Udi mua kupanda njila mu bijiki ebi!

NDEKE wa Jumbo jet udi pamu’apa mua kuambula nkama ya bantu ne ya tone ya bintu. Mmunyi mudi ndeke wa bujitu wa mushindu’eu mua kubuuka? Ng’anu, ku diambuluisha dia portance (bukole bubandishi).

Padi ndeke uvudija lubilu luende mu tshipalu tshia ndeke, lupepele ludi lupupa bikole pa mapuâpuà mobame ne muishi muawu. Ebi bidi bipetesha bukole bubandishi budi bubikidibua ne: portance. Padi portance mukumbanyine upetshibua, ndeke udi mua kudilamuna ku buloba ne kubuuka. Eyowa, ndeke udi muambule bujitu bunekesha kêna mua kudipetesha portance mukumbanyine bua kubuuka muulu.

Tudi petu mua kulua buomekela bujitu bunekesha. Siekele mivule mishale, Mukalenge Davidi wakamba ne: biende ‘bilema bivua bimunemene bu mudi tshintu tshia bujitu bua bungi.’ (Musambu wa 38:4) Bia muomumue, Yezu Kristo wakadimuija ku dilua bazengeja kudi tunyinganyinga tua mu nsombelu. (Luka 21:34) Ngenyi ne nyanji mibi bidi mua kutuzengeja mu mushindu udibi pamu’apa mua kumueneka bikole bua “kubuuka.” Udi muzengejibue mu mushindu awu anyi? Peshi udi mutuilangane ne tshijiki kampanda tshidi tshijikila dilubuluka diebe dia mu nyuma anyi? Bikalabi nunku, ntshinyi tshidi mua kuikala ne dikuatshisha?

Udi musuyibue anyi?

Lunsuya​—muabakanu wa pa tshibidilu lelu’eu—​ludi mua kulua tshijiki tshia mu lungenyi, nansha bua bamue bena mu tshisamba tshia Yehowa. Nangananga bansonga badi ne dinyikibua ku dilengulula imue midimu pa kuyangata bu misuyanganyi. Utu imue misangu umvua mushindu au pa bidi bitangila bisangilu bia bena nkristo anyi? Bikalabi nunku, ntshinyi tshiudi mua kuenza bua kuvuija dibuela diebe mu bisangilu disanguluji?

Kudifilamu ne kasuki ke nsapi. Paulo wakafundila nsongalume Timote ne: “Udibidije ne dinemekela Nzambi bu tshipatshila. Bualu didibidija mubidi didi diambuluisha mu malu makese; kadi dinemekela Nzambi didi diambuluisha mu malu wonso, bualu didi ne dilaya dia muoyo wa mpindieu ne dia utshilualua.” (1 Timote 4:7, 8, NW) Mukanda pa didibidija mubidi udi mua kuikala usuya ne wa mushinga mukese bituikala katuvua benze misâlu milomba. Bisangilu bia bena nkristo mbienza bua kuibidija bieledi bietu bia lungenyi ne nebienze nunku bituadilongolola ne kufila mumvuija. Didifila ne kasuki edi nedivuije bisangilu bintu bia difutu ne bidi bisankisha.

Pa bidi bitangila bualu ebu, nsongakaji kampanda muena nkristo udi ne dîna dia Mara wakamba ne: “Bingapanga kudilongolola bua bisangilu, tshiena mbibabidila to. Kadi, pandi mudianjile kudilongolola, tshieledi tshianyi tshia lungenyi ne mutshima wanyi bidi bitamba kudiakaja bua kumvua. Bisangilu bidi bitamba kulua bia tshipatshila, ne ndi ngindila ne luzuku bua kufila mumvuija.”

Kulonga bua kuteleja nekuambuluishe kabidi. Kuteleja mijiki mimpe kutu kupepele ne kusankisha diakamue. Kadi disankishibua dionso kaditu dipetshibua diakamue nansha. Tudi tupetela disankishibua ku programe wa tshisangilu anu patudi tuteleja ne ntema tshidi tshiambibua. Muena nkristo kampanda udi ne dîna dia Rachel wakumvuija ne: “Padi ngamba-malu kayi mukanzabale, ndi ne bua kujalamija bikole meji. Tshibidilu buanyi tshitu: ‘Padi muyuki kauyi utamba kujula ntema, ndi ne bua kutamba kujalamija meji.’ . . . Ntu nteya ntema ya pa buayi ku mvese, nteta bua kuyibabidila menemene.” Tudi ne bua kudikanda, anu bu Rachel, bua kuteleja. Mukanda wa Nsumuinu udi wamba ne: “Muananyi, ku meji anyi, O ukuteye ntema. Ku busunguluji buanyi inyika matshi ebe.”​—Nsumuinu 5:1, NW.

Amue mamanyisha mafila mu bisangilu adi pamu’apa mua kuikala mu mushindu kampanda mambulula. Ebi bidi ne mushinga! Basadidi buonso ba Nzambi badi bakengela mavuluija. Mubidi mupange bupuangane, ne muinyikibua ku mibi ne tshivulukilu tshivulaminyi biawu, udi ukengela mambuluisha wonso adiku. Mupostolo Petelo ‘uvua mudiakaje bua kuvuluija bena kuitabuja nende amue malu, nansha muvuabu baamanye ne bajalame mu bulelela.’ (2 Petelo 1:12, NW) Yezu wakumvuija kabidi ne: “mulongeshi yonso wa patoke . . . mmufuane muntu kampanda, muena nzubu, udi upatula mu tshilaminu tshiende tshia biuma bintu bipiabipia ne bikulukulu.” (Matayo 13:52, NW) Nunku, nansha mudi bisangilu bietu bipatula ngenyi ya mu Mifundu itudi bamanye, anyi ‘biuma bikulukulu,’ kutu pa tshibidilu bimue ‘biuma bipiabipia’ bia kutukuatshisha milowo.

Kuangata dipangadika dia kubabidila tshishiki bisangilu kudi mua kupetesha dibuuka dilelela dia mu nyuma. “Disanka ndia aba badi bamanye bidibo bakengela mu nyuma [aba badi balombilombi ba spiritu],” ke muakamba Yezu. (Matayo 5:3, NW, note kuinshi kua dibeji) Mmuenenu wa mushindu’eu pa bidi bitangila biakudia bimpe bia mu nyuma bipetesha ku bisangilu neajikije lunsuya.​—Matayo 24:45-47.

Udi mutekesha mu mikolo kudi tshilejilu tshibi anyi?

Udi mulubakajibue kudi nsombelu wa muntu kampanda mu tshisumbu tshienu anyi? Pamu’apa udi mudiebeje ne: ‘Mmunyi mudi muanetu kampanda mua kuenza nunku ne kuikala amu ne lumu luimpe?’ Ngenyi ya mushindu’eu idi mua kuenza bu tshijiki tshia mu lungenyi, bualu idi itufofomija ku bunême bua malanda a disanka atudi mua kuikala nawu ne tshisamba tshia Nzambi.​—Musambu wa 133:1.

Pamu’apa bamue bena tshisumbu ku Kolosai bavua ne lutatu lua muomumue. Paulo wakababela ne: “Tungunukayi ne kulekelelangana ne kufuilangana luse ku budisuile pikala umue ne bualu bua kudiabakena kudi mukuabu.” (Kolosai 3:13, NW) Paulo wakasunguluja ne: bamue bena nkristo bena Kolosai bavua mua kuikala benze bibi bivua pamu’apa bibingisha miabakanu ya bakuabu. Nunku katuena ne bua kutamba kukatshila bikala umue wa ku bana betu ba balume anyi ba bakaji mupange imue misangu kuleja ngikadilu kampanda musunguluke wa bena nkristo. Yezu wakafila mubelu muimpe pa mushindu wa kujikija ntatu minene. (Matayo 5:23, 24; 18:15-17) Kadi pa tshibidilu, tudi mua kulekelela mikalu ya bena kuitabuja netu ne kubafuila luse. (1 Petelo 4:8) Eyowa, ngenzelu wa mushindu’eu udi mua kutuenzela tuetu nkayetu ne bakuabu bimpe. Bua tshinyi bidi nunku?

“Lungenyi luimpe lua muntu ludi lukanda tshiji, ne butumbi b[uende] nkulekelela muntu bubi,” ke mudi Nsumuinu 19:11 wamba. Mmushindu buimpepu kayi udi kufuilangana luse pamutu pa kuteka tshiji ne njiya! Salvador, mukulu muende lumu bua mmuenenu wende wa dinanga, wakamba ne: “Padi muanetu kampanda ungenzela bibi anyi ungambila bualu budi kabuyi bunsankisha, ndi ndiebeja ne: ‘Mmunyi mundi mua kuambuluisha muanetu eu? Mmunyi mundi mua kuepuka kujimija malanda a mushinga anyi nende?’ Ntu pa tshibidilu mumanye mudibi bipepele bua kuakula tshintu tshibi. Bikala muntu musakuke mu mêyi, mushindu wa tshishiki wa kujikija muand’eu nkukupula tshivuaye muambe ne kutuadijilula bionso. Kadi abi kabiena mua kuenzeka, nunku ndi nsungula mushindu mukuabo mulenga ne ndengulula mêyi aa. Ndi nkomesha ne: bionso abi mbikebesha kudi dipanga bupuangane kadi ki nkudi bu-muntu bulelela bua muanetu.”

Udi mua kumvua ne: kuamba nkupepele kupita kuenza. Kadi bivule mbisuikakaja ku mushindu utudi tuludika ngenyi yetu. “Malu wonso a kunanga, . . . ikale malu anudi nutungunuka ne kuelangana meji,” ke muakabela Paulo. (Filipoi 4:8, NW) Tshiambilu “a kunanga” tshidi ku dîna tshiumvuija “adi alela disuangana.” Yehowa mmusue bua tutangila tshidi tshimpe mu bantu, bua tushindamene pa tshidi tshilela disuangana pamutu pa njiya. Udi yeye nkayende utupetesha tshilejilu tshipite bionso mu bualu ebu. Anu bu mudi muimbi wa misambu utuvuluija: “Bu wewe ulondakaja bilema, Ô Yah, Ô Yehowa, nnganyi udi mua kuimana kulu?”​—Musambu wa 103:12; 130:3, NW.

Bushuwa, imue misangu nsombelu wa muanetu kampanda udi mua kuikala utekesha mu mikolo, kadi bavule ba ku batendeledi netu badi bilejilu bia mpatshi bia nsombelu wa buena nkristo. Bituabivuluka, anu bu Davidi netuikale ne disanka ‘bua kutumbisha Yehowa bikole ne bua kumusamuna munkatshi mua bantu bavule.’​—Musambu wa 109:30, NW.

Kuikala Ntemu kudi kumueneka kukole kutambe anyi?

Bia dibungama, bua tshijiki tshikuabu tshia mu lungenyi, bamue ki mbanji kutuadija kusamuna Yehowa. Bamue balume badi kabayi Bantemu ba Yehowa badi mu mushindu muakanyine dieyemena bakumbaja bidi mêku abu akengela ne badi kabidi bakuatshisha bakaji babu mu mudimu wa buena nkristo. Badi ne ngikadilu wa bulunda ne badi mua kusua kumanya bia bungi pa tshisumbu, kadi badi badikanda ku dilua basadidi baditshipe ba Nzambi. Ntshinyi tshidi tshibakanda?

Lumue lutatu ludi mua kuikala se: balume aba badi badimuenena nkayabu mudimu muvule wa teokrasi wa bakaji babu ne bumvua se: kuikala Ntemu kudi kulomba bivule. Anyi pamu’apa badi batshina se: kabena nansha kakese mua kudifila mu mudimu wa buambi bua ku nzubu ne ku nzubu. Bilondeshile mmuenenu wabu, majitu adi amueneka bu adi ajimija mabenesha. Bua tshinyi tshijiki tshia mu lungenyi etshi? Bavule ba ku balongi ba Bible badi balonga ne batumikila bulelela ku kakese ku kakese. Kadi balume bakena bena kuitabuja batu pa tshibidilu bamanye biakane majitu wonso a bena nkristo kumpala kua kudima dijinga dia ku-anyisha.

Manuel, uvua mu nsombelu eu, udi umvuija ne: “Munkatshi mua bidimu bu dikumi, mvua nya ne mukajanyi ku mpuilu ne ku bisangilu. Bua kuamba bulelela, mvua munange kushemesha malanda ne Bantemu pamutu pa bantu bena mu bulongolodi ebu, ne mvua ne disanka bua kubambuluisha pamvua ne mushindu. Mvua mulengibue mutshima bikole kudi dinanga divua munkatshi muabu. Kadi lungenyi lua diya ku nzubu ne ku nzubu luvua buanyi tshijiki tshinene, ne mvua ntshina se: bena mudimu nanyi bavua mua kunseka.

“Mukajanyi wakandeja lutulu lua bungi ne kakateta nansha musangu umue bua kumbambidika bua kulonga Bible. Yeye pamue ne bana ‘bavua bamanyisha’ nangananga ku tshilejilu tshiabu tshimpe. José, mukulu kampanda mu tshisumbu, wakantabalela mu mushindu wa pa buawu. Ndi ngela meji se: dinkankamija diende ke diakantuadijija kulonga menemene. Kunyima kua kutambula, ngakajingulula se: bijiki bivua amu mu lungenyi luanyi nkayanyi. Diakamue pangakapangadija bua kusadila Yehowa, ngakadimuenena diambuluisha diende mu ditshimuna ditshina dianyi.”

Mmunyi mudi bakaji ne bakulu bena nkristo mua kuambuluisha balume bu mudi Manuel bua kutshimuna tshijiki tshiabu tshia mu lungenyi? Dilonga Bible didi mua kuibaka dianyisha ne dijinga bua kuenza disua dia Nzambi. Eyowa, dimanya dialabale dia Mifundu didi nshindamenu bua kuenza midimu ya ditabuja ne kuikala ne dieyemena mu ditekemena didi kumpala.​—Lomo 15:13.

Ntshinyi tshiakankamija balume ba mushindu’eu bua kuanyisha dilonga dia Bible? Pa tshibidilu, bulunda ne muanetu kampanda mumvuidianganyi mu tshisumbu budi mua kuikala tshintu tshidi tshisaka bua kuangata dipangadika. Pamu’apa mukulu kampanda anyi muanetu mukuabu mupiluke udi mua kufika ku dimanya mulume eu. Diakamue padi malanda mashême ashemeshibua, tshionso tshidiye pamu’apa ukengela mmuntu wa kulonga nende. (1 Kolinto 9:19-23) Pine apo, mukaji muena nkristo wa budimu udi mua kuabanyangana ndambu wa malu a mu nyuma ne bayende ukena muena kuitabuja, eku mumanye se: ki nku dimuenzeja ku bukole kuandamunaye.​—Nsumuinu 19:14.

Anu bu muakajingulula Manuel ku dimonamona, padi muntu upeta bukole bua mu nyuma, bijiki bifuane mikuna bidi bilua anu bu mishiki ya malaba miunguija kudi tshibulebule. Yehowa udi upetesha aba badi basua bua kumusadila bukole. (Yeshaya 40:29-31) Ku diambuluisha dia bukole bua Nzambi pamue ne dikuatshisha dia Bantemu bapiluke, bijiki bidi mua kumbushibua. Nunku mudimu wa ku nzubu ne ku nzubu udi mua kulua tshintu tshikena tshitekesha mu mikolo ne bena mudimu badi mua kulua bantu bakena kumvuila buôwa, dîba adi mudimu muenza ne anyima mujima udi ulua tshintu tshia milowo.​—Yeshaya 51:12; Lomo 10:10.

Dilama lubilu

Kudi mushindu wa kupanda njila mu bijiki bu mudi bisatu bituakonkononyi ebi. Padi ndeke ubuuka, kakuyi mpata tshidi tshikengedibua mbukole bua ndekelu bua motere ne ntema ikena ditanaji ya bena mudimu ba ndeke. Ku ntuadijilu wa dibuuka, miotere itu ijikija kasolonyi kavule kupita tshitupa tshikuabu kayi tshionso tshia dibuuka. Bia muomumue, bua kudipikula ku ngenyi ne nyanji mibi madikolela ne dijalamija meji bia ndekelu bidi bikengedibua. Kutuadija kudi mua kuikala tshitupa tshitambe bionso bukole, bishilangane diya kumpala didi dilua ditambe bupepele diakamue padi lubilu ludi lukengedibua lupetshibua.​—Fuanyikija ne 2 Petelo 1:10.

Lubilu mu diya kumpala ludi lulamibua pa kulonda kakuyi dinenga mibelu ya mu Mifundu. (Musambu wa 119:60) Tudi mua kuikala ne dishindika dia se: tshisumbu ntshidiakaje bua kuambuluisha. (Galatia 6:2) Kadi, tshidi tshipite bionso mushinga, ndikuatshisha dia Yehowa Nzambi. Anu bu muakamba Davidi, “Yehowa abeneshibue, udi dituku dionso utuambuila bujitu.” (Musambu wa 68:19, NW) Patudi tudiumbusha bujitu mu masambila, bujitu buetu budi butamba kupepela.

Imue misangu, ndeke utu ushiya munyima mvula mufinde kuulu, upita munkatshi mua mupimbu wa mavuba, ne pashishe ubuuka mu diulu muule ne nkenke mibalakanyi ya dîba. Tudi petu mua kushiya munyima ngenyi mibi. Ne diambuluisha dia Nzambi, tudi mua kupanda njila mu mupimbu wa mavuba, mu ngakuilu wa mu tshimfuanyi, ne kutshionkomokela mu kapepe ka bukenke, ka disanka ka dîku dia pa buloba bujima dia batendeledi ba Yehowa.

[Bimfuanyi mu dibeji 23]

Ne diambuluisha dia Yehowa, tudi mua kupanda njila mu bijiki bia mu lungenyi