Nkonko ya babadi
Mmu ngumvuilu kayi muvua Muambi mupete anu “muntu mulume umue mujalame munkatshi mua tshinunu tshia bantu,” kadi kakuyi ‘muntu mukaji munkatshi muabu’?—Muambi 7:28.
Bua kumvua bimpe mêyi aa a kudi Nzambi, tudi ne bua kuanji kumanya mudi Nzambi umona bantu bakaji. Tshilejilu, Bible udi ubikila Luta mukaji wa muana wa Naomi ne: “Mukaji wa ngikadilu mimpe.” (Luta 3:11, MMM) Bilondeshile Nsumuinu 31:10, mukaji muimpe “mmupite mabue a busanga ku mushinga.” (MMM) Kadi ntshinyi tshivua Mukalenge Solomo musue kumvuija pakambaye ne: ‘Ngakasangana muntu mulume umue mujalame munkatshi mua tshinunu tshia bantu, kadi tshiakasangana muntu mukaji munkatshi muabu’?
Mvese idi kumpala idi ileja ne: bikadilu bibi bivua bitangalake bikole munkatshi mua bantu bakaji ba mu tshikondo tshia Solomo. (Muambi 7:26) Bivua mua kuikala nangananga bienzeke nanku bua bilele bibi bia bakaji ba bisamba bia bende bavua batendelela Bâla. Nansha Mukalenge Solomo wakalonda bilele bia bakaji bende bavule bavua kabayi bena Isalele. Bible udi wamba ne: ‘Wakadi ne bakaji nkama muanda mutekete, bana ba bakalenge ne bakaji bapika bakabakaye nkama isatu, ne bakaji bende bakakudimuna mutshima wende’ bua yeye kutendelela nzambi ya dishima. (1 Bakelenge 11:1-4) Bantu balume pabu kabavua ne bikadilu bimpe to, bualu muntu mulume mujalame umue munkatshi mua bantu tshinunu mmumue ne: kabavuaku ba bungi to. Solomo udi ujikija ne mêyi aa: ‘Ngakasangana anu bualu ebu bumue ne: Nzambi wakafuka bantu ne mitshima mijalame, kadi bobu bakadikebela malu a ngenyi yabu.’ (Muambi 7:29) Etshi ke tshitudi mua kuamba bua bukua bantu mu tshibungi tshiabu, kadi ki mbua kufuanyikija muntu mulume ne muntu mukaji to. Nenku, tudi ne bua kumvua mêyi a Solomo adi mu Muambi 7:28 bu diumvuija divuaye ufila bua ngikadilu uvua nende tshibungi tshia bantu mu tshikondo tshiende.
Kadi mvese eu udi mua kuikala ne diumvuija dikuabu. Udi mua kuikala kabidi ne diumvuija dia buprofete, bualu muntu mukaji katuku muanji kutumikila Yehowa tshishiki to. Kadi kukadi kumueneke muntu mulume wa nunku: Yezu Kristo.—Lomo 5:15-17.
[Tshimfuanyi mu dibeji 31]
‘Muntu mulume umue mujalame munkatshi mua tshinunu tshia bantu’