Tshia-bupikudi tshia Kristo​—Njila wa lupandu wa Nzambi

“Nzambi wakananga ba pa buloba bikole e kubapa Muanende umuepele mulela bua eu yonso udi uleja ditabuja kudiye kabutudibu kadi apete muoyo wa kashidi.”​—YONE 3:16, NW.

1, 2. Umvuija nsombelu wa lutatu wakafikila dîku dia bukua-bantu.

ELA meji ne: udi ne disama didi dilomba bua bakupande, tshianana didi ne bua kukushipa bushuwa. Udi mua kumvua bishi bikala makuta adibu balomba bua kukupanda mapite audi nawu? Newenze tshinyi bikala nansha makuta masangisha kudi dîku ne balunda bebe kaayi mua kukumbana bua kufuta? Kupeta nsombelu mukole udi uteka muoyo mu njiwu mushindu’eu kutu kutekesha mu mikolo!

² Muanda eu udi uleja nsombelu udi mufikile dîku dia bukua-bantu. Baledi betu ba kumpala, Adama ne Eva, bavua bafukibue bapuangane. (Dutelonome 32:4) Bavua ne ditekemena dia kuikala ne muoyo kashidi ne kukumbaja dilongolola dia Nzambi dia se: ‘Nulelangane, nukumbane ba bungi, nûje buloba tente; nubukokeshe.’ (Genese 1:28) Kadi Adama ne Eva bakatombokela Mufuki wabu. (Genese 3:1-6) Bupidia buakalela mpekatu ki ng’anu buabu buobu nkayabu to, kadi bua ndelanganyi yabu kabidi ivua kayiyi mianji kuledibua. Amu bu muakalua kuamba muena lulamatu Yobo ne: ‘Udi mua kupatula muntu muakane ku muntu udi kayi muakane nnganyi? Kakuena muntu’ nansha.​—Yobo 14:4.

3. Mmunyi muvua lufu lutangalake mu bantu bonso?

³ Nenku mpekatu udi bu disama didi dikuate yonso wa kutudi, bualu Bible udi wamba ne: “bonso bakenza malu mabi.” (Disendamija miaku ndietu.) Nsombelu eu udi ne bipeta bidi biteka muoyo mu njiwu. Bushuwa, “difutu dia bubi ndufu.” (Lomo 3:23; 6:23) Muntu nansha umue wa kutudi kêna mua kulunyema to. Bantu bonso batu benza mpekatu, ke bualu kayi bonso badi bafua. Bu mutudi ndelanganyi ya Adama, tuvua baledibue mu nsombelu eu wa lutatu. (Musambu 51:5) Paulo wakafunda ne: ‘Bubi buakalua pa buloba bualu bua muntu umue, ne lufu luakalua bua bubi abu, nunku lufu luakafika kudi bantu bonso, bua bonso bakenza malu mabi.’ (Lomo 5:12) Kadi bualu ebu kabuena bumvuija ne: tudi bapangile ditekemena bua kupeta lupandu nansha.

Dijikija mpekatu ne lufu

4. Bua tshinyi bantu kabena mua kujikija masama ne lufu buobu nkayabu?

⁴ Ntshinyi tshivua tshikengedibua bua kujikija mpekatu ne lufu ludiye mukebeshe? Ntshintu kampanda tshipite tshionso tshidi muntu mua kufila. Mufundi wa misambu wakasambana ne: ‘Bualu bua mushinga wa kupikula nawu mioyo yabu udi mukole, udi upanga kukumbana tshiendelele, bua yeye ashale ne muoyo tshiendelele, bua kamonyi biende dijimba dia bafue.’ (Musambu 49:8, 9) Bushuwa, tudi mua kulepesha muoyo wetu bua bidimu bikese ku diambuluisha dia biakudia ne luondapu luimpe, kadi muntu nansha umue wa kutudi kêna mua kuondapa mpekatu utudi bapiane. Muntu nansha umue wa kutudi kêna mua kushintulula bipeta bibi bia dikulakaja ne kupingaja mubidi wetu ku bupuangane buvua Nzambi muulongoluele ku tshibangidilu to. Bushuwa Paulo kavua unekesha pakafundaye ne: bua mpekatu wa Adama, bifukibua ‘biakatekibua kunyima kua malu a patupu’​—anyi bu mudi nkudimuinu kampanda wandamuna, “bavua babivuije kabiyi mua kufika ku tshipatshila tshiabi.” (The Jerusalem Bible) (Lomo 8:20) Diakalenga, Mufuki ki mmutulekele to. Mmulongolole bua kumbusha mpekatu ne lufu musangu umue bua kashidi. Mushindu kayi?

5. Mmunyi muvua Mikenji mipesha Isalele ileja diditatshisha dikole bua buakane?

⁵ Yehowa udi “unanga buakane ne kulumbulula kuakane.” (Musambu 33:5) Mukanda wa Mikenji yakapeshaye Isalele udi uleja diditatshisha dikole bua nkatshinkatshi ne buakane. Tshilejilu, mu mikenji eyi, tudi tubala ne: ‘bavua ne bua kufila muoyo ku muoyo.’ Mu mêyi makuabu, pavua muena Isalele ushipa muntu, uvua ne bua kujimija muoyo wende pa muaba wa udiye mushipe. (Ekesode 21:23; Nomba 35:21) Nenku bavua ne bua kukumbaja tshivua buakane bua Nzambi bulomba.​—Tangila Ekesode 21:30.

6. (a) Mmu ngumvuilu kayi muvua Adama mua kubikidibua ne: mushipianganyi? (b) Mmuoyo wa mushindu kayi wakajimija Adama, ne mmulambu wa mushindu kayi uvua ukengedibua bua kukumbaja tshivua buakane bulomba?

⁶ Pakenza Adama mpekatu, wakalua mushipianganyi. Mu ngumvuilu kayi? Mu ngumvuilu wa se: uvua ne bua kusambulujila ndelanganyi yende yonso mpekatu ne lufu. Lelu wa bandaye eu, bua bupidia bua Adama mibidi yetu idi yenda inyanguka, mitangile ne lukasa mu lukita. (Musambu 90:10) Mpekatu wa Adama udi mene ne diumvuija ditambe bunene. Vuluka ne: tshivua Adama mujimije buende yeye ne bua ndelanganyi yende katshivua muoyo wa pa tshibidilu wa bidimu bitue ku 70 anyi 80 nansha. Wakajimija muoyo mupuangane​—bushuwa, muoyo wa kashidi. Nenku bikala ‘muoyo uvua ne bua kufua bua muoyo mukuabu,’ mmuoyo wa mushindu kayi uvuabu ne bua kufila bua kuikale buakane mu muanda eu? Mbiumvuike ne: uvua ne bua kuikala muoyo mupuangane wa bumuntu​—muoyo uvua, bu wa Adama, muikale ne bukole bua kupatula ndelanganyi mipuangane. Pavuabu baufila bu mulambu, muoyo mupuangane wa bumuntu uvua ne bua kukumbaja tshivua buakane bulomba, ne uvua kabidi ne bua kufila mushindu wa kujikija bua kashidi mpekatu ne lufu ludiye mukebeshe.

Difuta mushinga wa mpekatu

7. Fila diumvuija dia muaku “tshia-bupikudi.”

⁷ Bible udi wakula bua mushinga mulomba bua kutupikula ku mpekatu bu “tshia-bupikudi.” (Musambu 49:7, NW) Muaku eu udi mua kufunkuna difutu didi mukuatshianganyi ulomba bua kulekela muntu udiye mukuate. Bushuwa, tshia-bupikudi tshidi Yehowa mufile ki mmutshifile bualu mbakuate muntu kampanda nansha. Kadi lungenyi lua difuta mushinga ludi anu lua muomumue. Bushuwa, muaku wa pa muanda mufume ku muaku wa tshiena-Ebelu mukudimuna ne: “kupikula” udi umvuija ku muaku ku muaku “kufuta.” Bua kubuikila mpekatu, tshia-bupikudi tshidi ne bua kukumbanangana bimpe ne tshiditshi ne bua kubuikila​—muoyo mupuangane wa bumuntu wa Adama.

8. (a) Umvuija dîyi-diludiki dia disumba tshiakabidi. (b) Mmunyi mudi dîyi-diludiki dia disumba tshiakabidi ditutangila tuetu benji ba mpekatu?

⁸ Muanda eu udi umvuangana ne dîyi-diludiki didi mu Mikenji ya Mose​—dîyi-diludiki dia disumba tshiakabidi. Pavua muena Isalele ulua mupele ne udisumbisha bu mupika kudi muntu uvua kayi muena Isalele, mulela wende uvua mua kumusumba tshiakabidi (anyi kumupikula) pa kufuta mushinga uvuabu bamona muikale wa muomumue ne wa mupika. (Lewitiki 25:47-49) Bible udi wamba ne: mutudi bantu bapange bupuangane tudi ‘mu bupika bua bubi.’ (Lomo 6:6; 7:14, 25) Ntshinyi tshivua tshikengedibua bua kutusumba tshiakabidi? Anu bu mutudi bamone, dijimija muoyo mupuangane wa bumuntu divua ne bua kulomba difuta muoyo mupuangane wa bumuntu​—kauyi mupite, kauyi mushadile.

9. Mmunyi mudi Yehowa mulongolole bua kubuikila mpekatu?

⁹ Bushuwa, tuetu bantu tudi baledibue bapange bupuangane. Muntu nansha umue wa kutudi kêna muomumue ne Adama; muntu nansha umue wa kutudi kêna mua kufuta mushinga wa tshia-bupikudi udi buakane bulomba nansha. Anu bu mutudi baleje ku ntuadijilu, mbienze anu bu se: tudi ne disama dia lufu ne katuena mua kufuta makuta a luondapu bua kutupandabu. Mu nsombelu bu eu, katuakuikalaku ne dianyisha biatuambuluisha muntu mukuabu ne kufuta makuta au anyi? Etshi ke tshidi Yehowa muenze bushuwa! Mmulongolole bua kutupikula ku mpekatu bua kashidi ne tshiendelele. Eyowa, mmudiakaje bua kutupesha tshituvua tuetu nkayetu katuyi mua kukokesha. Paulo wakafunda ne: ‘Dipa dia Nzambi mmuoyo wa tshiendelele mu Kristo Yezu Mukalenge wetu.’ (Lomo 6:23) Yone wakumvuija Yezu bu ‘Muan’a mukoko wa Nzambi, udi umusha bubi bua ba pa buloba.’ (Yone 1:29) Tumonayi muvua Yehowa muenze mudimu ne Muanende munangibue bua kufuta mushinga wa tshia-bupikudi.

“Tshia-bupikudi tshiakanangane”

10. Mmunyi muvua milayi ivua itangila “dimiinu” mifike ku dimanyina pa Yosefe ne Mariya?

¹⁰ Diakamue panyima pa buntomboji bua mu Edene, Yehowa wakamanyisha dilongolola diende dia kupatula “dimiinu” anyi kankanunuina, kavua ne bua kupikula bukua-bantu ku mpekatu. (Genese 3:15, NW) Ku diambuluisha dia malu avuaye usokolola ku musangu ne ku musangu, Yehowa wakaleja dîku divua ne bua kupatula dimiinu edi. Ku ndekelu, malu masokolola aa akalua kuimanyina pa Yosefe ne Mariya, babangilangana bavua basombele mu Palestine. Bakambila Yosefe mu tshilota ne: Mariya uvua mupete difu ku spiritu munsantu. Muanjelu wakamba ne: ‘Yeye nealele muana mulume, umuidike ne: Yezu, bualu bua yeye neasungile bantu bende ku mibi yabu.’​—Matayo 1:20, 21.

11. (a) Mmunyi muakalongolola Yehowa bua Muanende kuledibuaye bu muntu mupuangane? (b) Bua tshinyi Yezu uvua ne mushindu wa kufila “tshia-bupikudi tshiakanangane”?

¹¹ Edi kadivua difu dia pa tshibidilu nansha, bualu Yezu uvua muikale ne muoyo mu diulu. (Nsumuinu 8:22-31; Kolosai 1:15) Muoyo wende uvua mutentemuna ku bukole bua Yehowa mu tshishima ne kuwelaye mu difu dia Mariya, kuluabi bipepele bua Muana eu munangibue wa Nzambi kuledibuaye bu muntu. (Yone 1:1-3, 14; Filipoi 2:6, 7) Yehowa wakalombola malu bua se: mpekatu wa Adama katampakenyi Yezu. Nenku Yezu wakaledibua mupuangane. Uvua ne tshintu tshivua Adama mujimije​—muoyo mupuangane wa bumuntu. Ndekelu wa bionso, yeye ke muntu uvua mua kufuta mushinga wa mpekatu! Ne bushuwa ke tshiakenza Yezu mu dia 14 Nizan 33 B.B. Mu dituku adi diende lumu, Yezu wakitaba bua kumushipabu kudi baluishi bende, pa nanku kufilaye “tshia-bupikudi tshiakanangane.”​—1 Timote 2:6, NW.

Mushinga wa muoyo mupuangane wa bumuntu

12. (a) Umvuija dishilangana dinene didi pankatshi pa lufu lua Yezu ne lua Adama. (b) Mmunyi mudi Yezu mulue “Tatu wa Tshiendelele” bua bantu bena butumike?

¹² Kudi dishilangana pankatshi pa lufu lua Yezu ne lua Adama​—dishilangana didi dileja mushinga wa tshia-bupikudi. Lufu lua Adama luvua lumukumbanyine, bualu wakabenga kutumikila Mufuki wende ku budisuile. (Genese 2:16, 17) Kadi lufu lua Yezu kaluvua lumukumbanyine nansha kakese, bualu “kakenza bualu bubi.” (1 Petelo 2:22) Nenku pakafua Yezu, uvua ne tshintu tshia mushinga mupite bunene tshivua Adama muenji wa mpekatu kayi natshi pakafuaye​—bukenji bua kuikala ne muoyo mupuangane wa bumuntu. Nenku lufu lua Yezu luvua ne mushinga wa mulambu. Diakamue pakabandaye mu diulu bu muntu wa mu nyuma, wakafila mushinga wa mulambu wende kudi Yehowa. (Ebelu 9:24) Mu dienza nenku, Yezu wakasumba bantu bena mpekatu ne wakalua Tatuabu mupiamupia pa muaba wa Adama. (1 Kolinto 15:45) Ne kabingila kashindame Yezu mmubikila ne: “Tatu wa Tshiendelele.” (Yeshaya 9:6) Ela meji bua tshidi bualu ebu bumvuija! Adama, tatu muena mpekatu, wakatangalaja lufu mu ndelanganyi yende yonso. Yezu, Tatu mupuangane, udi wenza mudimu ne mushinga wa mulambu wende bua kupesha bantu ba butumike muoyo wa tshiendelele.

13. (a) Umvuija muvua Yezu mujikije dibanza dibuela kudi Adama. (b) Bua tshinyi mulambu wa Yezu kawena ubuikidila baledi betu ba kumpala mpekatu wabu?

¹³ Kadi mmunyi muvua lufu lua muntu umue patupu mua kubuikila mpekatu ya bantu ba bungi? (Matayo 20:28) Kukadi ndambu wa bidimu, mu tshiena-bualu kampanda tuakumvuija tshia-bupikudi mushindu’eu: “Ela meji ne: kudi tshiapu tshinene tshikale ne nkama ya bena mudimu. Mulombodi kampanda mupange bululame udi utshiombesha tshiapu etshi, ne tshidi tshikanga midimu yatshi. Mpindieu bantu nkama mivule kabena ku mudimu ne kabena ne mushindu wa kufuta mabanza adibu nawu to. Bena mabaka nabu, bana, ne nansha bantu badibu ne bua kufuta mabanza, bonso badi bakenga bua bubi bua muntu umue eu! Pashishe mubanji mukuabu wa muoyo muimpe udi ulua, ufuta dibanza dia kumpanyi eu ne unzulula tshiakabidi midimu ya tshiapu etshi. Nenku dijikija dia dibanza kudi muntu au didi difila disulakana dinene kudi bena mudimu bonso aba, mêku abu ne bantu bavuabu ne bua kufuta mabanza. Kadi mulombodi wa kumpala udi upeta pende tshintu mu dilongoloka edi dipiadipia dia malu anyi? Tòo, udi mu buloko ne muipata ku mudimu bua kashidi! Bia muomumue, dijikija dia dibanza dimue dia Adama didi dituadila miliyo mivule ya ndelanganyi yende masanka​—kadi kadiena dituadila Adama masanka nansha.”

14, 15. Bua tshinyi tudi mua kubikila Adama ne Eva bu benji ba mpekatu ku budisuile, ne mmunyi mudi nsombelu wetu mushilangane ne wabu?

¹⁴ Bualu ebu mbuakane. Vuluka ne: Adama ne Eva bavua benze mpekatu ku budisuile. Bakasungula bua kubenga kutumikila Nzambi. Bua nanku tudi baledibue mu mpekatu. Katuena ne tshitudi mua kuenza. Nansha tuetu benze munyi, katuena mua kuepuka kashidi dienza mpekatu nansha. (1 Yone 1:8) Imue misangu tudi mua kumvua bu Paulo, wakafunda ne: ‘Pandi musue kuenza bimpe, bubi budi nanyi. Ndi nsanka munda muanyi bua mikenji ya Nzambi, kadi ndi mmona mukenji mukuabu mu mubidi wanyi udi uluangana ne mukenji wa mu meji anyi, ne udi umbueja mu bupika bua mukenji wa bubi udi mu mubidi wanyi. Ke meme muena majiya!’​—Lomo 7:21-24.

¹⁵ Kadi tudi ne ditekemena bua tshia-bupikudi! Anu bu muvua Nzambi mulaye, Yezu udi dimiinu, ne ku diambuluisha diende “bisamba bionso bia pa buloba nebidibeneshe bushuwa.” (Genese 22:18, NW; Lomo 8:20) Mulambu wa Yezu udi unzuluila bantu badi baleja ditabuja kudiye tshiibi bua bapete masanka. Tumonayi amue a kudiwu.

Tupetelayi masanka ku tshia-bupikudi tshia Kristo

16. Nansha mutudi bena mpekatu, mmasanka kayi atudi mua kupeta mpindieu bua tshia-bupikudi tshia Yezu?

¹⁶ Yakobo, umue wa ku bafundi ba Bible, udi witaba ne: “buonso buetu tudi tulenduka mu malu a bungi.” (Yakobo 3:2) Kadi bua tshia-bupikudi tshia Kristo, badi mua kutufuila luse bua bilema bietu. Yone udi ufunda ne: ‘Bienza muntu bibi, tudi ne muakuidi kudi Tatu, Yezu Kristo udi muakane; ne yeye udi mulambu wa kubuikila nawu mibi yetu.’ (1 Yone 2:1, 2) Bushuwa, katuena ne bua kupepeja mpekatu to. (Yuda 4; tangila 1 Kolinto 9:27.) Kadi bituapambuka, tudi mua kupumuina Yehowa mutshima wetu, bashindike ne: udi ‘musue kutubuikidila.’ (Musambu 86:5; 130:3, 4; Yeshaya 1:18; 55:7; Bienzedi 3:19) Nenku tshia-bupikudi tshidi tshituambuluisha bua kuenzela Nzambi mudimu ne kuondo ka muoyo kakezuke ne tshitupesha mushindu wa kusemena kudiye mu masambila mu dîna dia Yezu Kristo.​—Yone 14:13, 14; Ebelu 9:14.

17. Mmabenesha kayi atuapeta mu matuku atshilualua bua tshia-bupikudi?

¹⁷ Tshia-bupikudi tshia Kristo tshidi tshiunzulula njila bua dilongolola dia Nzambi kukumbanadi: bua bantu bena butumike bikale ne muoyo wa kashidi mu Mparadizu pa buloba. (Musambu 37:29) Paulo wakafunda ne: “Nansha milayi ya Nzambi mikale bungi kayi, mmilue Eyowa ku diambuluisha [dia Yezu].” (2 Kolinto 1:20, NW) Bulelela, lufu ‘ndukokeshe bu mukalenge.’ (Lomo 5:17, NW) Tshia-bupikudi tshidi tshifila nshindamenu bua Nzambi kubutulaye “muena lukuna [eu] wa kunshikidilu.” (1 Kolinto 15:26; Buakabuluibua 21:4) Tshia-bupikudi tshia Yezu tshidi mene mua kupetesha bantu bakadi bafue masanka. Yezu wakamba ne: “Dîba didi dilua diumvua aba bonso badi mu nkita ya tshivulukidi dîyi diende [dia Yezu] ne diapatukabu.”​—Yone 5:28, 29, NW; 1 Kolinto 15:20-22.

18. Mpekatu mmutuadile bantu tshipeta kayi tshibi, ne mmunyi muashintuluka muanda eu mu bulongolodi bupiabupia bua Nzambi?

¹⁸ Ela meji muikalabi bitusankisha bua kuikala ne muoyo bu muvuabi bilongolola​—kakuyi tunyinganyinga tudi tutuzengeje lelu’eu! Mpekatu mmutupangishe mua kumvuangana ki ng’anu ne Nzambi, kadi ne lungenyi luetu, mutshima ne mubidi wetu kabidi. Nansha nanku, Bible udi ulaya ne: mu bulongolodi bupiabupia bua Nzambi, “muena musoko kena wamba ne, Ndi ne disama.” Bushuwa, masama a ku mubidi ne a mu lungenyi kaakutatshisha kabidi bukua-bantu nansha. Bua tshinyi? Yeshaya udi wandamuna ne: ‘Bantu badi bashikamemu nebikale ne mibi yabu mijimijibue.’​—Yeshaya 33:24.

Tshia-bupikudi​—Tshijadiki tshia dinanga

19. Muntu pa nkayende, ntshinyi tshitudi mua kuenza bua tshia-bupikudi tshia Kristo?

¹⁹ Dinanga diakasaka Yehowa bua kutuma Muanende munangibue pa buloba. (Lomo 5:8; 1 Yone 4:9) Kabidi, dinanga diakasaka Yezu bua ‘kulabuila muntu yonso lufu.’ (Ebelu 2:9; Yone 15:13) Paulo uvua muambilemu pakafundaye ne: ‘dinanga dia Kristo didi dituenzeja. Yeye wakafuila bonso bua badi ne muoyo kabikadi nawu bua bualu buabu nkayabu, kadi bikale nawu [bua] yeye wakafua ne wakabika ku lufu kabidi bua bualu buabu.’ (2 Kolinto 5:14, 15) Bituikala ne dianyisha bua muanda wakatuenzela Yezu, katuakupapisha muoyo nansha. Tuamba eku tuela eku, tshia-bupikudi tshidi tshifila mushindu wa kutupikula ku lufu! Bushuwa katuakujinga bua kuleja ku bienzedi bietu ne: tudi tuangata mulambu wa Yezu ne mushinga mukese.​—Ebelu 10:29.

20. Mmu imue mishindu kayi mutudi mua kutumikila “diyi” dia Yezu?

²⁰ Mmunyi mutudi mua kuleja dianyisha dia muoyo mujima bua tshia-bupikudi? Katupa kîpi kumpala kua kumukuatabu, Yezu wakamba ne: “Bikala muntu munnange, neatumikile diyi dianyi.” (Yone 14:23, MML) “Diyi” dia Yezu didi dikonga bualu budiye muambe bua se: tudifile ne lukunukunu mu dikumbaja mudimu eu: ‘Yayi bienu, nuvuije ba bisamba bionso bayidi, nubabatize.’ (Matayo 28:19) Ditumikila Yezu didi kabidi dilomba bua tuleje bana betu ba mu nyuma dinanga.​—Yone 13:34, 35.

21. Bua tshinyi tudi ne bua kubuela mu musekelelu wa Tshivulukilu tshia mu dia 1 Tshisanga?

²¹ Umue wa ku mishindu mitambe bulenga itudi mua kuleja dianyisha bua tshia-bupikudi ng’wa kubuela mu Tshivulukilu tshia lufu lua Yezu, tshikala mua kuenzeka tshidimu etshi mu dia 1 Tshisanga.a Muanda eu udi kabidi “dîyi” dia Yezu, bualu pakajadikaye musekelelu eu, Yezu wakatumina balondi bende dîyi ne: “Tungunukayi ne kuenza nenku bua kumvuluka.” (Luka 22:19, NW) Tuetu bikalapu penzeka muanda eu wa mushinga mukole ne bikale ne ntema mikole ku bionso bivua Kristo muambe, netuleje ne: tudi batuishibue bikole bua se: tshia-bupikudi tshia Yezu nnjila wa lupandu wa Nzambi. Bushuwa, ‘mu munga muntu kamuena lupandu.’​—Bienzedi 4:12.

[Mêyi adi kuinshi]

Udi muvuluke anyi?

◻ Bua tshinyi bantu kabena mua kubuikila mpekatu yabu?

◻ Mmu mushindu kayi mudi Yezu muikale “tshia-bupikudi tshiakanangane”?

◻ Mmunyi muvua Yezu muenze mudimu ne bukenji buende bua kuikala ne muoyo mupuangane wa bumuntu bua diakalenga dietu?

◻ Mmabenesha kayi adi bukua-bantu bupeta bua tshia-bupikudi tshia Kristo?

[Tshimfuanyi mu dibeji 15]

Anu muntu mupuangane​—wa muomumue ne Adama​—ke uvua mua kukumbaja tshivua buakane bulomba

[Tshimfuanyi mu dibeji 16]

Bu muvua Yezu ne bukenji bua kuikala ne muoyo mupuangane wa bumuntu, lufu luende luvua ne mushinga wa mulambu