Makumbulula Matuile Ku Diambuluisha Dia Ndongeshilu Wa Tshishiki
1 Makumbulula ntshitupa tshia mushinga ne tshia disanka tshia mudimu wetu. Bua tshinyi kusuminyina mu dimonangana ne bantu badi baleja dijinga dia kumanya bia bungi? Ku diambuluisha dia mudimu wa dienza bayidi, dîna dia Yehowa didi dimanyika ne dienda lumu, ne aba badi batshina Nzambi badi bapeta diambuluisha didibu bakengela bua kupeta njila wa muoyo. (2 Kol. 2:17 too ne ku 3:3) Tuetu mua kumvua se: ditumbisha dia dîna dia Nzambi didi ne mushinga ne mioyo ya bantu idi mu njiwu, netuikale basakibue bua kudilongolola biakane kumpala kua kualukila kukumbula bantu.
2 Mulongeshi muimpe udi wambuluisha mulongi bua kuibakaye pa nshindamenu mumana kushikika. Amu bu mudi mulongeshi usakidila ku dituku ne ku dituku dimanya ku didi nadi balongi, tudi ne bua kusakidila mumvuija makuabu pa tshiena-bualu tshimue tshimue panyima pa dimonangana dia kumpala. Ebi bidi biambuluisha bua kulama dilunguluka dia ngenyi ne kulonda ngelelu wa meji mutungunuke.
3 Biwalukila panyima pa mumane kushiya broshire wa: “Dieu se soucie-t-il vraiment de nous?,” udi mua kuamba ne:
◼ “Musangu mushale, tuvua bayukidilangane bua ‘matuku a nshikidilu’ adi maleja mu Bible ne bua tshidiwu umvuija buetu tuetu. Kakuyi mpata, udi udiebeja tshidi tshituambuluisha bua kujadika se: tudi mu matuku a ku nshikidilu. (2 Tim. 3:1) Bayidi ba Yezu bavua balumba bua kupeta diandamuna ku lukonko elu. [Bala Matayo 24:3.] Mu diandamuna diende Yezu wakamanyisha nsombelu utudi tumona lelu’eu, makenga ne tshinyangu tshitambe tshia bikondo kayi bionso.” Zangika malu a mu tshimanyinu maleja mu bikoso 3 ne 4, dibeji dia 19. Bikala muntu muanyishe, umuleje malu makuabu a mu tshimanyinu maleja mu tshikoso 5 too ne ku tshia 8, dibeji dia 20. Umuebeja bua kualukila ne kuandamuna ku nkonko mijula mu dibeji dia kumpala dia broshire.
4 Bua kulama dijinga dia kumanya bia bungi dia muntu pa broshire wa: “Quel est le but de la vie? Comment le découvrir?” udi mua kuamba ne:
◼ “Ndi njinga bua tuetu kuambulula diyuki dietu pa tshipatshila tshia muoyo. Kakuyi mpata, udi witabuja se: Nzambi uvua musue kutumona ne nsombelu wa disanka ne ditalala pa buloba, ki mmunkatshi mua tshimvundu tshitudi tumona nansha. Udi wela meji se: neakumbaje dilaya diende anyi?” Lekela muntu andamune. Bala Yeshaya 55:11, pashishe nuyukidilangane pa ngenyi ya mu tshikoso tshia 25 too ne ku tshia 27, dibeji dia 30. Uleje ne: dilonga dia Bible ke mushindu mulenga wa kupetesha muoyo wetu tshipatshila tshilenga.
5 Bua kulama dijinga dia kumanya bia bungi dikebesha kudi broshire wa: “Ikalayi ne muoyo wa kashidi ne disanka pa buloba!” tudi mua kuleja kabidi broshire ne kuamba ne:
◼ “Tuvua bakule bua bulongolodi bulenga buleja pa tshizubu tshia broshire eu. Ndi mulue kukumvuija bua tshinyi bidi ne mushinga bua aba badi bajinga kusomba muaba wa mushindu’eu kuikalabu ne ditabuja kudi Yezu.” Leja tshimfuanyi tshia 41 ne bala Yeshaya 9:6. Pa tshimfuanyi tshia 62, bala Yone 3:16 ne uzangike mushinga wa kuikala ne butumike. Umvuija ne: Bantemu ba Yehowa badi bambuluisha bantu; badi babalongesha mushindu wa kuikala ne ditabuja pa kulonga Bible ne kuenza madikolela bua kutumikila mibelu idimu.
6 Ukonkonone dikumbulula dionso bua se: wakaje ndongeshilu webe. Udiebeje ne: Mvuaku ne bualu bujalame mu lungenyi bua kuamba anyi? Ndiku mukoke ntema ya muntu pa Bible anyi? Ndiku muibake pa nshindamenu mishikika pa dîba dia dimonangana dia kumpala anyi? Difila dianyi dia bumanyishi divua dilongolola mu mushindu wa kutuadija dilonga dia Bible anyi? Bituikala mua kuandamuna eyowa ku nkonko eyi, tudi tuenza bushuwa muetu muonso bua kuikala balongeshi bimpe ba Dîyi dia Nzambi.