Diipatshibua: Nndongoluelu wa dinanga anyi?

“MUNSANTU, munsantu, munsantu n’Yehowa Nzambi, Wa-Bukole-Buonso.” (Buakabuluibua 4:8, NW) Mu diumvuangana ne diumvuija adi, Yehowa udi mpokolo wa mêyi-makulu mansantu. Mmafunda mu “mifundu minsantu,” ne bena nkristo badi ne bua kulonda mêyi-makulu aa. Eyowa, badi ne bua kuepuka tshintu kayi tshionso tshikena tshikezuke ku mêsu a Nzambi.​—2 Timote 3:15, NW; Yeshaya 52:11.

Mu butoke buonso Bible udi utuma dîyi ne: “Idikijayi munsanto udi munubikile, nuikale penu bansanto mu nsombelu wenu mujima, bu mudibo bafunde ne: ‘Nuikale bansanto, bualu meme ndi munsanto.’” (1 Petro 1:15, 16, Mukenji Mulenga) Katshia tshisumbu tshia bena nkristo tshienzeka kukadi siekele 19, bena nkristo balelela mbaluangane mvita mikole bua kutshikuba ku dipanga bukezuke mu nyuma ne mu malu a tshitembu.​—Yuda 3.

Kabingila ka dikengedibua dia dikubibua

Basadidi buonso ba Nzambi badi bakama mufunu wa kudilama bakezuke mu malu a tshitembu ne a mu nyuma. Bua tshipatshila atshi, baluishi basatu bakole badi ne bua kutuibua nkanana​—Satana, bulongolodi buende, ne kuinyikibua kua lungenyi luetu ku mpekatu. (Lomo 5:12; 2 Kolinto 2:11; 1 Yone 5:19) Bulongolodi ebu bua Satana nebukusake ku dikala mubule ngikadilu wa tshitembu, nebukusake ku disungula ngenzelu yabu, ne nebusue kukupa bubanji bua ku mubidi, lumu, muanzu, butumbi, ne bukole. Kadi aba badi bapangadije bua kuipatshila ntendelelu mulelela badi batuila tshidi Satana usua kubapa nkanana ne badilama “kakuyi katoba ka mu bulongolodi ebu.” Mbua tshinyi? Bualu mbasue bua kushala muinshi mua ditabalelangana dia dikubibua ne dinanga dia bulongolodi bukezuke bua Yehowa.​—Yakobo 1:27, NW; 1 Yone 2:15-17.

Yehowa mmupeteshe diambuluisha bua muena tshisumbu tshia bena nkristo yonso udi upona ku matetshibua a Satana bua butekete bua buntu. Bakulu bakumbane tshishiki mu nyuma mbatekibue bua kukuba tshisumbu pashishe ne dinanga dionso badi bambuluisha aba badi balenduka bua kunyingalala bua mpekatu yabu ne kuenza madiakajilula adi akengedibua bua disanguluka. Muena nkristo yonso udi uditua mu dienza bibi udi ne bua kuambuluishibua ne lutulu luonso bua kunyingalalaye ne kushintululaye bienzedi biende.​—Galatia 6:1, 2; Yakobo 5:13-16.

Mudi diipatshibua ndongoluelu wa dinanga

Basadidi batambule ba Yehowa badi balonda ku budisuile njila mubi ne babenga bua kushintuluka badi ne bua kuangatshibua bu bakena banyingaladi ne nunku ki mbakanyine kuikala mu mulongo wa bena nkristo. (Fuanyikija ne 1 Yone 2:19.) Bantu ba mushindu’eu kabena mua kuanyishibua bua kushala mu tshisumbu tshikezuke tshia bena nkristo bua kabavu kusambuluja bubi. Badi ne bua kuipatshibua.

Buimpe bua dipata aba badi benza malu mabi budi mua kulejibua kudi nsombelu udi ulonda eu: Bua divula dia mabunda ne dibunda-bibawu dia tshikisu bienzela balongi, tumue tulasa ntusungule ndongoluelu udi “ulomba diipatshibua dia kashidi bua balongi badi batumika anyi badi bakáná bua kutumika ne bingoma,” ke mudi The Globe and Mail, tshikandakanda tshia mu Toronto, Canada, tshimanyisha. Diipata didi dienjibua bua kukuba balongi badi basua kubabidila programe wa malonga kabayi eku babenzela tshikisu.

Bua tshinyi kuipata benji ba mibi bakena banyingaladi mu tshisumbu nkuleja dinanga? Kuenza nunku ntshijadiki tshia dinanga bua Yehowa ne njila yende. (Musambu wa 97:10) Tshienzedi etshi tshidi tshileja dinanga bua aba badi bipatshila njila muakane bualu tshidi tshiumbusha munkatshi muabu muntu uvua mua kuikala ne buenzeji bubi kudibu. Tshidi kabidi tshikuba bukezuke bua tshisumbu. (1 Kolinto 5:1-13) Bikala dienda masandi dibi anyi dipanga bukezuke dia mu nyuma dianyishibua bua kuikala mu tshisumbu, didi mua kusambulujibua ne katshiakuikala tshiakanyine bua kuenzela Yehowa, udi munsantu, mudimu wa tshijila. Ku lukuabu luseke, diipatshibua dia muenji wa mibi didi mua kumuambuluisha bua kumona bunene bua tshienzedi tshiende tshibi, kunyingalala, ne kuenza mashintuluka adi akengedibua ne nunku kuanyishibua bua kualukila mu tshisumbu.

Buenzeji pa bakuabu

Padi muena tshisumbu wenza mpekatu munene, bu mudi dienda masandi, kêna usankisha mutshima wa Yehowa nansha. (Nsumuinu 27:11) Muena nkristo kayi yonso udi upona mu tshiendenda kêna wela meji bu muakela Yozefe pakateta mukaji wa Potifare bua kusangila nende. Ngandamuinu wa Yozefe uvua: “Mmunyi mundi mua kuenza bualu ebu bubi bunene nenku ne kuenzela Nzambi mpekatu?” (Genese 39:6-12, NW) Yozefe wakatshina mêyi-makulu mansantu a Yehowa ne kunyema ditetshibua edi. Ku lukuabu luseke, muendi wa masandi udi umueneka bu mubule dinanga divule bua Nzambi bua kudikanda ku disankisha nkuka ya mubidi wende.​—Galatia 5:19-21.

Muntu mutambule udi utupa ku mêyi-matuma a Nzambi kêna uleja diditatshisha bua dijimija lumu ne bisama biakebelaye bena dîku diende bena kuitabuja. Buenzeji [buabi] pa tshieledi tshia lungenyi mbupite ne kule tshidi muntu mua kunanukila. Kunyima kua disokolola se: muanende wa balume uvua muendi wa masandi, mukaji kampanda muena nkristo wakadiabakena ne: “Bana betu ba balume ne ba bakaji bakese ke badi bamueneka bu badi bumvua mutudi batapibue ku muoyo ne banyukudibue. . . . Tudi basunsuke ku muoyo.” Lumu lua dîku dijima ludi mua kuedibua mpata. Dibungama ne ndambu wa didipisha bidi mua kukuata bena dîku bena lulamatu. Nunku bienzedi bibi bia muenji wa bubi bidi bikebela dîku bisama bia mutshima.

Diambuluisha dia dinanga bua bena dîku

Bena nkristo bena lulamatu bena dîku dia bantu badi biipatshibue badi ne bua kuvuluka se: diipatshibua nndongoluelu wa dinanga ne dikubibua. Madikolela a mushindu kayi wonso mmenjibue bua kuambuluisha muenji wa bubi. Kadi bikalaye mupange butumike kudi Nzambi ne muikale ne tshishiku tshionso ubenga kunyingalala, tshisumbu tshidi ne bua kukubibua ne katshiena ne dinga dipangadika pa kumbusha kuenza bu mudi Dîyi dia Nzambi dituma dîyi: “Umushai muntu mubi au munkatshi muenu.” (1 Kolinto 5:13) Anu bu muakamba Ntemu kampanda: “Diipatshibua didi ditangila bulamatshi ku mikenji ya Yehowa.”

Padi muena dîku kampanda wipatshibua, bena dîku diende bena nkristo badi bakuatshika ne bisama. Nunku bakulu bateka badi ne bua kuenza muabu muonso bua kuikala babakankamija mu nyuma. (1 Tesalonike 5:14) Bakulu badi mua kubasambidila ne kusambila pamue nabu. Pa tshibidilu kutu mushindu wa kukumbula bena nkristo bena lulamatu aba bua kukonkonona ngenyi idi ibaka ya mu Mifundu. Balami ba tshisumbu tshia mikoko badi ne bua kubabidila mushindu kayi wonso bua kukankamija bananga aba mu nyuma kumpala ne kunyima kua bisangilu bia bena nkristo. Dikankamijibua dia pa mutu didi mua kufidibua pa kupatuka nabu mu mudimu wa budimi. (Lomo 1:11, 12) Balami ba mu nyuma badi ne bua kuleja kudi basadidi bena lulamatu aba ba Yehowa dinanga ne ditabalela bidibu bakanyine.​—1 Tesalonike 2:7, 8.

Tshienzedi tshia mpekatu tshia muntu ki nkabingila bua kulengulula muena dîku diende kayi yonso udi mushale ne lulamatu kudi Yehowa. Mukalenge mubi wa Izalele Shaula uvua muimansha kudi Nzambi, kadi Davidi kakashila nsombelu eu mpunga bua kunyangaye dinanga diende nkayende bua muana wa Shaula Jonathan. Eyowa, tshisuikidi pankatshi pa Davidi ne Jonathan tshiakalua tshikole menemene. (1 Samuele 15:22, 23; 18:1-3; 20:41) Nunku buonso mu tshisumbu badi ne bua kuikala bakankamija ne bananga bena nkristo badi ne bena dîku badi benzela Yehowa mpekatu.

Mmushindupu kayi udibi dibula dinanga bua kulengulula anyi kubenga kuleja bulenga kudi bena lulamatu ba nunku! Bena dîku bena lulamatu badi mu mushindu wa pa buawu bakengela dikankamijibua. Badi mua kudiumvua nkayabu ne bamona se: nsombelu wabu mmupite bukole. Pamu’apa udi mua kuabanyangana nabu dimanyisha dia mu nyuma didi disankisha anyi bualu bumona budi buibaka ku nshinga. Biandamuna muntu muipata ku nshinga, lomba patupu bua kuakula ne muena dîku diende muena nkristo. Udi mua kubikila bena lulamatu badi mu nzubu wa mushindu’eu ku didisangisha dia bulunda anyi ku didia kuebe. Biwatutakena nabu dîba dia disumba bintu, udi mua kutumika ne tshikondo atshi bua malanda adi ibaka. Vuluka ne: bena nkristo badi ne bena dîku bipata badi anu bena bulongolodi bukezuke bua Yehowa. Mbipepele bua kuditolabu ne kuteketa mu mikolo. Nunku, wikale mudiakaje bua kubaleja bulenga ne dinanga. Tungunuka ne kuenzela ‘aba badi balela bebe mu ditabuja’ bimpe.​—Galatia 6:10, NW.

Anyisha ndongoluelu wa Yehowa

Mmushindupu kayi utudi mua kuikala ne dianyisha bu mudi Yehowa Nzambi uleja diditatshisha diengeleki bua yonso udi mu dîku dia pa buloba bujima dia batendeledi bende. Ku butuangaji bua bulongolodi buende mmupeteshe ndongoluelu bua kutuambuluisha mu dienda kumpala kuende mu mushindu muakane. Nansha bikala muena dîku kampanda wenza ku budisuile mpekatu ne muikale ne bua kuipatshibua mu tshisumbu, kudi mushindu wa kumupinganuna bianyingalalaye bulelela. Ebi mbileja kudi tshilejilu tshidi tshilonda etshi:

Bakulu bavua bateta bua kuambuluisha muntu utuabikila bu Anna, kadi wakaditua mu dinua makanya, maluvu, ne bintu bia lulengu. Kavua munyingaladi ne kakanenga mu tshisumbu. Kadi, katupa kakese kunyima, Anna wakatuadija kupangila bulunda bua dinanga bua tshisumbu tshikezuke tshia Yehowa ne wakamulomba mu masambila bua diambuluisha. Udi utonda ne: kakaleja menemene dianyisha bua mushindu udi bakulu batabalela aba badi bapambuka. Anna wakatuadija kubuelulula mu bisangilu, ne ebi biakamufikisha ku dinyingalala. Kunyima, bakanyisha bua kupinganunaye mu tshisumbu tshia dinanga ne tshia dikubibua. Bua musangu eu kabidi, Anna udi utua mêyi-makulu a Yehowa a malu a tshitembu nyama ku mikolo. Udi ne dianyisha bua dinanga dileja kudi bakulu ne udi kabidi wamba ne: “Kuena mua kufuanyikija mudi mikanda ya bena nkristo mingambuluishe. Yehowa udi bushuwa utabalela bimpe majinga etu.”

Eyowa, Yehowa mmupeteshe mushindu wa kupinganuna kudi aba bavua biipatshibue mu tshisumbu kadi badi banyingalala kunyima. Ne tuamonyi se: nansha diipatshibua diodi nkayadi didi ndongoluelu wa dinanga. Kadi mmushindu kayi udibipu biakane bua kuepuka bualu ebu bua dibungama pa kulonda dîba dionso njila miakane ya Nzambi wetu munsantu! Dîba dionso tuikale ne dianyisha bua muabi wa disamuna Yehowa bu bena mu bulongolodi buende bukezuke, bua dinanga, ne bua dikubibua.

[Tshimfuanyi mu dibeji 26]

Udiku uleja dinanga kudi balela bena lulamatu ba aba badi biipatshibue mu tshisumbu anyi?