Tulongolole Dileja Dietu Nkayetu Dia Bibejibeji

 ¹ Tudi tuanyisha Tshibumba tshia Nsentedi ne Réveillez-vous ! bua biena-bualu biakanyine tshikondo ne bilongeshi, bìdì biakula pa malu onso, bituadijile ku mianda ya matuku aa too ne ku “bintu biondoke bia Nzambi.” (1 Kol. 2:​10, NW) Yonso wa kutudi mmuvuluke malu mapiamapia ne miibaki mavule avuaye mubale mu bibejibeji ebi bikuata nabi mudimu kudi Yehowa bua kumanyisha bulelela ku kakese ku kakese. (Nsum. 4:18) Ne tudi bushuwa ne dijinga dia kubiabanya bikole menemene.

 ² Tukonkoloje teritware wetu: Mbantu ba mushindu kayi badi mutumba netu? Bikala bantu ne nsombelu wa diyumbakana, nebitukengele bua kulongolola dileja dia pa lukasa dìdì dilenga buludiludi pa kipatshila kaadi. Bishilangane, bikala bena mu teritware wetu ne nsombelu mutalale, netuikale imue misangu mua kuakula bia bungi. Miaba ìdì bantu benza mudimu mu munya, netupete bipeta bimpe tuetu mua kupita ku mabu ku ndekelu kua mêba a mapingaja peshi ku dilolo. Mu munya, netuikale mua kupetangana ne bamue mu diyisha mu misesu peshi ku magazen ne magazen. Bamue bamanyishi batu bapeta bipeta bimpe padibu bakula ne bantu ku biimanyikidi bia mashinyi ne mu mpangu ya dijikijila lutetuku.

 ³ Tumanye bimpe bibejibeji bietu: Tubale nimero yonso anu patutshidi tumupetelaku. Tusungule biena-bualu bitudi bamone se: nebikoke ntema ya bena mu teritware wetu. Mmalu kayi adi mu meji abu? Mu tshiena-bualu tshitudi balongolole bua kuzangika, tukebe mvese kampanda utuikala mua kutela. Tukebe lukonko lua kuela bua kusonsola dijinga dia kumanya bia bungi dia mutuyukidishi. Tusungule mvese muakanyine utuamubadila pikalaku mushindu. Ndekelu wa bionso, tuele meji pa mushindu utuamuambila kabingila katudi tulombela dipa dia mfranga dikese ne kunzulula njila bua dikumbulula.

 ⁴ Tulongolole mêyi etu a mbangilu: Tusungule ne lubatshi miaku ya ntuadijilu ituamba bua kudimanyisha ne kutuadija diyukidilangana. Bamue batu bapeta bipeta bimpe padibu bamba ne: “Ndi mubale tshiena-bualu tshìdì tshinsankishe mu tshibejibeji etshi, ne ndi nganyisha bua kutshimanyisha kudi bakuabu.” Bavule batu batuadija ne lukonko ludi luludika diyukidilangana ku lungenyi ludibu balongolole bua kuyukidilapu. Tshilejilu:

 ⁵ Biwikala wakula pa tshiena-bualu tshia divulangana dia dibunda bibawu, udi mua kuebeja ne:

◼ “Tshidi tshikengela ntshinyi bua tuetu kulalaku dikuabu ku matshi talalaa bapue muoyo, katuyi ne buôwa bua se: nebatuibe peshi nebatuluishe?” Umvuija ne: údí ne mamanyisha pa bidi bitangila dijikija lutatu elu, ku diambuluisha diadi bimvundu bia mishindu yonso bia mu nsombelu wa bantu nebijike. Tela miaku kampanda mifunda mu tshibejibeji ìdì ifila kabingila ka kutekemena dishintuluka edi. Pawalukila, ukoke ntema ya muntu pa nshapita 1 mu mukanda wa Dimanya.

 ⁶ Paudi wakula pa tshiena-bualu tshia nsombelu wa mu dîku, udi mua kuamba ne:

◼ “Baledi bavule mbamanye se: kabiena bualu bupepele bua kukolesha dîku mu matuku etu aa. Mikanda mivule mmifundibue pa muanda eu, kadi nansha bamanyi bapiluke kabatu bapetangana ku ngenyi yabu pa bualu ebu. Kudiku muntu kampanda udi mua kutupetesha mibelu ya mushinga anyi?” Tela miaku kampanda mifunda mu tshibejibeji ìdì ileja mibelu ya meji mipeta mu Bible. Pawalukila kumonangana ne muntu eu, uyukidilangane nende pa ngenyi ya mu Bible idi itangila dikolesha dia bana, mileja mu mabeji a 145-8 a mukanda wa Dimanya.

 ⁷ Bua kuakula pa tshiena-bualu tshidi tshiakula bua muanda kampanda wa mu nsombelu wa bantu, udi mua kuamba ne:

◼ “Bantu ba bungi badi badiumvua bafinakaja bualu tudi mu tshikondo tshikuate buôwa. Utuku wela meji ne: Nzambi utu mutufundile nsombelu wa nunku anyi?” Leja tshiena-bualu tshìdì tshiamba mua kujikija ntatu ya lelu peshi tshifila tubingila tua kuindila nsombelu ukena wa buôwa wa matuku atshilualua. Mu dikumbulula diebe dialonda, nuyukidilangane pa tshimfuanyi ne mumvuija atshi a mu kazubu mu mabeji 4-5 a mukanda wa Dimanya, pashishe utuadije diakamue dilonga dia Bible.

 ⁸ Tumanye mua kupetangana ne mutuyukidishi: Bantu batudi tupetangana nabu batu bafumina ku miaba mishilashilangane ne batu muntu ne muntu ne ende malu adiye wanyisha. Tulongolole dileja dia nshindamenu dituakaja bilondeshile ngenyi ya mutuyukidishi yonso. Tudianjile kuela meji pa malu atuamba bilondeshile muntu utuapetangana nende: mulume, mukaji, mukulakaje peshi nsonga. Kakuena mukenji pa muanda eu nansha. Tutumike ne maleja atudi nawu adi atupetesha bipeta bimpe. Mu mishindu yonso, tuikale ne musangelu, tuakule ne mutshima ne tumanye kuteleja. Aba badi “mu ngikadilu mukengedibue” nebamone muoyo muimpe wetu ne nebandamune mu mushindu muakanyine.​—⁠Bienz. 13:​48, NW.

 ⁹ Tuambuluishangane: Pa kushintakajangana ngenyi ne bakuabu, netulengeje ngakuilu wetu. Bituikala tuambulula ne binetu maleja etu, netupete dipiluka ne dishindika. (Nsum. 27:17) Netutambe kudiumvua bapepele patudi ku biibi. Bidi bia mushinga bua baledi kulama dîba dia kuambuluisha bana babu bua kudilongololabu, babateleja padibu bambulula dileja diabu ne babapesha mibelu bua kudilengeja. Bua bapiabapia, dipatuka mu buambi pamue ne bamanyishi bamonemone malu nedibambuluishe bikole.

 ¹⁰ Kulongolola dileja dietu nkayetu dia bibejibeji kakuena ne bua kuikala ne lutatu. Bidi amu bualu bua kulama mu lungenyi muanda kampanda mujadika wa kuamba ne kuwamba mu mushindu wa kukoka ntema. Tuetu mua kuikala ne lungenyi lua kuenza bualu buimpe ne lua kujingulula malu, netuakaje dileja dimpe ditambe diajula ngandamuinu miakane kudi bantu.

 ¹¹ Diabanya dia bibejibeji ng’umue wa ku mishindu ya mushinga itudi tumuangalaja mukenji wa Bukalenge pa buloba. Bituikala mua kufila Tshibumba tshia Nsentedi ne Réveillez-vous ! ku bianza bia bantu ba muoyo muimpe, bibejibeji ebi nebiakule nkayabi. Tuvuluke misangu yonso mushinga wabi, ne se: mukenji mupetamu udi mua kusungila mioyo. Mushindu eu wa “kuenza bimpe ne kuabanyangana bintu ne bakuabu” udi bushuwa usankisha Yehowa.​—⁠Eb. 13:⁠16, NW.