“Diambuluisha Mu Tshikondo Tshiakanyine”
1 Mmunyipu mudibi bikolesha ku muoyo bua kupeta diambuluisha anu patudi tudikengela menemene! (Eb. 4:16) Mu mpuilu wa distrike “Batuadi ba mukenji wa ditalala dia Nzambi,” tuakasanka patuakapeta mu tshikondo tshiakanyine menemene mikanda ibidi ya diambuluisha dia mushinga buetu.
2 Mukanda mupiamupia, Nsapi wa disanka mu dîku, mmufike mu tshikondo tshiakanyine. Udi wela kashonyi pa malu anayi a mushinga bua nsombelu wa disanka mu dîku: (1) Didikanda, (2) dikokela dîyi-diludiki dia bumfumu, (3) diyukidilangana dimpe ne (4) dinanga. Mibelu mifila mu mukanda wa Disanka mu dîku neyambuluishe mêku onso adi atumika nayi bua apete ditalala dia Nzambi. Tudilamine tshikondo tshia kuubala ne ntema ne kuulonga mu dîku. Tudibidije bimpe ne malu adimu bua kuikala badiakaje bua kutumika nawu mu mushindu udi upatula bipeta patuawufila bua musangu wa kumpala kudi bantu, mu Tshisanga.
3 Broshire mupiamupia, Ntshinyi tshidi Nzambi utulomba?, mmufike mu tshikondo tshiakanyine bua kuambuluisha mu diendesha dia mudimu wa dienza bayidi. Nansha mudiye mulongolola bua kuambuluisha kumpalampala bantu badi ne lutatu lua kubala, bantu bakulumpe bavule badi bamanye kubala ne bana batekete kabidi nebababidile mumvuija mapepele adimu a malongesha a nshindamenu a mu Bible. Nebikale pamu’apa amu tshiamu tshia mudimu tshikengela bua kutuadija dilonga ne kuditungunuja mu mukanda wa Dimanya. Kakuyi mpata, broshire eu neambuluishe bantu bavule bua kumanya mabenesha a bungi adibu mua kupeta bu buobu mua kuenza tshidi Nzambi utulomba.
4 Davidi wakumvuija bimpe menemene nyanji yetu pakambaye ne: ‘kena ukengela tshintu, mutshima wende mmukankamija ne lupanza luende luvua lupongoloka.’ (Mus. 23:1, 3, 5) Netusanke bua kushiya mikanda miumvuiji ya Bible eyi mitambe bulenga kudi bantu bavule badi bajinga ne muoyo umue bua kumanya Nzambi mulelela, Yehowa, ne kumusadila.