Mpuilu wa distrike bua 1996​—⁠Dikepesha dia midimu

¹ Bidi bilenga bitambe bua kuikalaku dîba dia didia dinene dia mu nyuma, mu bisangilu bia mu tshisumbu pamue ne mu mpuilu ya tshijengu, mu mpuilu ya pa buayi ya dituku dimue anyi mu mpuilu ya dis­trike. Bua tshinyi nanku? Bualu ditantshila dia bantu badi batshina Nzambi didi dikolesha mu nyuma ne biena-bualu bia mu nyuma bikonkonona bidi bituvuluija malu a mushinga mukole.

² Mu bidimu bishale ebi, binunu bia bantu mbadisangishe kutudi mu bisangilu ebi bia mu nyuma, ne badi amu bavula. Pankatshi pa tshidimu tshia 1985 ne tshia 1995, bungi bua bisumbu buakumbuka ku 49 716 ne kufikabu ku 78 620. Bu mudi Yehowa wambuluja mudimu wa disangisha, nebikengele kulongolola mpuilu ya bungi ya distrike ne ya tshijengu. (Yesh. 60:22) Pa kutangila anu mu teritware wetu, tudi mua kumona buenzeji bua divula dikena dia pa tshibidilu dia bungi bua bisumbu pa mpuilu ya distrike ivua 35 mu 1995 pa kufuanyikija ne 18 mu 1985. Mudimu wa dilongolola ne wa dilondangana dimpe dia mpuilu yonso eyi udi anu uvula. Bu mutudi tudisangisha bua kubabidila didia dinene dia mu nyuma, bidi bia meji bua kukepesha midimu idi itangila malu a mubidi.

³ Bidi bikengela kuangata mapangadika mapiamapia: Tudi tukeba dibenesha dia Yehowa, bualu tudi tuya kumpala. Tudi ne disanka dia kumona se: Yehowa udi upesha basadidi bende meji ne lungenyi bidibu bakengela. Tudi ne bua kuanyisha se: ku butuangaji bua mupika wa lulamatu ne wa budimu, Yezu Kristo udi ulombola malu biakane, ne dilongolola dia Yehowa didi dikumbana mu mushindu wa dikema. (Mat. 24:​45-47; Kolos.1:​9, 10) Nenku Kasumbu Kaludiki nkangate dipangadika edi ditudi tunumanyisha: Bituadijile ku mpuilu ya distrike ya 1996, ku mpuilu ya bijengu ne mpuilu ya pa buayi ya dituku dimue bua Kabitende 1996, kakuakuikala diabanyibua dia biakudia nansha. Muntu yonso udi ne bua kutuala biende biakudia ne biakunua.

⁴ Mashintuluka mindila: Mu bule bua bidimu bishale pavuaku dilamba ne diabanya dia biakudia bipepele, biakamueneka ne: bintu bikese tshianana ke bidi bikengedibua. Mudimu muenza ne mutshima wonso kudi aba bonso bavua bena budisuile ng’wa mushinga mukole; tudi ne bua kubela tuasakidila. Kadi bituadijile ku mpindieu, ku diambuluisha dia dikepesha dia midimu dipiadipia, binunu bia bana betu bavua bambuluisha mu diendesha dia tuminyo, disumba, dilamba, dituma ne diabanya dia biakudia, nebikale mua kuambika dîba diabu ku bikuabu bipatshila bia Teokrasi bia mushinga, ne nangananga bua kubabidila buena-muntu ne bana betu mu mpuilu. Kabidi, bena budisuile bavua mu mudimu wa diabanya dia biakudia nebikale mua kuambuluisha mu midimu mikuabu, tshilejilu mudimu wa diakidila bantu ne wa dikuba dia mankenda. Nenku, bujitu bua muntu yonso nebupepele ne kabiakukengedibua ne: bena budisuile ba bungi batumike too ne mundankulu, patshiatshia anyi dîba didi programe wenzeka, bu muvuabi bienzeka bua mudimu wa biakudia.

⁵ Tusanyikayi mapangadika mangata: Société udi unuela tuasakidila wa bungi, bana betu, bua diambuluisha dilengele dinuvua bafile “ne mutshima mujima,” mu bule bua bidimu, bua mapangadika mangata bua mpuilu, ne bua aa avua atangila mudimu wa biakudia. (1 Kul. 29:⁠9) Ne kakuena mpata nansha mikese bua se: bana betu bavua basadile ku budisuile ne bikale ne kalolo, pa kuleja dianyisha diabu mu bienzedi, nebatungunuke ne kuleja mmuenenu umue umue eu.​—⁠Nsum. 11:25; Luka 16:⁠9.

⁶ Tshidi tshikengedibua kuenza bua kudia: Pa kumona dikepesha edi dia midimu dipiadipia, nebikengele bua se: bena mêku basumbe, bua mêku abu, biakudia biasuabu kudia mu diikisha dia midi. Tudi tuambika mushinga ku masanka malenga atudi tupetela ku programe wa mu nyuma. Nebileje dibula meji bituambika mushinga udi kauyi pa muaba wawu ku biakudia bia mubidi. Apa, bidi bikengela ne: muntu yonso ‘ikale mujadike bintu bidi bitambe mushinga.’ (Fil. 1:​9, 10a, NW) Netumone se: bituanyisha biakudia bipepele, netuteye ntema mivule ku programe wa mu mapingaja ne netumubabidile kabidi bia bungi. Ke bua tshinyi muntu yonso udi ne bua kutuala biakudia bipepele, kadi bikoleshi bia mubidi. Tshilejilu tuvuluke ne: Yezu wakadiisha bisumbu bia bantu anu ne bintu bibidi: mampa ne mishipa.​—⁠Mat. 14:​16-20; Tangila Luka 10:42a.

⁷ Diikisha dia midi nedikale dîpi bishilangane ne mpuilu ya bidimu bishale. Kadi, nekuikale dîba dikumbane bua kudia biakudia bipepele ne kubabidila buena-muntu buetu ne bakuabu kumpala kua dituadija dia programe wa mu mapingaja. Bana betu badi bâse mu musoko mudi mpuilu wenzekela, peshi mu miaba ya pabuipi nawu, nebalukila ku mabu dilolo dionso, kabakuikala ne lutatu bua kulamba biakudia bua muena mu dîku yonso. Netuenze bu patu bana baya mu tulasa bambule mampa, bimuma, biskwi ne biakunua. Bantu ba bungi batu badia mushindu’eu ku miaba yabu ya mudimu.

⁸ Mbimueneke patoke ne: malu kaakuikala mapepele bua aba badi bafumina mikuabu miaba. Nebikengele bua kulongololabu biakudia biabu bua midi. Bamue nebatshinke ne: biakudia bipepele bu mudi bisekiseki ne bimuma nebikumbane, ne nebikale mua kuangata biakudia ebi ku nzubu yabu. Kudi kabidi mua kuikala mushindu wa kusumba dituku dionso bintu bidi bikengedibua bua didia dia mu dinda mu tshisalu tshia mu muaba wenzekela mpuilu.

⁹ Bu mudi muaba wonso udi mpuilu wenzekela wangatshibua bu Nzubu wa Bukalenge munene, netuleje meji mu diikisha dia midi pa kubenga kuikala ne nsombelu bu wa tshikondo tshia didia dia patoke dia dijikija lutetuku. Anu bu mututu katuyi tudia dîba dia bisangilu, katuena ne bua kudia peshi kunua dîba didi miyuki yenjibua. Kabiakukumbanyina bua kutuala biamu bia mashika binene bia ku nzubu ku muaba wa mpuilu. Bidi mua kukeba njiwu, ne kujika tujila tua dipitshila ne miaba ya kusombela. Nebikale bianyishibue bua kukeba bitunga bia ndundu peshi tubudimbu bua kuambuilamu biakudia bilongolola bua didia dia midi. Tshiamu tshia mashika tshikese tshìdì mua kutekibua muinshi mua tshibasa ntshikumbane, pikalabi bikengedibua. Ki ntshia kuteka pa tshibasa nansha. Ndekelu wa bionso, tudi tuvuluija ne: maluvu makole (mvinyo, biere, ne makuabu) kabiena mua kutuadibua mu mpuilu wa bena nkristo nansha.

¹⁰ Nudi ne bua kutabalela kabidi bilaminu binuatuala mu mpuilu. Nudi mua kuangata milangi ya ter­mose bua biakunua bia luya. Bilaminu bia talatala bidi ne njiwu. Mbikandikibue mu miaba mivule ya mpuilu. Binuasumba biakunua bia mashika biela mu tubudimbu peshi mu milangi ya aluminium, nudi ne bua kubipongolola mu bilaminu bikena mua kufua ne bidi mua kutekibua muinshi mua tshibasa.

¹¹ Masanka makuabu: Tudi tumona meji onso a dikepesha dia midimu dipiadipia. Netuikale mua kufila ntema yonso ku malu a mu nyuma maleja mu miyuki, ke kabingila kalelela ka mpuilu. Netupetele masanka ku buena-muntu buetu ne bana betu, ne ku programe. Nenku, pamutu pa kumbuka ku muaba wa mpuilu mu diikisha dia midi bua kukeba biakudia, netuanyishe bua kutuala bitudi nabi dijinga. Netuikale mua kupitshisha dîba pamue ne balunda betu bena nkristo ne katuakupangila muyuki nansha umue wa programe wa mapingaja.

¹² Bamane kuibakibua bimpe mu nyuma, bamue nebanyishe imue misangu bua kubabidila buena-muntu ne bana betu, pamue ne mêku abu ne balunda babu, ne kuyukidilangana pa malu mateleja mu munya, eku badia biakudia bipeteshi bia bukole mu nzubu wa tshidiilu kampanda peshi mu cafétéria kansanga. Aba bajinga kuenza nunku nebasungule imue misangu bua kualukila ku mabu bua kudia didia dinene bu mutubi matuku onso.

¹³ Tudi bushuwa ne disanka dia kuikalaku dîba dia didia dinene dia mu nyuma didi dikale mpuilu. Tudi tupetelaku mikanda mipiamipia, dilongesha dia mpatshi ne mibelu miakanyine. Masanka au ke atudi tuvuluka bonso. Tudi kabidi ne disanka dia kuikala munkatshi mua basadidi bakuabu ba Nzambi. Nsumuinu 10:​22 (NW) udi umanyisha ne: “Dibenesha dia kudi Yehowa​—⁠ke ditu divuija muntu mubanji ne katu utentekeja kanyinganyinga pa mutu padi.” Bidi nunku bualu tuetu, basadidi ba Yehowa, katuena tubuela mu mpuilu pa kulomba bintu bia bungi bia ku mubidi peshi kukeba bua kusomba anu bilenga. Tudi tudisangisha bikale ne dijinga diibaki dia kubabidila bia bungi mu nyuma ku mpuilu, ne Yehowa udi utufuta bivule pa kumona mmuenenu utudi tuleja.​—⁠1 Tim. 6:​6-8; Eb. 11:⁠6.

¹⁴ Mpuilu mbikondo bikankamiji bidi bituvuluija muaba utudi mu dinowa dia mu nyuma. (Yone 4:​35, 36) Nshapita wa 54 wa mukanda wa Yeshaya udi utuadija ne dibikila diludikila bulongolodi bua Yehowa budi bufuanyikija ne mukaji, dibikila dia kudilongolola bua kumona didiunda dia disanka. Anu bu muakabimanyisha Yeshaya, uvua ne bua kutekemena bua kudiunda, kutandabala ne kusonsodibua kudi bukole buvuija bupiabupia: “Vudija miaba ya mu nzubu webe wa ntenta, balula bilamba bia ku nzubu webe wa ntenta, kubipidiji nansha, lepesha mionji yebe ya ku ntenta, upopele makunji bikole, bualu neuvulangane ku dia balume ne ku dia bakaji.” Dikumbana dia mulayi eu wa mpatshi ndimueneke mu didiunda dia dikema dia ntendelelu mulelela lelu’eu.​—⁠Yesh. 54:​1-4, MMM.

¹⁵ Eyowa, dikepesha dia midimu dipiadipia ntshimanyinu tshia meji. Bateleji bonso nebikale mua kubabidila programe wa mu nyuma mulongolola bua mpuilu, kakuyi ditanaji. Tudi bajadike se: mapangadika aa neabeneshibue kudi Yehowa, bualu neambuluishe bua kuakama didiunda. Pa kufila ntema ku bidi bikengedibua, netubabidile matuku malenga pamue ne bana betu, ne netupete bia bungi mu nyuma. Tudi tulomba Yehowa bua kubeneshaye madikolela onso atudi tuenza bua kulua kudidiisha ku mesa a Yehowa.​—⁠Tangila Dut. 16:​14, 15.

Masanka adi afumina ku diumbusha dia mudimu wa biakudia

◼ Mudimu mukese kumpala kua dituadija dia mpuilu, dîba didiye wenzeka ne panyima pende, ke bidi biambuluisha bua kubabidila menemene buena-muntu ne bana betu.

◼ Kakuena bintu bia kukuba bua mudimu wa biakudia.

◼ Bantu ba bungi badi mua kubabidila programe yonso wa mu nyuma.

◼ Bena budisuile ba bungi nebikaleku bua kuenza midimu mikuabu.

◼ Dîba dia bungi nedikaleku bua kudifila mu bipatshila bikuabu bia teokrasi.

Bitudi mua kutuala bua didia

◼ Biakudia bipepele ne bikoleshi bia mubidi.

◼ Bimuma, mampa.

◼ Biamu bia mashika bikese, pikalabi bikengedibua.

◼ Biakunua, mâyi a bimuma ne mâyi, mu bilaminu bikena mua kufua.

Bidi KABIYI NE BUA kutuadibua muaba wa mpuilu

◼ Maluvu makole.

◼ Bilaminu bia talatala.

◼ Biamu bia mashika binene bia mu nzubu.