Tutumikayi Mu Kalasa Ka Mudimu Wa Teokrasi

¹ Ku diambuluisha dia Kalasa ka Mudimu wa Teokrasi, miliyo ya Bantemu ba Yehowa mbashidimuna bua kuikala ba-ministre ba lumu luimpe. Bavule ba kutudi tudi tuvuluka buôwa buakatuenza ne didiumvua bapange kukumbana patuakenza bua musangu wa kumpala mudimu mu kalasa aka; ne mpindieu, tudi ne dianyisha bua buenzeji buaku mu dilubuluka dietu dia mu nyuma, pa bidi bitangila kuakula bua Dîyi dia Nzambi ne kudilongesha. (Tangila Bienzedi 4:13.) Udiku mudifundishe mu kalasa aka ka mushinga anyi?

² Nnganyi udi mua kudifundishamu? Mukanda wa Badilongolole bua kuenza mudimu wetu bimpe udi wandamuna mu dibeji 73 ne: “Bonso badi batantshila tshisumbu, badi mua kudifundisha mêna abo, kusangisha ne bapiabapia badi babuela mu bisangilu bikalabo ne ngikadilu udi kayi mubengibue kudi mêyi makulu a mu Mukanda wa Nzambi.” Tudi tulomba aba bonso badi bakumbaje malu malomba—balume, bakaji ne bana—bua kuya kumonangana ne mutangidi wa kalasa bua kudifundisha.

³ Programe wa kalasa bua 1997: Programe wa Kalasa ka Mudimu wa Teokrasi bua 1997 udi ukonga dikonkonona dia malongesha kabukabu ne dia bantu ba mu Bible, pamue ne malu a kale a bulongolodi. Katuena amu tulubuluja patupu nzanzu yetu ya bungamba-malu ne ya bulongeshi, kadi tudi tulonga bia bungi lumingu luonso ku diambuluisha dia bintu bia mushinga bia mu nyuma bidi mu programe eu. (Nsum. 9:9) Bituikala tudilongolola bua kalasa, tshilejilu ku dibala dia Bible dia ku lumingu ne ku lumingu, ne tubuelamu pa tshibidilu, abi nebituambuluishe bikole mu nyuma.

⁴ Mu 1997, bitupa bivule bia dibala dia Bible bua mudimu No. 2 nebikale bîpi kupita muvuabi kumpala. Padiye ulongolola mudimu wende, mulongi neakaje dibala diende bilondeshile dîba dimukosela bua kujadikaye bungi bua minute ikalaye mua kuangata bua mbuelelu wende ne bua nkomenu pa minute itanu mimupesha. Abi nebimuambuluishe bua kutumikaye tshishiki ne dîba diende ne bua kudimaye ki ng’amu nzanzu yende bua dibala, kadi kabidi dimanya-kuakula kayi mudilongolole.​—⁠1 Tim. 4:13.      

⁵ Mbasakidile bumanyishi bua mu mpukapuka ku nsombelu idi muntu mua kusungula bua mudimu No. 3, ùdì mushindamena pa mukanda wa Dimanya. Nenku, muanetu wa bakaji neikale mua kusungula nsombelu wa dikumbulula, dilonga dia Bible peshi bumanyishi bua mu mpukapuka. Kabiyi mpata nebikengele kutungunuka ne kuela kashonyi nangananga pa dilongesha kadi ki mpa nsombelu nansha.

⁶ Nansha bituikala bapeshibue muabi wa kuenza muyuki wa ndongeshilu, malu manene a mu dibala dia Bible peshi mudimu kampanda wa bulongi, tudi mua kuleja mushinga utudi tuambika Kalasa ka Mudimu wa Teokrasi pa kulongolola ne kuambulula bimpe mudimu wetu, pa kuwenza ne dituishibua ne musangelu, kabiyi kupitshisha dîba ditukosela, pa kuteleja mibelu ya mutangidi wa kalasa ne kutumika nayi, ne kabidi pa kudienzeja misangu yonso bua kukumbaja ne lulamatu bujitu buetu. Dienza dietu dia midimu mu kalasa nedikale dibenesha buetu ne bua aba bonso bikalaku bua kuteleja.