Tuenzelayi Muntu Netu Bimpe Pa Kulondakaja Dijinga Kayi Dionso Dia Kumanya Bia Bungi

 ¹ Mpa bualu kayi patudi tupangadija bua kushila mutuyukidishi kampanda mukanda? Mpa bualu bua mushinga ebu: dijinga diende dia kumanya bia bungi. Bua bualu bumue bumue ebu tudi tualukila bua kutangila bantu. Padi muntu uleja patoke dijinga diende, nansha dikese, dia kumanya bia bungi pa mukenji wa Bukalenge, tudi ku budisuile tuenza muetu muonso bua kumuenzela bimpe. Nenku tudi tuenza dikumbulula, tuipatshila bua kukuba dijinga diende ne kutuadija dilonga dia Bible. Etshi ke tshipatshila tshietu nansha bituabenga kushiya mukanda. Mmushindu kayi wa kuenza?

 ² Bikala diyuki dietu dia musangu mushale divua dishindamene pa diasakanja dia ntatu ya mu dibaka ne bituikala bashiye mukanda wa “Muoyo wa kashidi,” tudi mua kutuadijilula diyuki nunku:

◼ “Mu dikumbula dianyi dia musangu mushale, tuakakula bua dibaka ne bua mibelu ya mu Bible idi mua kututuadila disanka. Kuenaku wela meji ne: nansha mêku mapita bulenga adi imue misangu apetangana ne bilumbu anyi? [Lekela muntu andamune.] Bible udi ufila mibelu mimpe mitambe pa mushindu wa kujandula ntatu ya mu dîku. Bidi bia mushinga bua kulonga Bible mu dîku.” Bulula mukanda mu dibeji dia 246 ne umvuije tshikoso tshia 23. Bala Yone 17:​3, ne ulombe dîku bua kudiambuluisha bua kulonga Bible ku mbelu.

 ³ Biwikala muakule bua bana ne bua dikengedibua dia kubapetesha dishidimunyibua dimpe, newikale mua kutungunuka nunku:

◼ “Musangu mushale, mvua mumvuije bua se: bana badi ne bua kupeta dilongesha dia mu nyuma ne mushindu udi baledi mua kubapeteshadi. Baledi bavule bandi mpeta badi banyingalala bualu bansonga bavule badi ne nsombelu wa buenzavi lelu’eu. Kadi wewe, udi wela meji kayi bua. . . ? [Ufile tshilejilu kampanda tshia buenzavi bua bansonga budi misangu mivule mu kartié ne ulekela muntu andamune.] Anyishaku nkuleje imue mibelu mikuatshishi idi mu Bible.” Bulula mukanda wa Muoyo wa kashidi mu dibeji dia 246, tshikoso tshia 22, nuyukidilangane pa ngenyi ya mushinga ne Ubale Efeso 6:⁠4. Umanyishe ne: bana bonso badi bakengela, bushuwa, dilanga ne buludiki ne padi baledi batabalela bua kubapeteshabi, bansonga badi ne disanka ne kanemu bivule. Umvuije mushindu uudi ulonga Bible ne bana bebe.

 ⁴ Bikala diyuki divua dishindamene pa mparadizu wa pa buloba, usonsole dijinga dia kumanya bia bungi pa kuamba ne:

◼ “Tuvua batangile bimue bimfuanyi bia mu mukanda eu bidi bituelesha meji pa mushindu wikala buloba palua Nzambi kubuenza mparadizu. Kadi disanka dietu kadiakuikala dijima bituababidila mparadizu eu katuyi pamue ne aba batudi banange. Ki mmuudi pebe umona anyi?” Lekela muntu andamune. Pashishe ubulule mukanda wa Muoyo wa kashidi mu dibeji dia 162. Bala Buakabuluibua 21:​3, 4, ne umvuija mushindu wikale batudi banange mua kuikala netu kashidi. Bikala muntu muanyishe, bala Yone 5:​28, 29, bua kuleja ne: bafue nebalukile ku muoyo. Pa kuleja ne tshianza pa tshizubu tshia mukanda, ushindike ne: “Ebi mbulelela menemene: kudi mushindu wa kuikala ne muoyo wa kashidi pa buloba bua mparadizu!” Enza tshipungidi bua kualukila kutangila muntu ne kumuleja tshidi tshituelesha meji ne: mparadizu ukadi pabuipi.

 ⁵ Tshipatshila tshinene tshia dikumbulula ntshia kuambuluisha badi banyisha lumu lua Bukalenge bua kulubabidilabu. Bantu bakese tshianana ke batu kabayi bakengela kusonsodibua bua kuanyishabu malu a mu nyuma. Ukoke ntema pa ngenyi misunguluke mikuatshishi idi mu mikanda, pa kuela kashonyi pa bulenga bua kumvua bimpe Bible. Bituafika ku tshipatshila etshi mu makumbulula etu, tudi tuenzela bakuabu bimpe mu mushindu mupite bulenga.