Bua tshinyi kufuilangana luse?

MUENA Yuda mushikuluji wa miaku ne mufundi Joseph Jacobs tshikondo kampanda wakumvuija difuilangana luse bu “muanda mutambe kubandila ne mutambe bukole mu malongesha a nsombelu mulenga.” Bushuwa, bitu bikolela bavule bua kupatula tshiambilu “Ngakufuidi luse.”

Difuilangana luse, didi anu bu mfranga. Didi mua kutudibua ku budisuile ne kalolo kuonso bua bakuabo anyi [muntu udi mua] kudiunguijiladi ne buiminyi buonso. Tshidi tshitedibua diambedi ke mushindu udi muakane bua muntu wa Nzambi. Tudi ne bua kudima bibidilu bia kufuilangana luse ne kalolo kuonso. Bua tshinyi? Bualu, Nzambi udi ubukankamija ne bualu mmuenenu wa dibenga kufuilangana luse, wa disombuelangana udi ubiipisha malu.

Mêyi aa ng’atu misangu mivule ambibua: “Tshitu nkuatshika tshiji to; ntu ndisombuela!” Diakabi, ke mutu bantu bavule bamba lelu’eu. Tshilejilu, mukaji kampanda musedibue wakajila bayende tshiina munkatshi mua bidimu bipite pa muanda-mutekete bualu “wakangenzela bibi bitambe, ne katshia pine apu tshitu nkumbana bua kumufuila luse to,” ke mudiye wamba. Kadi dijilangana dia mushindu’eu padibu batumika nadi bu tshisabu bua kufukununa dilomba dilekelela kudi udi mukuenzela bubi anyi bu tshingoma bua kunyoka, kaditu misangu mivule dikumbaja dijinga bua disombuela to. Pa mutu pa nanku, didi anu dikolesha tshilumbu, didiundisha njiya. Padi tunyinganyinga tua mushindu’eu katuyi tuimanshibua, disombuela dia tshikisu edi didi mua kunyanga malanda ne nansha makanda a mubidi a muntu.

Bubi bua dibenga kufuilangana luse

Padi muntu kayi mufuidianganyi wa luse, dibenga kumvuangana didi dilela kusama kua mu lungenyi. Ku lukuabo luseke, kusama kua mu lungenyi kudi mua kufikisha ku masama makuabo makole. Doktere muondapianganyi William S. Sadler wakafunda ne: “Muntu nansha umue kêna mua kutshinka menemene bu doktere muondopianganyi bungi bubandile bua masama a bantu ne makenga mmasuikakaja buludiludi ku buôwa, ditshina, dibenga kumvuangana, . . . ngenyi mibole ne nsombelu wa bukoya.” Bushuwa, mbipeta kayipu bibi bidi mpampakenu mibi ipatula? Mukanda kampanda wa malu a buondopianganyi udi wandamuna ne: “Makumi menza . . . adi aleja se: babedi babidi pa basatu bakaya kua munganga bavua ne bimanyinu bia masama bikebesha anyi bivudija kudi masama a mu lungenyi.”

Eyowa, njiya, dikuatshilangana tshiji ne disuyangana, ndekelu wa bionso mbibi. Mpampakenu mibi eyi idi anu bu dimomena didi ku kakese ku kakese dinyanga bilatalata bia mashinyi. Pambelu pa mashinyi padi mua kumueneka palenga patambe, kadi muinshi mua mukubu, bilatalata bidi bienda binyanguka.

Kupita bionso, dibenga dietu bua kufuilangana luse padiku kabingila ka nshindamenu ka kuleja luse didi padi mua kutunyanga mu nyuma. Ku mêsu kua Yehowa Nzambi, netulue anu bu mupika wa mu tshimfuanyi tshia Yezu. Mupika awu bakamufuila luse bua dibanza dinene divuaye nadi kudi mfumuende. Kadi, pakamusengelela mupika nende bua kumufuila luse bua dibanza dikese pa kudifuanyikija ne diende, wakajabala ne muoyo umue ne kubenga kumufuila luse. Yezu wakabileja patoke se: bituikala mushindu wa muomumue katuyi basue bua kufuilangana luse, Yehowa neabenge bua kutufuila luse bua mpekatu yetu. (Matayo 18:21-35) Bituikala katuyi bafuidianganyi ba luse, nenku, tudi mua kujimija kuondo ketu ka muoyo kakezuke kumpala kua Nzambi ne nansha ditekemena dietu bua matuku atshilualua! (Fuanyikija ne 2 Timote 1:3.) Nenku, ntshinyi tshitudi mua kuenza?

Tulonge mua kufuilangana luse

Difuilangana luse dilelela didi diumbukila mu mutshima. Didi dilomba dilekelelangana bilema ne dilekela dijinga kayi dionso dia kusombuela. Nenku, buakane bua ndekelu ne difutu bidi bishala mu bianza bia Yehowa.​—Lomo 12:19.

Kadi tudi ne bua kumanya se: bu mudi “mutshima muikale mupangidi munene, kupita tshintu kayi tshikuabo tshionso ne udi utamba kubiipa ne kunyangukanyanguka,” kawena pa tshibidilu mudiakaje bua kufuilangana luse, nansha padiwu mua kuenza nunku. (Yelemiya 17:9, NW) Yezu yeye muine wakamba ne: “Bualu, ku muoyo ke kudi kufuma meji mabi, bushipianganyi, bibakabaka, buendenda, buivi, dishiminyinangana malu, dinyangilangana lumu.”​—Matayi 15:19, Evanjeliyo wa Mfumuetu Yezu Kristo.

Bushuwa, mutshima wetu udi mua kulongeshibua bua kuenza malu adi malulame. Kadi, dilongeshibua ditudi tukengela didi ne bua kufumina ku mpokolo mutambe kutumbuka. Tuetu nkayetu katuena mua kudilongesha to. (Yelemiya 10:23) Mufundi wa misambu muenzeja ku spiritu wa Nzambi wakajadika muanda eu ne wakasambila bua kupeta bulombodi bua kudi Nzambi. Wakasengelela Yehowa mu masambila: “Unyishe mikenji yebe mifunda. Unjinguluile nshila wa malu audi musue ngenze.”​—Musambu 119:26, 27.

Bilondeshile mukuabo musambu, Mukalenge Davidi wa Izalele wa kale wakafika ku “dijingulula njila” wa Yehowa. Wakamona njila eu diambedi ne kulongelaku. Nanku, uvua mukumbane bua kuamba ne: “Yehowa udi ne luse ne dinanga, kena ukuata tshiji lubilu, udi mûle tente ne dinanga dijalame. Bu mudi tatu ufuila bana bandi luse, mbu mudi Yehowa ufuila badi bamunemeka luse.”​—Musambu wa 103:8, 13.

Tudi ne bua kulonga anu bu muakalonga Mukalenge Davidi. Lomba mu masambila bua kulonga tshilejilu tshipuangane tshia Nzambi tshia kufuilangana luse, anu bu mudibi kabidi bua Muanende. Nenku, tudi mua kulonga bua kufuilangana luse kumbukila mu mutshima.

Kadi, bamue badi mua kudiebeja ne: Ntshinyi tshitudi mua kuenza bua mpekatu munene? Mpekatu yonso idi ne bua kufuidibua luse anyi?

Dikeba ngikadilu wa pankatshikatshi

Padibo benzele muntu malu matambe bubi, kanyinganyinga kadi mua kuikala kavule. Ebi bidi nangananga bilelela bikala eu udi kayi bualu bamuenzele mpekatu munene. Bamue badi mua kudiebeja ne: ‘Mmunyi mundi mua kufuila muntu luse eu uvua mungenzele bibi ne munyingalaje?’ Mu muanda wa mpekatu munene udi muakanyine dipatshibua, eu udi kayi mubunda tshibawu udi ne bua kulonda mubelu udi mu Matayo 18:15-17.

Mu muanda kayi wonso, bionso bidi anu ku bukokeshi bua eu udi muenza bibi. Kudiku kamanyinu ka dinyingalala dilelela katshia wenza bubi anyi? Muenji wa mpekatu mmushintuluke, pamu’apa mutete nansha mua kudiakaja anyi? Ku mêsu kua Yehowa, dinyingalala dia mushindu’eu didi nsapi wa difuilangana luse nansha bua mpekatu minene menemene. Tshilejilu, Yehowa wakafuila Manase luse, umue wa ku bakalenge babi batambe mu mianda ya kale ya bena Izalele. Wakashindamena pa tshinyi? Nzambi wakenza nunku bualu Manase wakadipuekesha ne kunyingalala bua nsombelu yende mibi.​—2 Kulondolola 33:12, 13.

Mu Bible, dinyingalala dilelela didi dilomba dishintulula mmuenenu ne muoyo umue, kunyingalala ne muoyo umue bua mibi kayi yonso mienza. Muaba udibi bikumbanyine ne udibi mua kuenzeka, dinyingalala mbaditue mu nyima kudi madikolela bua kupingajila muntu udibu benzele bibi [bintu biende]. (Luka 19:7-10; 2 Kolinto 7:11) Padiku kakuyi dinyingalala dia mushindu’eu, Yehowa pende kakufuilangana luse to.a Kupita apu, Nzambi kêna utekemena kudi bena nkristo bua kufuilabo luse aba bavua bangabanga batokeshibue mu nyuma kadi bikale mpindieu bena mutu mukole, ne kabayi banyingalala bua mibi yonso idibo benze. (Ebelu 10:26-31) Mu nsombelu mibi mitambe, pamu’apa difuilangana luse kadiakuikala diakanyine to.​—Musambu wa 139:21, 22; Yehezekele 18:30-32.

Padiku anyi padiku kakuyi mushindu wa kufuilangana luse, eu udibu benzele mpekatu udi ne bua kukonkonona lukuabo lukonko: Ndi anu ne bua kushala ne mpampakenu mukole, ndiumvua anu mutapibue ku mutshima ne muikale ne tshiji tshikole, too ne pajika tshilumbu nkong anyi? Tukonkonone tshilejilu kampanda. Mukalenge Davidi wakadiumvua mutapibue bikole ku mutshima pakashipa Yoabe mfumu wa masalayi ende Abnere ne Amasa “balume babidi bakane ne balenga kupita muvua [Yoabe].” (1 Bakalenge 2:32) Bushuwa, Davidi wakaleja patoke tshiji tshiende ne njiya yende kudi Yehowa mu masambila. Kadi, kunyima, pamu’apa tshiji tshia Davidi tshikole tshiakatuya. Kakakokeshibua too ne ku ndekelu kua matuku ende to. Davidi wakatungunuka ne kuenza mudimu pamue ne Yoabe, kadi kakafuila anu luse patupu mushipianganyi eu uvua kayi munyingaladi. Davidi wakatabalela bua buakane kulejibuabu ku ndekelu.​—2 Samuele 3:28-39; 1 Bakalenge 2:5, 6.

Bidi mua kuangata mêba bungi kampanda ne madikolela kumpala kua se: eu udi mutapibua ku mutshima bua mpekatu minene ya bakuabo afike ku dijikija tshiji tshiende. Diuma dia mputa eu didi mua kuikala dipepele bu muenzedianganyi wa bibi mua kuitaba bubi buende ne kunyingalala. Nansha nanku, eu udibu benzele mpekatu udi mua kupeta dikankamijibua ne disulakana mu dijingulula diende dia buakane ne meji bia Yehowa ne mu tshisumbu tshia bena nkristo, kakuyi diangata ne mushinga nsombelu wa muenji wa bibi.

Kabidi umanye se: paudi ufuila bushuwa muenji wa mpekatu luse, abi kabiena biumvuija se: udi wela mpekatu kunyima to. Bua muena nkristo, difuilangana luse didi diumvuija kushiya ne dieyemena dionso bualu ebu mu bianza bia Yehowa. Udi Nzuji muakane wa bukua-bifukibua, ne nealeje buakane mu tshikondo tshiakanyine. Nealumbuluishe bia muomumue “bena masandi bajike ne bena masandi babake” bua tshitungu.​—Ebelu 13:4.

Bipeta bia difuilangana luse

Davidi mufundi wa misambu wakimba ne: “Bualu wewe, O Yehowa, udi muimpe ne muanyishe bua kufuilangana luse; ne bulenga-bunangi kudi buonso badi bakubila budi bua bungi.” (Musambu wa 86:5, NW) Udiku “mudiakaje bua kufuilangana luse” anu bu Yehowa anyi? Bipeta bimpe bidi bivulavulayi.

Tshia kumpala, kufuila bakuabo luse kudi kushemeja malanda. Bible udi udimuija bena nkristo ne: “Nuleshangana kalolo, nuikalangane ne mitshima ya luse, nulekelangane malu mabi enu bu muakanulekelela Nzambi malu mabi enu mu Kilisto.”​—Efeso 4:32.

Tshiibidi, difuilangana luse didi dibueja ditalala. Ebi kabiena anu ditalala patupu ne bantu netu kadi ditalala dia munda munda.​—Lomo 14:19; Kolosai 3:13-15.

Tshiisatu, kufuila bakuabo luse kudi kutuambuluisha bua kuvuluka se: tuetu petu tutu tukengela difuidibua luse. Eyowa, “buonso bakenza mpekatu ne kabena bafika ku butumbi bua Nzambi.”​—Lomo 3:23, NW.

Bua kujikija, kufuila bakuabo luse kudi kutokeshila mpekatu yetu njila wa kufuidibuayi payi luse kudi Nzambi. Yezu wakamba ne: “Binuajimishila bantu mibi yabo, Tatu wenu udi mu diulu neanujimishile mibi yenu.”​—Matayo 6:14.

Anjibi kuela meji malu mavule avua ne bua kuikala mu lungenyi lua Yezu ku dilolo dia lufu luende. Uvua uditatshisha bua balongi bende, bua mudimu wa buambi ne nangananga bua kushalaye ne muoyo kezukezu kudi Yehowa. Kadi, nansha pavuaye mu dikenga dikole pa mutshi wa tshinyongopelu, ntshinyi tshiakambaye pa muanda eu? Wakamba kabidi mu mêyi ende a ndekelu ne: “Tatu, ubafuile luse.” (Luka 23:34, NW) Tudi mua kuidikija tshilejilu tshipuangane tshia Yezu pa kufuilangana luse mu mutshima umue ne mukuabo.

[Mêyi adi kuinshi]

[Bimfuanyi mu dibeji 5]

Udiku mujingulule lungenyi ludi mu tshimfuanyi tshia Yezu tshia mupika uvua kayi mufuilangane luse anyi?

[Bimfuanyi mu dibeji 7]

Kufuila bakuabo luse kudi kushemeja malanda ne kutuala ditalala