Udi ne “dieba mu mubidi” anyi?
1 Tudi ne dijinga dikole dia kukumbaja mudimu wetu wa kuyisha lumu luimpe ne makanda etu onso. Kadi bua bavule ba ku bana betu basuibue mbikole bua kudifila tshishiki mu mudimu eu bua masama a munanunanu a mubidi anyi bulema kampanda, bidi bibapangisha mua kuenza muabu muonso mudibu bajinga kuenza. Buabu buobu, bidi mua kuikala bualu bukole bua kuakama nyanji ya diteketa mu maboko, nangananga padibu bamona bakuabu bazanzamuke bikole mu mudimu wa buambi.—1 Kol. 9:16.
2 Tshilejilu tshia kuidikija: Mupostolo Paulo uvua ne bua kutantamena “dieba mu mubidi.” Wakalomba Yehowa misangu isatu bua kumumbushilaye tshipumbishi etshi tshivua tshimutatshisha, tshiakabikilaye ne: “muanjelo wa Satana” uvua umukengeshakengesha. Kadi, nansha muvuaye ne dieba adi, Paulo wakakama ne wakaya mutangile kumpala mu mudimu wende. Kavua udiumvuila luse anyi udiabakena misangu yonso nansha. Wakenza muende muonso. Nsapi wa dilubuluka diende mu diakama lutatu uvua dijadika edi dia kudi Nzambi: ‘[“Bulenga buanyi bukena buakanyine,” NW] budi bukukumbana, bua bukole buanyi budi bukumbajibua tshishiki mu butekete buebe.’ Butekete bua Paulo buakalua bukole pakalongaye mua kuitaba nsombelu wende ne kueyemena Yehowa ne spiritu munsantu bua kumona mua kutantamana.—2 Kol. 12:7-10.
3 Mushindu uudi mua kutantamana: Butekete bua bumuntu budi bukuelela mikalu mu mudimu webe muenzela Nzambi anyi? Bikalabi nanku, idikija mmuenenu wa Paulo. Nansha disama diebe anyi bulema kabiyi mua kuondopibua kashidi mu ndongoluelu eu wa malu, udi mua kuteka dieyemena diebe dijima kudi Yehowa, yeye udi umvua tshiudi ukengela ne neakupeshe “bukole budi bupite bua pa tshibidilu.” (2 Kol. 4:7, NW) Babidila diambuluisha diudi mua kupetela mu tshisumbu, kuditapuludi kudi bakuabu. (Nsu. 18:1) Biakukolelabi bua kudifila mu mudimu wa ku tshiibi ne ku tshiibi, keba mishindu miakanyine ya kufila bumanyishi bua mu mpukapuka anyi bua ku telefone.
4 Nansha bikala dieba mu mubidi dikepesha biudi mua kuenza mu mudimu, kuena ne bua kudiumvua bu muntu udi kayi ne bua nsongo budiye wenza. Anu bu Paulo, wewe pebe udi mua “kumanyisha bantu lumu luimpe lua [“bulenga bukena butuakanyine bua,” NW] Nzambi,” pa kuenza malu bilondeshile makanda ebe ne nsombelu webe. (Bien. 20:24) Mu dienza madikolela bua kukumbaja mudimu webe, umanye se: Yehowa udi usanka bikole.—Eb. 6:10.