 97:10; 119:165) Dîba adi kuakuenza mpekatu pakutetabu to. Newikale mumanye tshiwenza.
15. Mmunyi muudi mua kuleja ne: udi ‘ukeba Yehowa ne muoyo mujima’? (Ebelu 11:6)
15 Pamuapa udi mutuishibue ne: ukadi mupete bulelela ne udi musue kuenzela Yehowa mudimu ne muoyo webe mujima, kadi utshidi udimona kuyi mukumbane bua kudilambula ne kubatijibua to. Udi pebe mua kulomba Yehowa anu bu mukalenge Davidi ne: “Nzambi wanyi, konkonona munda muanyi, ne umanye muoyo wanyi. Nkenketa, ne umanye meji adi antatshisha. Tangila bikala munda muanyi njila mubi, ne ndombola mu njila wa tshiendelele.” (Mis. 139:23, 24) Yehowa udi ubenesha bonso “badi bamukeba ne muoyo mujima.” Didienzeja diebe bua kudilambula ne kubatijibua didi dileja Yehowa ne: udi umukeba ne muoyo mujima.—Bala Ebelu 11:6.
TUNGUNUKA NE KUSEMENA PABUIPI NE YEHOWA
16-17. Bua Yehowa kukoka bana ba Bantemu kudiye, tshidibu ne bua kuenza ntshinyi? (Yone 6:44)
16 Yezu wakaleja ne: Yehowa ke udi ukoka bayidi bende kudiye. (Bala Yone 6:44.) Ela meji mudi bualu bua mushinga ebu bukutangila pebe! Yehowa udi umona ngikadilu mimpe idi nayi muntu yonso udiye ukoka kudiye. Udi umona muntu yonso bu tshintu “tshiende tshia pa buatshi,” anyi bu “tshintu tshiende tshia mushinga mukole.” (Dut. 7:6; dim.) Ke mudiye ukumona pebe.
17 Pamuapa utshidi nsonga, baledi bebe Bantemu. Udi mua kumona bu ne: udi wenzela Yehowa mudimu anu bualu baledi bebe mBantemu, kadi kabiyi ne: bualu Yehowa mmukukoke kudiye to. Nansha nanku, Bible udi wamba ne: “Semenayi pabuipi ne Nzambi ne yeye neasemene pabuipi nenu.” (Yak. 4:8; 1 Kul. 28:9) Paudi utuadija kusemena pabuipi ne Yehowa, udi pende usemena pabuipi nebe. Yehowa kena ukukoka anu bualu udi munkatshi mua bakuabu to. Udi ukoka muntu yonso too ne udi mu dîku dia Bantemu. Padi muntu au utuadija kusemena pabuipi ne Yehowa, Yehowa udi usemena pende pabuipi nende anu mudi Yakobo 4:8 uleja.—Fuanyikija ne 2 Tesalonike 2:13.
18. Ntshinyi tshituamona mu tshiena-bualu tshialonda? (Misambu 40:8)
18 Paudi udilambula kudi Yehowa ne ubatijibua, udi uleja muudi ne meji a Yezu. Wakadifila kudi Tatuende ne muoyo mujima bua kuenza tshionso tshivuaye umulomba. (Bala Misambu 40:8; Eb. 10:7) Mu tshiena-bualu tshialonda, netumone muudi mua kutungunuka ne kuenzela Yehowa mudimu ne lulamatu panyima pa batismo webe.
NEWANDAMUNE MUNYI?
Kudilambula kudi Yehowa kudi kumvuija tshinyi?
Bua tshinyi kuikala ne dianyisha kudi Yehowa kudi ne mushinga bua wewe kudilambula kudiye?
Tshia kuenza ntshinyi bua kubenga kuenza mpekatu munene?
MUSAMBU WA 38 Neakukoleshe