Anyisha mudimu webe wa tshijila

BUA KUFIKA ku dikumbaja tshipatshila kayi tshionso tshia mushinga, tudi ne bua kudilongolola bua kuitaba ntatu. Bua kulua doktere bidi biangata bidimu bia bungi bia dilonga ne dipangadika, ne makuta kabidi. Mudibidiji muende lumu mmujimije tshitupa tshinene tshia bunsonga buende mu didilongolola kakese kakese mu madibidija makole matambe mu dipatshila ne tshisumi dikumbanangana. Bia muomumue muimbi wa piano mupiluke udi ne bua kuvuluka bidimu bia didibidija dia tshisumi.

Kadi eku, kudi tshipatshila tshimue tshidi tshifuta mushinga mupite ne kule ntatu kayi yonso itudi mua kupeta. Ntshiepi atshi? Ndisanka dia pa buadi dia kuikala musadidi wa Mutambe Kutuumbuka, Yehowa Nzambi. Maditatshisha kayi wonso atudi mua kuenza: dîba, mfranga, anyi bukole, disanka dia pa buadi dia kukuatshila Mufuki wetu mudimu wa tshijila didi dituala mafutu adi kaayi mua kufuanyikijibua. Miaku ya mupostolo Paulo mmilelela. “Buimpe bua Nzambi budi ne mushinga muimpe mu malu onso, budi ne mulayi wa muoyo wa mpindiu ne wa muoyo ukadi ha kulua.” (1 Timote 4:8) Tumonayi mudibi bilelela.

Patudi diambedi tulonga bulelela pa Nzambi

Bavule badi bandamuna biakane ku lumu luimpe ne babanga kulonga Bible pamu’apa kabena diakamue bajingulula bualabale bua mashintuluka enzeka mu nsombelu yabo. Bangabanga, mulongi mupiamupia wa Bible udi mua kujimija bamue balunda badi kabayi mua kumvua bua tshinyi kêna kabidi wenda nabu mu bipatshila bidiye mpindieu mumanye ne: mbipetudi bia Nzambi. (1 Petelo 4:4) Bamue badi mua kupeta buluishi mu mêku abo ne badi mua kutapibua ku muoyo pa kumona aba bavuabo banange bikale baleja muêngu, nansha ne lukuna, kudi Yehowa. (Matayo 10:36) Atshi ndutatu lukole lutudi mua kupeta.

Ku mudimu wa ku mubidi anyi mu kalasa, kudi anu ntatu. Mulongi mupiamupia wa Bible nealekele kuya kunyima kua matuku mu mafesto ne bikuabo bibilu bia bulongolodi ebu. Kakuteleja kabidi muyuki ukêna mukezuke wa bena mudimu nende anyi bena mu kalasa nende, ne kakupingajilanga nabu kabidi mineku ya bundu nansha. Pamutu pa abi, neatete bua kutumikila didimuisha ditudi tupeta mu Efeso 5:3, 4 ne: “Tshiendenda tshia malunda mabi ne malu a bundu ne dikuma dia mutshima kabitedibu mene munkatshi muenu; ebu budi buimpe bua bansanto benze. Kanuikadi ne mei mabi ne tshiakulakula ne mineku ya bundu bidi kabî biakane; kadi nusakidile Nzambi.”

Mashintuluka a mushindu’eu adi mua kuvuija mulongi wa Bible mupiamupia bu muibi wa lupemba. Bidi mua kuikala bikole, nangananga bua bansonga batshidi mu kalasa. Bu mudibu batuilangana ne mafesto a bungi, bia muomumue ne malongesha mabengangane ne Nzambi, bu mudi dia didimenene dia bintu ne difimpakaja didi anuku bua kuenda ne tshibungi, bansonga bena nkristo badi ne bua kunanukila mvita ya ditabuja. Dilonda njila ya Nzambi nekubenze bashilangane ne kudi mua kupatula tuseku kudi balongi nabo ne balongeshi. Elu ndutatu lukole bua kuitaba nangananga mu bidimu bituadije ku dikumi ne bia mu njila, kadi dianyishibua kudi Nzambi didi ne mushinga kupita ntatu eyi.

Ntatu menemene anyi?

Bimue bintu bitu bimueneka bu ntatu bitu bikudimuka mabenesha. Bamue badi ne bua kulekela tshibidilu tshia makanya. (2 Kolinto 7:1) Bidi mua kuikala mvita, kadi ndibenesha kayipu pikala tshibidilu tshitambe bubi etshi tshitshimunyibue! Tshintu tshimue etshi tshidi mua kuambibua bua ditshimuna dia bupika bua bikuabo bintu bia lulengu anyi mala. Nnsombelu kayipu muakane udi kayi wa bibidilu binyangi! Bakuabo badi ne bua kulongolola malu a mabaka abo. Aba, badi basombe pamue kabayi mu dibaka badi ne bua kubakangana anyi kulekelangana. (Ebelu 13:4) Aba badi ne bakaji bavule badi ne bua kushala ne mukaji wa mu bunsongalume buabo. (Nsumuinu 5:18) Malongolola a mushindu’eu adi afila lutatu, kadi adi atuala ditalala ku nzubu.

Ela meji ku mafutu

Bushuwa, muntu kayi yonso udi utumikila mikenji ya Yehowa udi upeta bulelela masanka. Bu musangu wa kumpala mu muoyo wende, mulongi wa Bible mupiamupia udi utuadija kuakula ne Mufuki pa kutêla dîna diende, Yehowa. (Musambu wa 83:18) Bu mudiye mulonge pa malu a dikema adi Nzambi muenzele ne enzelaye bukua-bantu, mulongi udi ufika ku dinanga Yehowa. Mu matunga mudi ditshina dia bafue dia bungi, udi ujimija ditshina edi didi diluila ku bitabataba, bualu mmumanye ne: badi mu tulu tukole, bindile dibiishibua ku lufu. (Muambi 9:5, 10) Ne ndisulakana kayipu bua kujingulula se: Yehowa kêna ukengesha bantu mu inferno! Eyowa, bulelela budi bumupikula menemene.​—Yone 8:32.

Bu mudi mulongi eu wenda anu ukudimuna nsombelu wende bilondeshile mikenji ya Yehowa, udi upeta kuondo ka muoyo kakezuke ne didinemeka. Kulonga mua kuikala muena nkristo mulelela kudi kumuambuluisha bua kutabalela dîku diende bimpe, kudi kutuala musangelu ne disanka bia bungi. Pashishe kudi kabidi dibuela mu bisangilu mu Nzubu wa Bukalenge. Mbualu bua disanka kayipu! Emu mudi bantu badi baleja bushuwa dinanga dia musangelu didi Bible wamba ne: ke tshimanyinu tshia tshisamba tshia Nzambi. (Musambu wa 133:1; Yone 13:35) Miyuki yabo idi mikezuke ne yibaka bualu badi bakula “mianda minene ya Nzambi.” (Bienzedi 2:11) Eyowa, kupetangana ne “bana betu ba mu Kilisto” mmpokolo wa disanka. (1 Petelo 2:17) Bu-wetu bulenga bua mushindu’eu budi buambuluisha mulongi mupiamupia wa Bible bua “kuvuala bumuntu bupiabupia buakafukibua bilondeshile disua dia Nzambi mu buakane ne bulamatshi ku mikenji bilelela.”​—Efeso 4:24, NW.

Tshidia tshia didilambula

Padi muntu udiunda mu dimanya, udi ulua kusakibua kudi dinanga bua Yehowa bua kulambula muoyo wende kudiye ne kuleja tshimanyinu tshia didilambula edi mu batismo wa mâyi. (Matayo 28:19, 20) Mubelu wa Yezu udi ne: kumpala kua kuela tshidia etshi, balongi bende badi bapima mushinga. (Luka 14:28) Vuluka ne: muena nkristo mudilambule udi utêka disua dia Nzambi kumpala ne wêla bintu bia ku mubidi nyima. Udi uluangana bikole bua kulekela “midimu ya mubidi” ne kudima “mamuma a spiritu.” (Galatia 5:19-24, NW) Mpindieu, mubelu udi usanganyibua mu Lomo 12:2 [NW] udi upeta mudimu menemene mu nsombelu wende: “Kanulondi kabidi tshilejilu tshia bulongolodi ebu bua malu, kadi nuandamuke pa kupeta ngelelu mupiamupia wa meji bua numone mua kudijinguluila bidi Nzambi musue, bidi bimpe, bidi bimusankisha, ne bidiye musue tshishiki.” Nunku, muena nkristo mudilambule mu muoyo wende udi ne ngumvuilu mupiamupia wa bipatshila.

Kadi, tangila bidiye upeta. Tshimue udi mpindieu ne malanda pa nkayende ne Mufuki wa Bukua-mabulunge. Udi ulua muakane ne ulua mulunda wa Nzambi! (Yakobo 2:23) Ne diumvuija diondoke, udi wakula ne Nzambi bu “Tatu wetu udi mu diulu.” (Matayo 6:9) Dinga dibenesha bua mudilambule mupiamupia nkumanya ne: muoyo udi ne tshipatshila tshiawu menemene, ne udi wakaja nsombelu wende bua kuikalaye mu diumvuangana ne tshipatshila atshi. (Muambi 12:13) Mu kulonda bulombodi bua Yezu, udi mua kuleja ne: Diabolo mmuena dishima pa kushala ne lulamatu. Ndisanka kayipu bua mutshima wa Yehowa!​—Nsumuinu 27:11.

Bushuwa, bu mudi muena nkristo unanukila mu kajila ka lulamatu, kudi mikuabo ntatu. Bidi biangata dîba bua kudibueja mu kulonga kulelela kua Dîyi dia Nzambi muntu pa nkayende ne mu tshisumbu. (Musambu wa 1:1-3; Ebelu 10:25) Mêba a mudimu bua budimi adi ne bua kusumbibua mu mikuabo midimu. (Efeso 5:16) Bidi bikengela kabidi dîba ne madikolela bua kubuela mu bisangilu bia Bantemu ba Yehowa ne kuenza ngendu bua kubuela mu mpuilu mikese ne minene. Bidi mua kukengela didipua muoyo bua kudifila mu ditua Nzubu wa Bukalenge ne mudimu wa buambi pa buloba bujima nyama ku mikolo ne mfranga. Eyowa, anu bu mudi miliyo ya bena nkristo mua kujadika, kudifila ne muoyo wonso mu dienza bintu bia mushindu’eu kudi kufila disanka. Yezu wakamba ne: “Disanka dia kupa ndipite dia kupeta.”​—Bienzedi 20:35, Mukenji mulenga.

Mafutu adi afumina ku ditua mudimu wa Yehowa nyama ku mikolo mmapite ne kule ntatu itudi tupeta. Patudi tuenda tudiunda mu nyuma, mudimu wetu udi wenda upatula bipeta bimpe bia disanka divule. Bushuwa, kakuena tshintu tshidi mua kufila disanka kupita kulongesha muntu mukuabo bulelela bua mu Bible ne kumumona wangata dipangadika dia kutendelela Yehowa. Ne pikala mutendeledi mupiamupia muikale umue wa mu dîku dietu, pamu’apa mmuana udi mukolesha mu “manyoka pamue ne buludiki bua lungenyi bia Yehowa,” bidi bifila disanka dia bungi. (Efeso 6:4, NW) Tudi tumona mabenesha manene a Nzambi mu madikolela etu a kulua “benzejanganyi [nende] ba mudimu.”​—1 Kolinto 3:9, NW.

Makuabo mafutu a mudimu wa lulamatu

Bushuwa, netupete anu ntatu patshidi bulongolodi ebu bua malu buikalaku. Imue misangu, ntatu neyivue mikole mitambe bu mudi tshikondo tshia Diabolo tshienda tshiipidika. Tudi mua kupeta dikenga anyi kunanukila diteta, kadi dimanya dia se: Nzambi udi netu didi ditukankamija ne ditupetesha bukole bua kunanukila. (1 Kolinto 10:13; 2 Timote 3:12) Bamue bena nkristo netu mbananukile ngenzelu ya kanyawu mu bidimu bivule, kadi badi bananukila bualu bua dinanga diabo bua Yehowa. Aba badi balubuluka mu dinanukila dia mateta a mishindu mishilangane badi badiumvua bu bapostolo pavuabo bedibua mfimbu ne balekedibue pashishe. Bienzedi 5:41 udi ulonda ne: “Nenku, aba, bakaya pakumukabo kumpala kua Sanhédrin, benda basanka bua muvuabo bakumbanyine bua kukengeshibua bua dîna diende.”

Difutu dia dinanukila ndipite ne kule ntatu idiku mpindieu. Kadi uvuluka ne: lulamatu luondoke bua Nzambi “ludi ne mulayi” ki ng’anu wa “muoyo wa mpindieu to” kadi kabidi “wa muoyo udi ulua.” (1 Timote 4:8) Mmatuku malenga kayipu adi mindile eu udi unanukila! Biwikala ne lulamatu, neupanduke ku dikenga dinene didi tshimanyinu tshia nshikidilu wa bulongolodi bua malu ebu. Anyi wewe mufue kumpala kua muanda eu udi ushintulula malu, neubiishibue ku lufu mu bulongolodi bupiabupia bualonda. (Danyele 12:1; Yone 11:23-25) Ela meji ku didiumvua dia ditshionkomoka diwikala nadi dîba adi pawafika ku diamba ne: “Ku diambuluisha dia Yehowa, ngadipetshi!” Mmusangelu kayipu bua kupiana buloba abu, buikale “buwujibue tente ne dimanya dia Yehowa anu bu padi mâyi abuikila mbuu.”​—Yeshayi 11:9, NW.

Eyowa, Ndutatu bua kusadila Nzambi. Kadi pa kulufuanyikija ne mafutu, ndukese. (Filipoi 3:7, 8) Bua bionso bidi Nzambi muenzele basadidi mpindieu ne biabenzelaye kumpala eku, tudi tuambulula miaku ya kangimba ne: “Tshingapingajila Yehowa ntshinyi bua malu mimpe wonso adiye mungenzele?”​—Musambu wa 116:12, NW.