Ukadiku Mutete Buambi Bua Ku Dilolo Anyi?

¹ Padi mudimu wetu upatula bipeta bilenga, tudi ne disanka bua kuwenza. Bishilangane, patudi katuyi tumona tshipeta tshimpe nansha tshimue, mudimu udi ubangisha kututonda ne kawena kabidi utupetesha disanka. Mudimu udi ne mushinga utu ufuta ne utu dibenesha. (Tangila Muambi 3:10-13.) Tudi mua kulamika dîyi-diludiki edi ku mudimu wetu wa buambi. Tudi bamanye ku dimonamona dia malu se: patudi tuyisha ku tshiibi ne ku tshiibi ne tufika ku dituadija mayukidilangana pa Bible, tudi tupingana ku metu bakankamijibue mu nyuma. Tudi tudiumvua ne: tudi bakumbaje bushuwa tshintu kampanda.

² Mu miaba mivule, bantu ba bungi kabatu ku mabu patudi tupitaku mundamunya. Bimue bisumbu mbitshimune lutatu elu pa kulongolola buambi bua ku dilolo, ne mbipete bipeta bimpe. Muetu munemu tudi mua kuyisha ne kuimanyika mudimu eu padi butuku buila. Bamanyishi badi balonda ne: padibu bapita ku mbanza ya bantu kushòò mu mêba a dilolo batu basangana bantu bavule ku mabu ne, pa tshibidilu, bine aba batu badilekelele ne batamba kudiakaja bua kuteleja mukenji wa Bukalenge. Ukadiku mutete buambi bua ku dilolo mu tshijengu tshiudi anyi?​—⁠Tangila Mâko 1:​32-34.

³ Bakulu badi balongolola buambi bua ku dilolo: Mu bisumbu bivule, bana betu bavule batu baya mu bisangilu bia mudimu wa buambi bilongolola ku ndekelu wa mêba a mapingaja anyi pakadi ku mêsu kufiika. Bakulu badi mua kuela meji bua bamanyishi bansonga badi bapatuka mu kalasa mu mapingaja ne bakulumpe badi bajikija mudimu kushòò ku mêba a dilolo. Bua bamue bamanyishi badi kabayi ne mushindu wa kuyisha ku ndekelu kua lumingu, buambi bua ku dilolo munkatshi mua lumingu budi diambuluisha bua kumonabu mua kuenza mudimu pa tshibidilu.

⁴ Buambi bua ku dilolo budi mua kuenzeka mu mishindu mishilangane. Tudi mua kuya ku nzubu ne ku nzubu ne kufila bibejibeji anyi mukanda mulongolola bua kuabanya mu ngondo au. Budi kabidi bupetesha mushindu mulenga wa kukumbula aba bavua kabayi ku mabu pavua bamanyishi bakuabu bapite ku mbelu yabu mundamunya anyi ku ndekelu kua lumingu. Pamu’apa kudi imue miaba idi kabidi bumanyishi bua mu misesu bukumbanyine, mutudi mua kupetangana ne bantu badi bafumina ku midimu yabu. Bamanyishi bavule mbamone se: dilolo ke dîba ditambe buimpe bua kualukila kutangila aba bavua baleje dijinga dia kumanya bivule.

⁵ Tudileje badimuke ne batabuluke: Kupatuka pakadi butuku buile kudi ne njiwu mu bimue bitupa bia mu bimenga bietu. Bidi bia meji bua kuendakana babidi anyi mu tshisumbu. Tudi tusua kuamba ne: tusumbu tuvule tua bamanyishi babidi bayisha pamue mu musesu umue. Bana betu tuvuluke ne: Pa tshibidilu, kabiena bimpe bua kusangisha bamanyishi basatu anyi banayi pamue, bua kuyisha pamue. (Tangila Mâko 6:7; Luka 10:⁠1.) Tudi mua kuyisha nkayetu, anyi babidi babidi. Nebikale bitambe buimpe bua kusungula misesu idi mikenkesha bimpe ne anu mu bijengu bitudi bajadikeku ne: kamuakupeteka njiwu nansha mikese. Patudi tukokola ku tshiibi, tuimane mu mushindu utudi mua kumueneka bimpe ne tudimanyishe bimpe. Tuikalayi ne busunguluji. Pa tshibidilu, mbimpe kuenza mudimu mutshintshikila pakadi butuku buile, pamutu pa kuenza makumbula butuku menemene pakadi bamue bantu badilongolole pamu’apa bua kulala.

⁶ Mushipu ne mêba a dilolo adi mvula kayiyi iloka mmakanyine mu mushindu wa pa buawu bua buambi bua ku dilolo. Yehowa neabeneshe bushuwa madikolela etu a kumuenzela ‘mudimu wa tshijila munya ne butuku.’​—⁠Buak. 7:15.