Tshimanyinu tshidi tshipetesha disungidibua
1 Kumpala kua kukumbaja malumbuluisha ende makane, Yehowa utu misangu yonso udimuija bukua-bantu ne upetesha badipuekeshi mushindu wa kupanduka. Mu tshikondo tshia Yehezekele, bamue bavua badilakana ne batua mikemu bua malu mabi avua enzeka. Yehowa wakenza malu mu mushindu wa se: aba bavua bakumbanyine batuibue tshimanyinu mu mpala bua kupanduka. (Yehez. 9:4-6) Lelu’eu, mudimu wa buambi utudi tuenza udi ne tshipatshila tshia muomumue. Tudi mua kuikala ne muaba wa mushinga.
2 Dipeta bantu bena muoyo mulenga didi amu tshiidia tshia kumpala. Tudi tudilongolola bua kualukila ne kubamona kabidi. Dilongolola dikumbulula didi dituadija amu musangu wa kumpala utudi bamone muntu pa kufunda tshitudi bashiye ne tshiena-bualu tshituakayukidilangana. Dilubuluka dia dikumbulula dietu nedimueneke bilondeshile mutuikala badilongolole mua kuamba ne kuenza.
3 Bituikala bashiye “Tshibumba tshia Nsentedi”, tudi mua kukoka ntema pa tshiena-bualu tshinene:
◼ “Bambisha ne: pa dibeji dia pa mutu dia Tshibumba tshia Nsentedi padi miaku eyi ‘Tshidi tshimanyisha Bukalenge bua Yehowa.’ Bualu bua pa buabu mu tshibejibeji etshi mbua se: tshidi tshishindika ne: Bukalenge bua Nzambi ndijandula dimuepele dia nshinga ya mu bulongolodi ebu. Tshidi tshiumvuija tshiakumbaja Bukalenge bua Nzambi penzeka disua dia Nzambi pa buloba. Ke lumu luimpe luamanyishibua pa buloba bujima, bilondeshile Yezu.” Bala Matayo 24:14, pashishe umvuija mushindu wa kupeta Tshibumba tshia Nsentedi pa tshibidilu ne kudiambuluisha natshi mu dilonga dia Bible dia muntu pa nkayende.
4 Imue misangu neujinge kukoka ntema ya muntu anu pa Bible nkayende ne kuleja mushinga wa kumubala pa tshibidilu. Udi mua kuamba ne:
◼ “Pamue ne bantu buonso batudi bamanye nebasanke kupeta mibelu mikumbanyine bua kujandula ntatu ya mu nsombelu wa matuku wonso. Mu kuebe kumona, mmuaba kayi utudi mua kupetela mibelu ya kueyemena? [Lekela muntu andamune.] Ba bungi bakitabija mibelu ya balunda babo peshi bakafuta bantu bapiluke bua kubapeshabo mibelu, kadi bakabungamijibua bikole. Apo, Miliyo ya bantu mbamone se: Bible mmpokolo umuepele wa mibelu ya kueyemena bushuwa. Bible udi umvuija mushindu wa kujandula ntatu kayi yonso. [Bala 2 Timote 3:16, 17.] Imue misangu udi wela meji se: Bible mmukole bua kumvua, kadi sankaku nkuleje mua wewe kupetamu tshiûma tshia mibelu ya lungenyi.” Bulula Bible mu dibeji difunda: “Index des mots bibliques les plus importants” ku ndekelu kua Traduction du monde nouveau, pa muaku “amour” (dinanga), ne angata imue mvese idi ileja mushindu udi dinanga mua kutuambuluisha bua kujandula bilumbu.
5 Ne tshipatshila tshia kutuadija dilonga dia Bible, neujinge imue misangu bua kuakula bua mukanda: “Udi mua kuikala ne muoyo wa kashidi pa buloba bukudimuna mparadizu” pa kutuadija diyukidilangana ne miaku eyi:
◼ “Tudi banange dîku dietu ne tudi tujinga kudipetesha bintu bia mulowo. Dîku diebe kadiena mua kusanka biapetadi nsombelu wa buena wa mu bulongolodi ebu anyi?” Leja bimfuanyi mu mabeji 156-7. Bala mvese umue anyi ibidi ne ushindike se: malaya aa mmenza kudi Yehowa Nzambi udi kayi mua kushima. Uleje muntu tshikebelu tshia nshapita, mu mabeji 5 ne 6, umuebeje biena-bualu bidi bitamba kumusankisha; bulula mukanda pa nshapita udiye musungule ne nukonkonone tshikoso tshimue anyi bibidi.
6 Neusanke kuambuluisha kampanda bua kupetaye tshimanyishilu tshiamupetesha disungidibua anyi? Bua kukumbaja mukenji eu, bidi bikengela ‘kukumbaja bimpe mudimu’ pa kudilongolola ne lubatshi ne kualukila pa lukasa bua kukumbula bantu badi ne dijinga dia kumanya bia bungi.—2 Tim. 4:5.