Bua tshinyi bishima nkayabi kabiena biibaka ditabuja
TSHIUDI umona ke tshiudi witaba. Eu ke mmuenenu wa bavule. Bamue batu bamba ne: bavua mua kuitabuja Nzambi bu yeye ne bua kudisokolola mu mushindu kampanda wa tshishima. Pamu’apa bidi nanku, kadi ditaba bu adi didi mua kufikisha ku ditabuja dilelela anyi?
Tangila bena Izalele Kora, Datane, ne Abirame. Bible udi uleja ne: bavua bamonyi ba bishima ebi bikuate buôwa bia kudi Nzambi: bipupu dikumi bitshikijila pa Ejipitu, dipatuka dia tshisamba tshia Izalele pa kusabuka Mbuu Mukunze, ne dibutudibua dia Faraone muena Ejipitu pamue ne tshiluilu tshiende tshia basalayi. (Ekesode 7:19–11:10; 12:29-32; Musambu 136:15) Kora, Datane, ne Abirame bakumvua kabidi Yehowa wakula kumbukila mu diulu ku Mukuna wa Sinayi. (Dutelonome 4:11, 12) Kadi, mutantshi kaulepi kunyima kua bishima ebi bimane kuenzeka, bantu aba basatu bakajula ditombokela Yehowa pamue ne basadidi bende batekibue.—Nomba 16:1-35; Musambu 106:16-18.
Bidimu bu 40 pashishe, muprofete mubikidibue ne: Balaame wakadimuenena pende tshishima. Nansha dibuela dia muanjelu mu bualu ebu kadiakamupangisha bua kudilamika ku luseke lua bena lukuna ba Nzambi, bena Moaba. Nansha muvuaku tshishima atshi, Balaame wakatungunuka ne wakakandamena Yehowa Nzambi pamue ne bantu bende. (Nomba 22:1-35; 2 Petelo 2:15, 16) Kadi, dipanga ditabuja dia Balaame ndikese pa kudifuanyikija ne dia Yudase Iskariote. Nansha muvuaye muinende wa Yezu wa pabuipi ne mumonyi wa mulongolongo wa bishima bia dikema, Yudase wakapàngila Kristo bua bitupa bia mpalata makumi asatu.—Matayo 26:14-16, 47-50; 27:3-5.
Bamfumu ba malu a Nzambi bena Yuda bavua pabu bamanye bishima bivule bia Yezu. Pakamanaye kubiisha Lazaro, bakitaba mene se: “Muntu eu udi wenza bimanyinu bia bungi.” Kadi dimona dia Lazaro ukavua ne muoyo tshikondo atshi diakatekeshaku mitshima yabu ne kubapa ditabuja anyi? Tòo, bushuwa. Pamutu pa nanku, bakela tshitungu bua kushipa Yezu ne Lazaro!—Yone 11:47-53; 12:10.
Nansha dibuela dia Nzambi dia buludiludi mu bualu ebu diakapanga bua kupatula ditabuja mu bantu abu babi. Pavua Yezu mu lubanza lua ntempelo musangu kampanda, wakasambila ne dîyi dikole ne: “Tatu, utumbishe dina diebe.” Yehowa wakandamuna ne dîyi difuma mu diulu ne: “Nakaditumbisha, nenditumbishe kabidi.” Kadi, bualu ebu bua tshishima kabuakapatula ditabuja mu mitshima ya aba bavuapu nansha. Bible udi wamba ne: ‘Yeye wakenza bimanyinu bia bungi ku mêsu kuabu, kadi kabakamuitabuja.’—Yone 12:28-30, 37; fuanyikija ne Efeso 3:17.
Bua tshinyi bishima kabiakiibaka ditabuja
Mmunyi mudi dipanga ditabuja bu nunku mua kuikalaku pa kumona bishima bungi nunku? Dibengibua dia Yezu kudi bamfumu ba malu a Nzambi bena Yuda didi nangananga dimueneka dikemesha paudi utangila se: mu tshikondo mene tshiakatuadijaye mudimu wende, bena Yuda mu ka-bujima kabu bavua “batekemena” ‘Kristo,’ peshi Masiya. (Luka 3:15) Kadi, muji wa bualu uvua muimanyine pa tshivua matekemena au. William E. Vine, mumanyi wa malu a diumvuija dia miaku, udi utela mêyi a mushikuluji kampanda mumanyike wa Bible muikale wamba ne: bena Yuda bavua ne lungenyi luimanyikila pa Masiya uvua ne bua kubapetesha “ditshimuna dia panu” ne “dibodiama dia bintu.” Bua bualu ebu, kabavua badilongolole bua Yezu wa mu Nazarete, mudipuekeshi, ukena muena tshididi, wakamueneka munkatshi muabu bu Masiya mulelela mu 29 B.B. Bamfumu ba malu a Nzambi bavua kabidi batshina se: malongesha a Yezu avua mua kulua kunyanga nsombelu wa malu uvuaku tshikondo atshi ne kuteka mianzu yabu minene mu njiwu. (Yone 11:48) Ngenyi yabu midifumbila pamue ne budisui biakabafofomija ku diumvuija dia bishima bia Yezu.
Bamfumu ba malu a Nzambi bena Yuda ne bakuabu bakabenga pashishe tshijadiki tshia tshishima tshia se: balondi ba Yezu bavua ne dianyisha dia Nzambi. Tshilejilu, pakuondapa bapostolo bende muntu kampanda mulela mulema, bena tshiji ba mu kabadi kanene ka bena Yuda bakakonka ne: ‘Netuenzele bantu aba tshinyi? Bulelela, bonso badi bashikama mu Yeruzaleme badi bamanye ne: bantu aba mbenze tshimanyinu tshidi tshimanyibua; katuena bamanye mua kutshivila. Kadi bua bualu ebu kabutangadiki munkatshi mua bantu, tubakanyinayi ne: kanuambidi muntu bualu mu dîna dia Yezu.’ (Bienzedi 3:1-8; 4:13-17) Mu butoke buonso, tshishima etshi tshia dikema katshivua tshiibake anyi tshifile ditabuja mu mitshima ya bantu abu nansha.
Dialakana, lutambishi, ne lukuka mmalu adi masake bavule ku diumisha mitshima yabu. Bidi bimueneka bia muomumue ne muanda wa Kora, Datane, ne Abirame, batela ku ntuadijilu eku. Lubabu, buôwa, ne mulongolongo wa mmuenenu mikuabu minyangi mbipumbishishe bakuabu. Tudi tuvuluka kabidi banjelu ba bupidia, ba-demon, bavua kale ne muabi wa kutangila mpala mene wa Nzambi. (Matayo 18:10) Kabena belakana pa dikalaku dia Nzambi. Bushuwa, “bademon badi bitabu[j]a kabidi, badi bazakala.” (Yakobo 2:19) Pabi, kabena ne ditabuja kudi Nzambi.
Diumvuija dia ditabuja dilelela
Ditabuja ndipite ditaba patupu. Ndipite kabidi ngandamuinu kampanda wa mu mpampakenu wa tshitupa tshîpi ku tshishima kansanga. Ebelu 11:1 (NW) udi wamba ne: “Ditabuja ndindila dishindame dia malu matekemena, dileja dia patoke dia malu malelela nansha kaayi amueneka [ne mêsu].” Muntu udi ne ditabuja mmutuishibue mu mutshima wende se: tshionso tshidi Yehowa Nzambi ulaya tshidi anu tshikumbajibua bimpe. Kabidi, tshijadiki tshikena kuvila tshia malu malelela akena mamona ne mêsu ntshitambe bukole mushindu udibu bamba ditabuja dine se: ndikumbanangane ne tshijadiki atshi. Eyowa, ditabuja ndishindamene pa tshijadiki. Ne mu bikondo bishale, bishima bivua ne mudimu mu didiunda dia ditabuja peshi mu didiibaka. Bimanyinu bienza kudi Yezu biakambuluisha bua kutuisha bakuabu se: uvua Masiya mulaya. (Matayo 8:16, 17; Ebelu 2:2-4) Bia muomumue, mapa bu nunku a spiritu munsantu wa Nzambi, peshi bukole buenzeji, bu mudi diondapa dia mu tshishima ne diakula mu miakulu mikuabu biakajadika ne: bena Yuda kabatshivua kabidi ne dianyisha dia Yehowa kadi ne: dianyisha diende tshikondo atshi divua kudi tshisumbu tshia bena nkristo, tshiasa kudi Muanende, Yezu Kristo.—1 Kolinto 12:7-11.
Munkatshi mua mapa aa a tshishima a spiritu muvua bukokeshi bua kudianjila kuamba malu. Pavua bantu bakena bena kuitabuja bamona tshishima etshi, bamue bavua basakibua ku ditendelela Yehowa, bamba ne: ‘Nzambi udi munkatshi muenu bulelela.’ (1 Kolinto 14:22-25) Kadi, Yehowa Nzambi kakalongolola bua se: bishima bishale ngikadilu wa pa tshibidilu wa ntendelelu wa bena nkristo. Nenku, mupostolo Paulo wakafunda ne: “Buambi bua malu . . . nebujike; dipa dia kuakula miakulu mishilangane nedijike.” (1 Bena Korente 13:8, MMM) Mbimueneke patoke ne: mapa aa akajika pakafua bapostolo ne aba bakapetela mapa bu nunku kudibu.
Bantu bavua ne bua kushala nunku kabayi ne tshishimikidi tshia ditabuja anyi? Tòo, bualu Paulo wakamba ne: ‘[Nzambi] kakashala kayi ne ntemu; wakanuenzela bimpe, wakanupa mvula ne bidimu bia kuvudija biakudia bifume mu diulu, wakuuja mitshima yenu tente ne bidia ne disanka.’ (Bienzedi 14:17) Bushuwa, kudi bantu ba mutshima mululame bàdì basua kunzuluila tshijadiki tshidi tshitunyunguluke bieledi biabu bia lungenyi ne mitshima, “ngikadilu [ya Yehowa Nzambi] ikena-kumona idi imuenekela bimpe bitambe katshia ku difukibua dia bukua-bantu, bualu badi bayijinguluila ku bintu bienza, bukole buende bua tshiendelele ne Bunzambi buende mene, mushindu udibi se: [aba badi bavila Nzambi] kabena ne pa kubingila.”—Lomo 1:20, NW.
Kabiena bikengela anu kuitaba patupu dikalaku dia Nzambi. Paulo wakabela ne: “Kanulondi ndongoluelu eu wa malu, kadi nuandamuke pa kukudimuna ngelelu wenu wa meji, bua numone mua kudijinguluila nkayenu disua dia Nzambi dimpe, ne dianyishibue, ne dipuangane.” (Lomo 12:2, NW) Bualu ebu budi mua kuenjibua pa kulonga Mifundu ne mitalu ku diambuluisha dia mikanda ya Buena-nkristo, bu mudi tshibejibeji etshi. Ditabuja dishindamene pa dimanya dijalame dia Dîyi dia Nzambi, Bible, ki nditekete anyi dia pa mutu pa mutu nansha. Aba bàdì basunguluje disua dia Nzambi ne bàdì badienza mu ditabuja badi bakuatshila Nzambi mudimu wa tshijila.—Lomo 12:1.
Kuitabuja nansha kuyi umona
Mupostolo Tomase uvua ne lutatu lua kuleja ditabuja mu dibiishibua dia Yezu ku bafue. “Meme tshiyi mumone bibangu bia milonda mu bianza biende, tshiyi mutue munu pa muaba uvua milonda, tshiyi mulenge ne tshianza tshianyi mu lubadi luende, tshiakuitaba to,” ke muakamba Tomase. Pashishe, pakavuala Yezu mubidi wa bu-muntu ùvuà uleja mputa ya dikudikibua diende, Tomase wakandamuna bilenga ku tshishima etshi. Kadi, Yezu wakamba ne: “Ba diakalenga mbadi bitaba kabayi bamone.”—Yowanese 20:25-29, MMM.
Lelu’eu, miliyo ya Bantemu ba Yehowa badi ‘benda bua ditabuja, ki mbua bintu bidi bimueneka ku mêsu.’ (2 Kolinto 5:7) Nansha muvuabu kabayi bamone bishima bìdì bifunda mu Bible, badi bitabuja ne dishindika dionso ne: biobi ebi biakenzeka. Bantemu badi baleja ditabuja kudi Nzambi ne mu Dîyi diende. Ne diambuluisha dia spiritu wende, mbakokeshe bua kumvua malongesha a mu Bible ne tshiena-bualu tshiende tshinene—dibingisha dia bumfumu bukulu bua Yehowa Nzambi ku diambuluisha dia Bukalenge buende bua mu diulu. (Matayo 6:9, 10; 2 Timote 3:16, 17) Bua diakalenga dinene diabu buobu bine, bena nkristo aba balelela badi batumika ne mibelu ya mu Bible ya meji mu nsombelu wabu. (Musambu 119:105; Yeshaya 48:17, 18) Badi bitaba tshijadiki tshikena kuvila tshia se: milayi ya mu Bible idi ijadika tshikondo tshietu etshi bu “matuku a ku nshikidilu,” ne badi ne ditabuja dia se: bulongolodi bupiabupia bulaya kudi Nzambi bukadi pabuipi. (2 Timote 3:1-5; Matayo 24:3-14; 2 Petelo 3:13) Buabu buobu bidi disanka bua kuabanyangana ne bakuabu dimanya dia Nzambi. (Nsumuinu 2:1-5) Mbamanye se: anu ku dilonga dia Mifundu ke kudi aba bàdì bakeba Nzambi mua kumupetela bushuwa.—Bienzedi 17:26, 27.
Udi muvuluke Albert, eu uvua mutela mu tshiena-bualu tshishale anyi? Pakapita matuku makese ne dilomba diende dia tshishima kadiyi dipete diandamuna, bakamukumbula kudi umue wa ku Bantemu ba Yehowa, mukaji kampanda mukulakaje wakamushiila imue mikanda miumvuiji ya Bible. Pashishe Albert wakitaba dilonga dia Bible kumbelu kabiyi kufuta mfranga. Bu muakafikaye ku dibidilangana bimpe ne mukenji wa mu Bible, ditekeshibua mu mikolo diende diakandamuka tshisonsodi. Wakatuadija kujingulula se: ndekelu wa bionso, uvua mupete Nzambi.
Mifundu idi ibela ne: ‘Keba Yehowa paudi mumanye mua kumusangana; umubikile patshidiye pabuipi.’ (Yeshaya 55:6) Udi mua kuenza nunku, ki mpa kuindila tshishima kampanda tshia buena-lelu tshia kudi Nzambi, kadi pa kupeta dimanya dijalame dia Dîyi diende. Etshi ke tshidi tshikengedibua, bualu bishima nkayabi kabiena biibaka ditabuja.
[Tshimfuanyi mu dibeji 5]
Nansha dibiishibua dia mu tshishima dia Lazaro kadiakasaka bena lukuna ba Yezu bua kuleja ditabuja
[Bimfuanyi mu dibeji 7]
Ditabuja didi ne bua kushindamena pa dimanya dijalame dia Bible