Tuambuluishe Bakuabu Bua Kupeta Busambi
1 Bantu bavule mbapungile ne diumvua misangu ne misangu bakula bua bipupu, mvita, dibunda bibawu ne makenga. Nansha mudi busambi kabuyi mu ngumu itudi tupeta, ntshintu tshidi bukua-bantu natshi dijinga dikole. Kusamba muntu, peshi kumukolesha ku muoyo, kudi kumvuija kumupetesha bukole ne tubingila tua kutekemena, kumuambuluisha bua kuakamaye lutatu kampanda. Bantemu ba Yehowa mbapeshibue bia mudimu bua kufila diambuluisha dia mushindu eu. (2 Kol. 1:3, 4) Broshire yetu miashila pa Bible, mu Tshimungu ne mu Kabitende, idi ne mikenji ya bulelela ne ya busambi. (Lomo 15:4) Mona imue mibelu yatuambuluisha bua kuyifila mu nsombelu kabukabu:
2 Bualu kampanda budi bukuatshisha buôwa budi mua kutupetesha mushindu wa kufila bumanyishi ne kusamba bakuabu ne mêyi a buena aa:
◼ “Patu malu a mushindu’eu enzeka, bamue batu badiebeja bikala Nzambi udiku bushuwa, ne bikalabi nanku, né utuku uditatshisha bua bualu buetu. Udi wela meji kayi? [Lekela muntu andamune.] Umue wa ku mishindu ya kumanya bu bikala Nzambi udiku ng’wa kutumika ne dîyi-diludiki dimanyike bimpe.” Bala Ebelu 3:4. Tela bintu bikuabu bidi bitunyunguluke ne biakafukibua bushuwa. Pashishe utungunuke ne: “Ndi ne broshire uwamona bushuwa muikale ne busambi. Udi ne tshiena-bualu tshia Dieu se soucie-t-il vraiment de nous ? [Bala nkonko idi pa tshizubu.] Udi ufila bijadiki bidi bituisha, ki ng’anu bua ne: Nzambi udiku, kadi se: neajikije mu katupa kîpi emu nsombelu yonso idi kayiyi ya buakane itudi tumona lelu’eu. Newanyishe kumubala anyi?” Pashishe nupunge dîyi bua dikumbulula.
3 Mu dikumbulula, newikale mua kuamba ne:
◼ “Tuvua bakule bua tshijadiki tshia dikalaku dia Nzambi ne mvua mukushile broshire wa Dieu se soucie-t-il vraiment de nous ? Pamu’apa uvua mubambishe lungenyi elu mu dibeji dia 7. [Leja tshimfuanyi ne amba mu mêyi makepesha malu a mu tshikoso tshia 15.] Etshi tshidi amu tshilejilu tshimue munkatshi mua bikuabu bua kuleja ne: Nzambi udi uditatshisha bua bualu buetu udiku bushuwa. [Bala tshikoso 27 tshia mu dibeji dia 8.] Dilonga dia Bible dia muntu pa nkayende didi dingambuluisha bua kuakama ntatu ya mu nsombelu wa matuku onso bualu didi difila mmuenenu wa Nzambi pa malu aa.” Lomba muntu bua kumuleja mushindu ututu tulonga.
4 Bumanyishi bufidila ku telefone ku diambuluisha dia broshire wa “Quel est le but de la vie? Comment le découvrir?” Udi mua kudimanyisha ne kuamba ne:
◼ “Ndi nkuela nshinga bua mukenji wa mushinga mukole bualu tshiena ne mushindu wa kukukumbula meme muine.” Bala tshikoso tshia kumpala mu dibeji 4 dia broshire, ne mmuenenu wa pa tshibidilu, bienze bu se: udi kumpala kua muntu muine. Muebeje mmuenenu wende ne mulekele andamune. “Ndi mubulule Bible wanyi mu Yeshaya 45:18. Mvese eu udi uleja ne: bakafuka buloba bua bualu buetu. Ndiku mua kukubadilaye anyi?” Pashishe, umvuija tshipatshila tshia broshire eu ne ebeja biwikala mua kumutuadila mukuabu.
5 Ku dikumbula dialonda, newikale mua kuteta ngenzelu eu bua kutuadija dilonga:
◼ “Ndi musue kutungunuka ne muyuki wetu wa musangu mushale ne tshilejilu tshidi tshileja kutudi mua kukebela mandamuna pa tshipatshila tshia muoyo. [Umvuija bikoso 1 ne 2 bia mu dibeji 6 dia broshire wa But de la vie.] Buakabuluibua 4:11 udi umvuija ne: Yehowa Nzambi m’Mufuki wetu. [Bala mvese.] Uvua bushuwa ne kabingila ka kutufuka. Bantu bavule bavua basue kumanya kabingila aka bakaditua mu dilonga dia Dîyi difunda dia Nzambi, Bible. Ndi musue kukupetesha mushindu wa kukamanya.” Umvuija mushindu ututu tuenza malonga etu a Bible a ku nzubu kakuyi difuta mfranga ne nupunge dîyi bua kutuadija dilonga.
6 Lungenyi elu luimpe neluikale mua kusamba bantu badi bajimije munanga kampanda:
◼ “Ndi ngenza mudimu wa patoke bua kuambuluisha aba bonso badi bajimije munanga kampanda. Bushuwa ebu mbumue bua ku malu adi matambe kukola bua kutshimuna. Ke bua tshinyi broshire udi ne tshiena-bualu tshia Padi muntu uudi munange ufua mmulongolola. Ukadi muambuluishe miliyo ya bantu. Ndi musue kukuleja tshidiye wamba pa bidi bitangila dilaya kampanda didi disankisha dia Yezu Kristo. [Bala tshikoso tshitanu tshia mu dibeji dia 26, pamue ne Yone 5:21, 28, 29.] Tangila tshimfuanyi etshi, mu dibeji dia 29: tshidi tshileja dibiishibua dia Lazare ku lufu kudi Yezu anu bu mudibi bilonda mu Evanjeliyo. Biwasankidila dibala dia broshire eu udi ne busambi, nensanke bua kukushilaye.”
7 Mu dikumbulula, newikale mua kuleja kabidi tshimfuanyi tshia mu dibeji dia 29 mu broshire wa “Padi muntu uudi munange ufua,” ne kuamba ne:
◼ “Musangu mushale, tuakakula bua dibiishibua dia Lazare ku lufu. [Bala miaku misendamija idi ku luseke lua tshimfuanyi mu dibeji dia 28 ne konkonona ngenyi mileja pa ka-tshiena-bualu ka: “Bivua bienzeke bushuwa anyi?”] Bikala mutshima webe utekemena bua kuitabuja ne: newikale mua kumona dimue dituku muntu kampanda wakafua, anyisha nkuambuluishe bua upete pebe ditekemena dia dibiishibua ku lufu.” Pashishe umulombe bua dilonga dia Bible.
8 Tuanyishayi bua kuenza muetu muonso mu ngondo idi ilonda bua kuidikija Yezu ne “kusamba bonso badi mu madilu.”—Yesh. 61:2.