Ndongamu mupiamupia wa mpuilu wa tshijengu

“Lamayi mêyi-matuma a Nzambi ne ikalayi ne muoyo” ke tshiena-bualu tshia ndongamu wa mpuilu wa tshijengu wa matuku abidi kutuadijila mu Kabitende. (Nsu. 4:4) Ndongamu eu neazangike bua tshinyi ditumikila mêyi-matuma a Nzambi kadiena bujitu to. Nealeje kabidi mudi kuenza disua dia Nzambi kukolesha ku muoyo ne kutuala disanka dilelela kabidi ne ditekemena bua matuku atshilualua.​—Mat. 11:28-30; Yone 13:17.

Aba badi bajinga kutambula mu mpuilu eu bua kulonda dîyi dituma kudi Kristo badi ne bua kuambila mutangidi-muludiki, ne yeye neangate mapangadika adi akengedibua.​—Mat. 28:19, 20.

Muyuki mukosolola neuleje mishindu miakanyine itudi mua kuleja dinanga kudi Nzambi ne kudi bana betu. (Yone 13:34, 35; 1 Yone 5:3) Nekuikale kabidi mibelu idi ilenga ku muoyo miangata mu Musambu wa 19 ne wa 119. Nansha muvua madimuija mapudija ku spiritu adi mu Misambu eyi mafunda kukadi binunu bia bidimu, netumone mudiwu ne dikuatshisha buetu tuetu lelu’eu.

Muyuki wa patoke wenzabu kudi mutangidi wa distrike newikale ne tshiena-bualu: “Utshine Nzambi ne ulame mêyi-matuma ende.” (Muam. 12:13) Muyuki wa mutangidi wa tshijengu wa ndekelu neuleje mudi bansonga mua kutamba kupetela masanka ku nsombelu wabu mpindieu ne bua tshinyi badi mua kuikala ne dieyemena mu matuku atshilualua a tshiendelele. Mutangidi wa distrike udi ukomesha ndongamu eu mu ditela masanka mavule adi afumina ku dikala ne nsombelu mulombola kudi ‘mukenji wa butumbi’ wa dinanga. (Yak. 2:8) Bushuwa, eu n’ndongamu wa mpuilu wikala muntu nansha umue kayi mua kuitaba bua kupumbisha nansha!