Tutuadijayi malonga mu broshire wa Utulomba
1 Luapolo idi ifuma miaba yonso pa buloba idi ileja ne: broshire wa Ntshinyi tshidi Nzambi utulomba? ntshiamu tshia bukole bua kulongesha bantu bulelela. Lumingu luonso badi batuadija malonga a Bible binunu mu broshire eu. Udiku mufike ku dituadija ne dilombola dilonga dia Bible mu broshire wa Utulomba anyi?
2 Padi ba bungi bamona se: mbipepele bua kufila broshire eu, bakuabu badi bamona bikole bua kumanya tshidibu mua kuamba bua kutuadija dilonga. Nngenzelu kayi idi bakuabu bakuata nayi mudimu bua kufika ku dituadija malonga a Bible ne broshire wa Utulomba? Ngenyi idi ilonda eyi idi ne diambuluisha.
3 Lomba muntu bua kumuleja mutu dilonga dienzeka: Patudi tumonangana ne muntu bua musangu wa kumpala anyi mu dikumbulula, pamutu pa kumulomba patupu bua dilonga dia Bible, tudi mua kuleja muikala dilonga edi dienzeka. Kuenza nunku kudi mua kuambuluisha bua kukupula mu lungenyi lua muntu buôwa butu nabu ba bungi padibu bumvua muaku “dilonga.” Patudi tumanya mua kulejangana mushindu wa kulonga, netumone se: tudi mua kutuadija buludiludi dilonga ne mbuelelu mupepele.
4 Didilongolola ke nsapi: Netutuadije dilonga dia Bible ne musangelu bituikala badilongolole bimpe. Didianjila kudilongolola nedituambuluishe bua kutshimuna dielakana didi mua kutukuata mu mudimu wa dilombola malonga a Bible. Pa kuambulula dileja misangu ya bungi, netuikale mua kuyikila ne bantu bipepele, kuakula bu pa tshibidilu ne mu mêyi etu nkayetu. Nebituambuluishe kabidi bua kuikala badilekelele ne mutuyukidishi neadiumvue pende bimpe.
5 Paudi wambulula dileja, mbimpe kubala dîba bua umone mua kuambila mukuyukidishi dîba diwangata bua kuleja mutu dilonga dienzeka. Mumane kudimanyisha, muanetu mukuabu utu wamba ne: “Ndi mupitshile apa bua kukuleja ndongamu wetu wa dilonga dia Bible kadiyi dia kufuta. Bidi bilomba minute mitue ku itanu bua kuleja mutudi dienzeka. Udi mua kumpa minute itanu anyi?” Udi mua kuleja Dilongesha 1 dia mu broshire wa Utulomba mu minute mitue ku itanu. Bushuwa, mu minute eyi nudi mua kubala anu mvese mikese misungula, kadi panudi nujikija dilongesha dia kumpala mu minute mikese, mukuyukidishi mmuenze dilonga diende dia kumpala. Pashishe umumanyishe ne: paudi upingana bua kulonga Dilongesha 2, nenuenze minute 15 patupu.
6 Dileja didi dilonda edi ndipatule bipeta bimpe:
▪ “Ndi musue kukuleja mushindu mupepele ne wa lukasalukasa utu dilonga dia Bible dia ku nzubu dienzeka ne broshire eu wa Ntshinyi tshidi Nzambi utulomba? Ba bungi mbafike ku dimona se: mu minute 15 patupu ku lumingu luonso mu mbingu 16, mbapete mandamuna adi asankisha a mu Mifundu ku nkonko eyi ya mushinga.” Leja mu mêyi makese tshikebelu. Uye pa Dilongesha 1 ne wambe ne: “Wewe mua kututeleja mu minute mitue ku itanu, netuikale mua kukuleja mua kulonga. Dilongesha 1 didi ne mutu wa bualu eu: ‘Mushindu uudi mua kusokolola tshidi Nzambi ulomba.’” Pashishe ubale nkonko yonso isatu, ne umvuije bishiferi bidi mu tuboko. Bala tshikoso 1, ne leja mukuyukidishi mushindu wa kupeta diandamuna. Udi mua kumulomba bua abale tshikoso 2. Pashishe wambe ne: “Bilondeshile tshidibu bafunde, mmunyi muudi mua kuandamuna ku lukonko elu? [Bala kabidi lukonko, ne lekela muntu andamune.] Neumone se: mu tshikoso tshionso mudi mvese. Idi ikoka ntema yetu ku mandamuna a mu Bible ku nkonko eyi. Tshilejilu, tubale 2 Timote 3:16, 17 ne tangila né udi umvuangana ne diandamuna diudi mufile bua muena Bible.” Paudi ujikija kubala tshikoso 3, ela lukonko ne bala Yone 17:3, koka ntema ya muntu pa dimanya didiye mupete pa kuambulula Dilongesha 1. Panudi nujikija, udi mua kuya ku Dilongesha 2 ne kubala lukonko lua ndekelu elu: “Mmishindu kayi ibidi itudi mua kulonga pa bidi bitangila Nzambi?” Pashishe umuebeje ne: “Ndituku kayi diudi kabidi ne minute mitue ku 15 bua tuetu kukonkonona Dilongesha 2 ne kupeta diandamuna?”
7 Bidi ne mushinga bua dilonga dikale dipepele ne kuela mukuyukidishi kalumbandi padiku mushindu. Panudi numvuangana bua dikumbula dikuabu, kankamija mukuyukidishi bua alonde ngenzelu umue-umue eu bua dilongesha didi dilonda, pamutu pa kumuebeja bikalaye musue kutungunuka. Muambile ne: udi musue kupingana. Bamue bamanyishi batu balomba bua kuenzela dilonga ku telefone padiku lutatu bua kumonangana. Udi kabidi mua kukankamija mulongi eu bua ateke broshire wende muaba muimpe bua ikale pabuipi bua panuapetangana musangu udi ulonda.
8 Ikala ne dipangadika: Bu mudi nsapi wa dilubuluka muikale didilongolola, tudi ne bua kuikala ne dipangadika dia kutungunuka ne dienza nanku. Kuenza dilongesha dijima mu minute mikese kudi mua kuikala ne lutatu, nunku ikala mupangadije bua kuambulula dileja misangu ne misangu mudibi bikengela bua kuikala ne ludimi lupepele paudi uleja mututu tuenza dilonga. Teta mua kuleja muntu yonso uudi upeta ku tshiibi, mu misesu ne ku telefone mututu tulonga ne bantu. Biwikala ne lutatu bua kupeta dilonga dia Bible, kuteketshi mu maboko nansha. Bua kufika ku dituadija malonga a Bible bidi bikengela kuikala ne dipangadika ne dijinga dilelela bua kumanyisha bakuabu bulelela.—Gal. 6:9.
9 Mu ditumikila ngenyi eyi, udi pebe mua kuikala ne diakalenga dia kuambuluisha muntu bua kubuela mu njila wa muoyo, mu dituadija ne dilombola dilonga dia Bible mu broshire wa Utulomba.—Mat. 7:14.