Udi mulunda wa Nzambi anyi?​—Tshidi masambila ebe asokolola

UKADIKU mumvue mu mpukapuka bantu babidi bayukila anyi? Kakuyi mpata kabivua bikuangate dîba divule bua kujadika ngikadilu wa malanda abu​—bikalabu bavua balunda ba katapula kateke peshi kabayi bamanyangane, bamanyangane patupu anyi, balunda ba pa muoyo badi beyemenangana. Mu mushindu wa muomumue, masambila etu adi mua kusokolola malanda etu ne Nzambi.

Bible udi utujadikila ne: Nzambi “kena n’etu kule kudi muntu ne muntu.” (Bienzedi 17:27) Bushuwa, udi utubikila bua kumumanya. Tudi mua kuikala mene balunda bende. (Musambu 34:8; Yakobo 2:23) Tudi mua kudia nende bulunda bujalame bulelela! (Musambu 25:14) Mbimueneke patoke ne: malanda etu ne Nzambi ke tshintu tshia mushinga mukole mutambe tshitudi tuetu bantu bapange bupuangane mua kuikala natshi. Ne Yehowa udi wengeleka bulunda buetu. Ebi mbilelela bualu bulunda buetu nende mbushindamene pa ditabuja Muanende umuepele mulela, wakafila muoyo wende bua diakalenga dietu.​—Kolosai 1:19, 20.

Pa nanku masambila etu adi ne bua kuleja dinanga diondoke ne dianyisha bua Yehowa. Kadi, ukadiku mumvue ne: masambila ebe, nansha mudiwu anemeka Nzambi, mmapangile mu mushindu kampanda buondoke bua nyanji anyi? Ebi bitu bifikila bakuabu. Nsapi wa diakaja nende malu ntshinyi? Ndikolesha bulunda buebe ne Yehowa Nzambi.

Kupeta tshikondo tshia kusambila

Kumpalampala, bitu biangata dîba bua kukolesha ne kudima bulunda. Udi mua kuela bungi kampanda bua bantu muoyo dituku dionso peshi kuyukila nabu mene​—bena mutumba, bena mudimu nebe, bendeshi ba bise, ne bapanyishi ba mu magazen. Kadi, ebi kabiena menemene biumvuija ne: nudi bushuwa balunda ne bantu aba. Bulunda butu budiunda panudi nuyukila bikole ne muntu kampanda, numbuka ku malu a pa mutu pa mutu batangile ku diumvuija dia nyanji yenu ya munda ne ngenyi.

Mu mushindu wa muomumue, disambila didi dituambuluisha bua kusemena pabuipi ne Yehowa. Kadi tudi ne bua kupesha disambila tshikondo tshiakanyine; bidi bikengela bivule kupita diela tuasakidila dia lukasa pa mêba a kudia biakudia. Paudi utamba kuyukila ne Yehowa, udi utamba kupeta mushindu wa kusunguluja nyanji yebe, bisonsodi, ne bienzedi biebe wewe muine. Dijikija ntatu mikole didi dituadija kudileja padi spiritu wa Nzambi ukuvuluija mêyi-maludiki a mu Dîyi diende. (Musambu 143:10; Yone 14:26) Kabidi, paudi usambila, Yehowa udi utamba kulua bu muntu mulelela kuudi, ne udi ulua kujingulula bikole dikutabalela diende dia dinanga ne diditatshisha diende bua bualu buebe.

Ebi bitu nangananga nunku paudi upeta diandamuna ku masambila ebe. Ee, Yehowa udi mua “kuenza malu matambe atudi katu[y]i bamanye mua kumulomba ne mua kuelangana me[j]i”! (Efeso 3:20) Ebi kabiena biumvuija ne: Nzambi udi ukuenzela bishima. Kadi, ku diambuluisha dia Dîyi diende difunda, mikanda ya kasumbu ka mupika wa lulamatu, peshi bana betu banangi, udi mua kukupesha mibelu anyi buludiki budi bukengedibua. Peshi udi mua kukupesha bukole budi bukengedibua bua kutantamena anyi kutuila diteta kampanda nkanana. (Matayo 24:45, NW; 2 Timote 4:17) Malu mamonamona bu nunku adi uuja mitshima yetu ne dianyisha bua Mulunda wetu wa mu diulu!

Pa nanku muntu udi mua kulongolola dîba bua kusambila. Bushuwa, dîba ndikepele mu matuku aa a tunyinganyinga. Kadi paudi bushuwa utabalela muntu kampanda, misangu yonso utu upeta dîba dia kupitshisha ne muntu au. Tangila mushindu wakadiambila mufundi wa misambu: ‘Bu mudi ngulungu upuyakana, ujinga mâyi a musulu udi upueka, nunku muoyo wanyi udi upuyakana, ukujinga, wewe, Nzambi. Muoyo wanyi udi ne nyota ya kumona Nzambi, ya kumona Nzambi udi ne muoyo. Nenye kumueneka ku mêsu kua Nzambi tshikondo kayi?’ (Musambu 42:1, 2) Udiku ne dijinga dikole dia muomumue bua kuyukila ne Nzambi anyi? Nenku disumbila tshikondo tshia kuenza nanku!​—Fuanyikija ne Efeso 5:16.

Tshilejilu, udi mua kuteta bua kubika mu dindadinda bua kupeta tshikondo kampanda tshia pa nkayebe bua kusambila. (Musambu 119:147) Utuku imue misangu upangila tulu butuku anyi? Nunku, bu mufundi wa misambu, udi mua kumona bikondo bia lutatu lua mushindu’eu bu mpunga wa kuambila Nzambi lutatu luebe. (Musambu 63:6) Peshi bidi mua kuikala anu muanda wa kuenza masambila kabukabu a bikoso munkatshi mua dituku. Mufundi wa misambu wakambila Nzambi ne: ‘Ndi ndila kuudi dinda too ne ku dilolo.’​—Musambu 86:3.

Dilengeja ngikadilu wa masambila etu

Imue misangu neubimone kabidi biambuluisha pa kulepesha bule bua masambila ebe. Mu disambila dia tshikoso, udi mua kusua kuakula malu a pa mutu pa mutu. Kadi paudi wenza masambila male ne mondoke bikole, udi upatula mu mushindu mupepele ngenyi yebe ne nyanji ya munda. Musangu umue anyi ya bungi, Yezu wakapitshisha butuku bujima mu disambila. (Luka 6:12) Kakuyi mpata neumone se: masambila ebe nkayebe adi alua masheme ne malenga biwabenga kuenza mu tshiputuku.

Ebi kabiena biumvuija kuya emu ne emu paudi ne malu makese a kuamba; kabiena nansha biumvuija diambulula malu patupu. Yezu wakadimuija ne: ‘[“Panudi nusambila,” NW], kanuakudi biakulakula bu mutu bantu ba bende benza; bobu batu belangana meji ne: nebatumvuile bua mêyi etu adi a bungi. Kanuikadi bu bobu; bualu bua Tatu wenu udi mumanye binudi nabi bualu diambedi kanuyi banji kumulomba.’​—Matayo 6:7, 8.

Disambila didi ditamba kulengela paudi udianjila kutuma lungenyi ku malu audi musue bua kuyukidilangana. Malu adiku mavule​—masanka etu mu mudimu, matekete etu ne dipanga bupuangane, diedibua dietu mâyi ku makasa, diditatshisha dietu dia malu a mfranga, bifimpakaji ku mudimu peshi mu tulasa, diakalenga dia mêku etu, ne nsombelu wa mu nyuma wa tshisumbu tshietu, bua kutela anu bikese ebi.

Lungenyi luebe lutu imue misangu lulalakana pautu usambila anyi? Nanku enza madikolela mavule bua kukongakaja lungenyi kaba kamue. Ndekelu wa bionso, Yehowa udi wanyisha bua ‘kuteleja matshi ende ku kudila kuetu.’ (Musambu 17:1) Katuenaku ne bua kuanyisha bua kuenza madikolela a muoyo umue bua kuteya matshi ku masambila etu nkayetu anyi? Eyowa, ‘jalamija lungenyi pa bintu bia spiritu,’ ne benga bua kululekela lulalakana.​—Lomo 8:5, NW.

Mushindu utudi tuambila Yehowa malu udi kabidi wa mushinga. Nansha mudiye musue bua tuetu kumuangata bu mulunda, katuena bua kupua muoyo ne: tudi tuakula ne Mfumu mukulu wa bionso bidiku. Bala ne elangana meji pa muanda mukuate buôwa udi muleja mu Buakabuluibua nshapita 4 ne 5 (NW). Emu Yone wakamona mu tshikena-kumona bunême bua Eu utudi tusemena pabuipi kudiye mu disambila. Ndisanka kayipu ditudi nadi dia kuikala ne mushindu wa kusemena pabuipi ne kupeta dianyisha kudi “Eu udi musombe pa nkuasa wa bumfumu”! Katuena basue nansha kakese bua ngakuilu wetu kuluaye mubule kanemu peshi kayi muakanyine. Kadi, tudi ne bua kuenza madikolela a pamue bua kuvuija ‘mêyi a mukana muetu ne meji atudi tuela mu mutshima wetu ikale mitabujibue kudi Yehowa.’​—Musambu 19:14.

Kadi, tudi ne bua kumanya se: katuena tukemesha Yehowa ne ngakuilu wa munanunanu. Udi usankishibua ku mêyi etu a kanemu ne a muoyo umue, kakuyi kutangila mu mushindu udiwu mambibue patupu.​—Musambu 62:8.

Busambi ne lumvu mu bikondo bia dikengela

Patudi tukengela diambuluisha ne busambi, tutu misangu mivule tukudimukila kudi mulunda wa pa muoyo bua kupeta dikuatshisha ne diumvuilangana. Ee, kakuena mulunda udi mupepele bua kupeta kupita Yehowa. Udi “dikuatshisha dietu mu makenga didi kadiyi di[p]anga tshiendelele.” (Musambu 46:1) Bu mudiye “Nzambi wa busambi buonso,” udi umvua bimpe menemene malu etu kupita muntu kayi yonso mukuabu. (2 Kolinto 1:3, 4; Musambu 5:1; 31:7) Ne udi uditeka bimpe pa muaba wa bakuabu ne udi ne luse bua aba badi mu nsombelu mubule ditekemena. (Yeshaya 63:9; Luka 1:77, 78) Kuangata Yehowa bu udi mulunda mutumvuidi, tudi tudiumvua bapepele bua kuyukila nende ne disuminyina dionso, bikole menemene. Tudi basakibue bua kuleja ditshina dietu ditambe bunene ne tunyinganyinga. Nenku tudi tumona buludiludi mudi ‘busambi bua Yehowa nkayende busankisha mutshima wetu.’​—Musambu 94:18, 19.

Imue misangu tudi mua kudiumvua katuyi bakanyine bua kusemena kudi Nzambi bua bilema bietu. Kadi netuambe tshinyi bikala mulunda webe wa pa muoyo mukuenzele tshilema ne mukulombe dilekelela? Kuakusakibuaku bua kumusamba ne kumubatamija anyi? Nunku, bua tshinyi udi ne bua kutekemena bikese kudi Yehowa? Ne kalolo konso, udi ulekelela balunda bende badi benza mpekatu bilema bu tshipeta tshia dipanga bupuangane dia bantu. (Musambu 86:5; 103:3, 8-11) Bamanye bualu ebu, katuena tudikanda bua kumutondela bilema bietu ne budisuile buonso; tudi mua kuikala ne dieyemena dia dinanga ne luse luende. (Musambu 51:17) Patudi tudiumvua banyingalale bua ntupakanyi yetu, tudi mua kupetela busambi ku mêyi a mu 1 Yone 3:19, 20: ‘Mu muanda eu netumanye ne: tudi ba bulelela, netupoleshe mitshima yetu ku mêsu kuende; bua bikala mitshima yetu itupisha, Nzambi udi upita mitshima yetu bunene, ne udi mumanye malu onso.’

Kadi, katuena tukengela bua kuikala mu nsombelu mubule ditekemena bua kuikala ne ditabalela dia Nzambi dia dinanga. Yehowa udi utabalela tshintu tshionso tshidi mua kulenga diakalenga dietu dia mu nyuma ne dia mu mpampakenu. Eyowa, katuena tukengela nansha kakese bua kuela meji ne: nyanji, ngenyi, ne majinga etu mbia mushinga mukese menemene bua kubitela mu disambila. (Filipoi 4:6) Paudi ne mulunda wa pa muoyo, utu uyukila nende anu pa malu manene a mu nsombelu webe anyi? Kutuku kabidi wabanyangana nende majinga makese a nankunanku anyi? Bia muomumue, udi mua kudiumvua mupepele bua kuyukila ne Yehowa pa bidi bitangila nsombelu webe wa mushindu wonso, mumanye se: ‘yeye ke udi ukulama.’​—1 Petro 5:7, MMM.

Bushuwa, bulunda kabuena pamu’apa mua kunenga mutantshi mule bikala bionso biudi wakula bikale anu biebe nkayebe. Bia muomumue, masambila etu kaena ne bua kuikala mimanyine anu pa malu etu nkayetu nansha. Tudi ne bua kuleja kabidi dinanga dietu ne ditabalela bua Yehowa ne bipatshila biende. (Matayo 6:9, 10) Disambila kadiena anu mushindu wa kulomba diambuluisha kudi Nzambi kadi ntshikondo tshia kumuela tuasakidila ne kumusamuna. (Musambu 34:1; 95:2) “Dipeta dimanya” ku diambuluisha dia didilongela pa tshibidilu dia muntu pa nkayende nedituambuluishe mu muanda eu, bualu didi dituambuluisha bua kulua bibidilangane bimpe ne Yehowa pamue ne njila yende. (Yone 17:3, NW) Mu mushindu wa pa buawu dibala mukanda wa Misambu nedikuambuluishe ne neumone mushindu uvua basadidi bakuabu ba lulamatu bakule buobu bine ne Yehowa.

Bushuwa bulunda bua Yehowa ndipa dia mushinga mukole. Tudiku mua kuleja ne: tudi mene tubuanyisha pa kuvuija masambila etu mikale a pa muoyo, menza ne mutshima mujima, ne a muntu pa nkayende. Nenku netupete diakalenga dileja kudi mufundi wa misambu, wakamba ne: ‘Disanka didi kudi muntu uudi usungula ne uudi ufikisha pepi nebe.’​—Musambu 65:4.

[Bimfuanyi mu dibeji 28]

Tudi mua kusambila Nzambi dîba kayi dionso padi mushindu umueneka